AYUB 5 - WUKE SUSI WATTI'U AL᷊AL᷊USASSA

¹ Sassal᷊andete, ei Ayub, piawe sasimbakke? Mala'ekatta suapa apan paddorongannu sasumbala?

² Tumba'u ete taumata woddo apan mattate ana waugu asasusan naungnge.

³ Su paassa i ya'u naasilo taumata woddo; wiakke aellehanna tumaniten matohassa. Arawe inaṛṛombanganne ta'u niwontohanna tampa atatanaanne.

⁴ Ne manga anangnge tawe saran paassa naasomba tatal᷊antuppa; taweddu mappulu manamba si mangitou su pallaṛṛuunganna.

⁵ Apa apan a'itinganni mangitou su wawail᷊anne, nasue niannu taumata apan tianne tawe loṛṛone. Ewe'e lai gandumma su tangngan mahurangnge, nasue niwo'on taumata mal᷊unussa. Darotongnga wuṛṛu paa'alan mangitou naola'a aimmatannu taumata wal᷊iun darotongnga.

⁶ Wal᷊ine wuassu runia al᷊al᷊eo udde nilumapputa; wal᷊ine wuassu leta'u asasusa udde nirumanta.

⁷ Wal᷊ine! Ewe'e ete taumata udde sassane apan nandantan asasilaka su waddangnge, naal᷊ihidda ṛente'u bunga api nilumapputta wuassu putungnge sassane.

⁸ Amungkangngu i ya'u erete i'o udde su Ruata i ya'u sumal᷊ande. Ete si Tou i ya'u sarun mangalae, lapiddu manantillu hatto'u.

⁹ Manga inolaannu Ruata tawe sul᷊ungnge; i ite mangke tawe maasunna. Manga al᷊aṛṛindu'a apan niolang-Nge, tawe iareengnga wuṛṛu tawe umuddussa.

¹⁰ I tou nanossokku uranna su wowon dunia, na'oman sara wawail᷊anna wuṛṛu wadda'a naṛṛolo niwokkanne.

¹¹ Ete i Tou Ruata apan mannanggakku taumata mawawo, wuṛṛu mapal᷊uassu taumata apan lullal᷊o.

^12-13 I Tou tawe napariaddin ṛiinnu taumata pande mallobbossa, nisongnga-Ne wuṛṛu niaparanta-Ne taumata pande, na'oman sara anambon sahaddi mangitou tawe nariaddi, wuṛṛu i mangitou niawusuannu aalli mangitou sassane.

¹⁴ Sutempo allo i mangitou niarandumanna, uasasaṛṛipo ere sutempo alloarane.

¹⁵ Arawe Ruata nanal᷊amatta: taumata asiangnga wuassu papate taumata mawawo wuassu patataṛṛuallanga.

¹⁶ Orassa indi piate antimma lai su taumata apan tawe darotongnge. Wuṛṛu taumata lal᷊eo mal᷊annabba nimoune, ana waugu Ruata buatte nakkapingnga moṛṛongnge.

¹⁷ Untungnga si'o amungkangu Ruata mannagu si'o! Arie maurangnga naungngu amungkangngu i Tou manangkulla si'o.

¹⁸ Ana waugu ete Ruata apan mapaal᷊essa, Ete i Tou lai apan mangundamma. Su lima-Ne apan namuulla, eteudde lai apan mapaul᷊e apia.

¹⁹ Amungkangngu asasilaka rumantate, sidutu i'o maasomba asasal᷊amatta.

²⁰ Napawe ṛutumma rumantate, i'o tawe mate amal᷊unusanna. Napawe pangalo mandasakka maata'utta, i'o mal᷊iu wuassu papate.

²¹ I'o lal᷊u'aranna wuassu aal᷊uandaga wuṛṛu sondon taumata; i'o uasaruanna silaka tawe mata'utta.

²² Amungkangngu araṛṛagissa wuṛṛu ṛutumma rumanta, i'o sarun matammudda ewe'e lai lullage. I'o tawe maapendamma atata'utta ara'e suminggawangnga, sumaruanna winatangnga mal᷊aṛṛaga wuṛṛu maṛṛagissa.

²³ Wailla apan pajekoannu sarun tawe batune; winatangnga matengnga sarun tawe tumambo si'o.

²⁴ I'o sarun matammudda matana'a su rasannu; wuṛṛu napawe i'o mamarikissa manga dombanu, sarangkanambone sal᷊amatta tawe gaingnge saran sambau.

²⁵ Ana'a papapulunnu tawe iareengnga, i mangitou anambone ere nannal᷊o su wadda'a.

²⁶ Naal᷊ihidda gandumma nal᷊ahate, itinganna sutempone, i'o lai sarun mabbiakka mapia maddatingngu matimmadde.

²⁷ Ayub, sarangkanambone udde buatte niparikisanni yami. Wisara udde atonna, nariaddi sengkampe udde.”