AYUB 9 - WUKE SUSI WATTI'U AL᷊AL᷊USASSA

I Ayub

^1-2 Arawe i Ayub sinumimbakka, “Atonna, i ya'u masingkatta, manga wisaranu udde nassal᷊a. Arawe, tawe mariaddi taumata mapparkara luwanna Ruata wuṛṛu mamaddon Mawu?

³ Wuassu saṛṛiwu aiwal᷊o apan nipaiwal᷊on Duata, saran sampaddi tawe sinimbaṛṛannu taumata.

⁴ Ruata udde nangillembon pande wuṛṛu taṛṛino; isai woṛotongnge maataṛṛangnga mando'appa si Tou?

⁵ Ruata nangingkattu wowone ringannu tawe niasingkattannu taumata, see i Tou namal᷊insuangnga ringannu asasa'u wuṛṛu al᷊aṛṛagissa.

⁶ Ruata nandiaddi linukka na'oman sara runia niumio'a, wuṛṛu diṛṛi uatumpilla runia niumal᷊ore,

⁷ Ruata wotongnge maningaddu matannallo sumabbangnga sutempo marua allo, wuṛṛu maningaddu anumpittanna ṛumena ṛabbi.

⁸ Niwilanne winalanganna ringannu taweddu nallal᷊ima; ringanna niṛṛinda liuddu atoannu tahal᷊oangnga.

⁹ I Tou nantaingngu atokku anumpitannu timukka su winalanganna, aroddi lai anumpitanna Iamba, anumpitanna Matitimma wuṛṛu Ṛiabba.

¹⁰ I ite tawe maasunna anambon manara-Ne, i ite tawe maareengngu manga al᷊aṛṛindu-Nge.

¹¹ I Tou sinumabbi su saruangku, arawe tawe niasiloangku; I Tou niumamatta su sandiṛṛangku, arawe nilumiatta'a si ya'u.

¹² Amungkangngu i Tou mangaṛṛo, isai wotongnge maningaddi Tou? ara'e waṛṛani maiwal᷊o si Tou, ‘Ei, I'o tantal᷊anna ma'ola'a apa?’

¹³ Ruata tawe maṛṛaddannu asasa'u wuṛṛu al᷊al᷊oson naung-Nge; manga masasumbalan Rahab, uasuṛṛubbawa lai si Tou.

¹⁴ Nariaddi, ereapa i ya'u wotongnge manongga si Tou? Ringannu manga wisara apa i ya'u sarun sumimbakka si Tou?

¹⁵ Salaiwe i ya'u tawe nassal᷊a, apate olaangku, tumba'u maddorongnga aakkanna wuassu Ruata mallaṛṛuungku?

¹⁶ Unnuwisara i Tou sumimbakka napawe i ya'u sumal᷊ande, i ya'u uapapaddua, atonnawe i Tou maapulu maddaringikka tingi'u?

¹⁷ I Tou nakkimunsa'a si ya'u sulal᷊ummu anginna ma'ikkatta, wuṛṛu nanamba asasusa'u ringannu tawe pinangiananne.

¹⁸ Tawe niwala-Ne i ya'u sumangngo sarangkadio'a; ewe'e lai i ya'u niomboan-Ne ringannu asasusa apan mawakkatta.

¹⁹ Ṛinonewe i ya'u mabbawul᷊on Tou? Arawe pa'ellega, tawe sul᷊ungnge auatan-Ne! Unnuwisara si Tou i ya'u mangalaen Tou, isai waṛṛani mamaggo si Tou su pallaṛṛuunganna?

²⁰ I ya'u satia wuṛṛu tawe ma'ola'a rosa, arawe moṛṛongku ereola'u mabbisara al᷊aṛṛaene; suapan bisara apan iaatokku wiwi'u, ereola'u mapaasal᷊an baddangku.

^21-22 I ya'u tawe nassal᷊a arawe i ya'u tawe pandumme. I ya'u nualle mabbiakka. Si ya'u tateddu lai pia gunane; iapa nassal᷊a wuṛṛu iapa naṛṛino mangke uasul᷊ungke nasimme: Ruata sarun mamate abbi sitarua.

²³ Amungkangngu taumata tawe sal᷊ane inaṛṛombanganne mate, Ruata tumba'u lullage.

²⁴ Runia tinantillu Ruata su taumata mapontol᷊osanna, wuṛṛu manga mallaṛṛuungnga niolang-Nge wuta abbi. Ruata na'ola'a sarangkanambone indi, amungkangngu wal᷊ine i Tou, isai lai wotongnge?

²⁵ Manga allo'u malliudda ringannu mal᷊ihakka, see mawul᷊i ringannu tawe maapendamma al᷊al᷊uassa.

²⁶ Naal᷊ihidda saalanna sussassakka, wia'u malliudda ringannu mal᷊ihakka, al᷊ihakke naal᷊ihidda asiaṛṛe monto'a, mangametta wiakke.

^27-28 Amungkangngu i ya'u maapulu umamminna wuṛṛu lumage, amungkangngu i ya'u maannamma tawe mannaungnga anambon asasusa, ne asasusa'u rumantate apia, mangngenggenna si ya'u; ana waugu i ya'u masingkatta, Ruata sidutu mapaasal᷊a'u.

²⁹ Ne, ana waugu aroddi, ipura lai si ya'u?

³⁰ Tawe sabonna apan wotongnge maraddassa rosa'u!

³¹ I ya'u nilakkummu Ruata sulal᷊ummu onassa, na'oman sara lau'u lai maddantingkute.

³² Unnuwisara Ruata udde taumata, i ya'u wotongnge sumimbakka si Tou; wua'udde i yami sumaruante pallaṛṛuunganna tadea'u manginsue al᷊awo'u pattatiakka.

³³ Arawe suwallatti yami tawe mamamarikissa apan wotongnge makkungngi ambua.

³⁴ Doronganna Ruata tate makkuumangku wuṛṛu mapparaun araṛṛagin-Ne wuassia'u!

³⁵ I ya'u tawe mata'uttu Mawu wuṛṛu orassa indi mabbisarate, ana waugu i ya'u masingkattu naungku sassane.