AYUB 42 - WUKE SUSI WATTI'U AL᷊AL᷊USASSA

I Ayub

^1-2 I Ayub sinumimbakka Mawu, “I ya'u masingkatta, oh Mawu, manungku I'o Lembontaṛṛino; I'o wotongnge ma'ola'a al᷊awo'u apa.

³ I'o ma'iwal᷊o anio i ya'u waṛṛani mapapadduan asingkan-Nu sumbal᷊i i ya'u sassane wagga. I ya'u mabbisaran manga hatto apan i ya'u tawe maasunna, su ola'u manga hatto apan maatiangnga si ya'u indi.

⁴ I'o nandolo'u maddaringikka sutempo I'o mabbisara, wuṛṛu nangonggollu sasimbakke napawe I'o maiwal᷊o.

⁵ Dorone, asingka'u su ola'u Mawu tumba'u niaringiṛṛanna su taumata, Arawe orassa indi i ya'u naasingkatta Si'o ringannu uasasaruanna.

⁶ Ana waugu udde i ya'u massili mannaungnga al᷊awo'u wisara'u wuṛṛu ringannu sussasilla i ya'u niuma'ianna sulal᷊ummu awu wuṛṛu leta'a.”

Panginsueanne

⁷ Napawe buatte nabbisara si Ayub, Mawu nabbisarate si Elifas, “I Ya'u massa'u si'o wuṛṛu hane darua, ana waugu i yamiu tawe nabbal᷊o watti'a ṛinone su ola'u watangngang-Ku. Arawe allang-Ku i Ayub tawe aroddi.

⁸ Ne, orassa indi panganute pitu sapi esakka wuṛṛu pitu domba esakka, wua'udde roote ringanni Ayub. Ana see onggol᷊a'e sarangkanambone udde maola'a sasamba itattambunna hunan ririnu. Ayub sarun umal᷊iomanni yamiu wuṛṛu aal᷊iomanne sarun daringiṛṛang-Ku. I yamiu tawe Ta'u pansilianna, salaiwe i yamiu ṛinone manengkamma ṛuumanna. I yamiu tawe namasingkattu watti'a ṛinone su ola'u watangng-Ku, arawe i Ayub namasingkattu olangnge udde.”

⁹ I Elifas, I Bildad wuṛṛu i Zofar tinumuṛṛutta apa apan nirolokku Mawu, wuṛṛu Mawu naddaringikka aal᷊iomanni Ayub.

¹⁰ Wua'udde, napawe i Ayub niumal᷊iomannu siri tallu hawene, Mawu na'ola'a si tou naala apia wuṛṛu nangonggolla si tou paarua anambone wuassu anambon pussa'ane dorone.

¹¹ Annambon iaangnge wuṛṛu tuṛṛangngi Ayub wawine, wuṛṛu anambon hawene dorone, nirumanta nattembo si tou ana see suadio'a naandeangnga ringanni tou su wal᷊ene. I mangitou massusa suadio'a su ola'u anambon asasusa apan buatte niaparantan Mawu si tou, wuṛṛu nangonggollu al᷊al᷊uassa si tou. Sangkatou-sangkatou i mangitou nangonggollu roitta wuṛṛu sambau sinsingnga wul᷊awanna si Ayub.

¹² Ayub nial᷊amatannu Mawu ringannu nilumambalanna sulal᷊ummu lamben pabbiaṛṛanne, wuassu sutempo i tou tantal᷊anna taambe niaṛṛiaannu asasilaka. Ayub uatahuanna 14.000 ambingnga domba, 6.000 unta, 2.000 sapi, wuṛṛu 1.000 keledai.

¹³ I tou naasomba siri pitu ana'a esakka wuṛṛu siri tallu ana'a wawine.

¹⁴ Anangnge wawine pahul᷊une aranne i Yemima, aiapa aruane i Kezia, wuṛṛu iapa ṛembonne i Kerenhapukh.

¹⁵ Su ahewallu wanua tawe ana'a maṛṛuala apan aṛṛamagge ere ana'i Ayub siri tallu wawine. I mangitou nionggol᷊annu wageangnge wuassu pussa'an iamangnge, uasul᷊ungngu tahian manga tuṛṛangnge esakka.

¹⁶ Wua'udde i Ayub ta'e nabbiakka maṛṛasu appattu pul᷊o su tonnane al᷊annune, na'oman sara i tou ta'e naasilo manga pulunne see lai manga ana'i mangitou.

¹⁷ Ana see i Ayub natete sulal᷊ummu uukka mal᷊o'engnga atonna.