AYUB 37 - WUKE SUSI WATTI'U AL᷊AL᷊USASSA

¹ Tandi'a ma'ola'a naungku sussinggawangnga wuṛṛu pappuso'u mangiladda.

² Paddaringikke tingikku Ruata, ei yamiu sarangkanambone; paddaringikke rallu apan sinumabbangnga wuassu moṛṛong-Nge.

³ Su ahewallu langitta i Tou namallossu sawallo-Ne; i Tou nandolokku sawallo-Ne watukku pentakku runia.

⁴ Wua'udde, niaringiṛṛante tingik-Ke sussal᷊induṛṛungnga, tingikku winabbawa rallu'a wuṛṛu sawallo; wuṛṛu su pattangngannu tingikka apan ruddalu'a, rallu'a pia sawallone uasasametta.

⁵ Ana waugu parentan Duata, ne al᷊aṛṛindu'a nariaddite, manga inolaanna maatiangnga tawe aasunnanni ite.

⁶ Salju nanawo su runia wuassu parenta-Ne; uranna masaddata nangansalla su runia waugu nirolok-Ke.

⁷ I Tou napailol᷊on manaran taumata, tadea i mangitou masingkatta manungku i Tou tantal᷊anna mammanara.

⁸ Aroddi lai winatangnga matengnga sinumutta sulal᷊ummu loṛṛangnga wuṛṛu liangnga, wuṛṛu mattillindumma sulal᷊ummu sal᷊akke.

⁹ Wuassu timukka tinumiuppa anginna ma'ikkatta wuṛṛu wuassu sawannakka anginna masunge nangooppa.

¹⁰ Sasangngon Duata napaamaran wowon kua'e apan mal᷊al᷊angnga, niwal᷊u-Ne nabbal᷊i eisse apan maattikka.

¹¹ Winabbawa niloṛṛoan-Ne ringannu ua'e, wuṛṛu winabbawa llullansiangnga niasemaṛṛannu sawallo.

¹² Winabbawa tinumalla'a see ahewallu runia, wuassu parentan Duata i mangitou u'amatta su al᷊awo'u tampa.

¹³ Ruata nangonggollu uranna ipaṛṛolo leta'a, ara'e lai ipakkuumannu walahannu taumata; asinungka lai tadea'u iapasilo si mangitou, aroddi ahewalle darangngu-Ne apan uatialu saran mal᷊annu-l᷊annu.

¹⁴ Paal᷊annabbe tal᷊ang kaddio'a, ei Ayub, wuṛṛu paddaringikke; panutukke manga al᷊aṛṛindu'u Ruata.

¹⁵ Masingkattawe i'o ereapa Ruata mandolokka, na'oman sara sawallo sinumabbangnga wuassu winabbawa wuṛṛu rallamma?

¹⁶ Maingkattawe i'o ereapa winabbawa udde tuttalla'a lanna'u liman Duata apan maatiangnga?

¹⁷ Tawe, i'o tumba'u wotongnge sumal᷊iomannu sal᷊ihangnga napawe runia rantannu anginna timukka.

¹⁸ Wotongnge i'o ere Ruata apan namilattu winalanganna wuṛṛu niapaattikka ere atta'a iwabboso ara'e kaca?

¹⁹ Aṛṛa'ete i yami apate apan iwisaran kami su Ruata; i yami tawe maatal᷊a'a, ṛingiranni yami tawe loṛṛone.

²⁰ I ya'u maddiri sumal᷊ande maddorongnga mabbisara su Ruata aṛṛengenne i Tou maasomba pangiananne ipanilaka si ya'u.

²¹ Orassa indi semakku langitta tumaniten masemakka na'oman sara maal᷊angitta mata; anginna namaresi hatin banua amungkangngu tumiuppe.

²² Semakka ere wul᷊awanna nasabbangnga wuassu sawannakka, ne awawantugu Ruata naatiangnga naungngi ite.

²³ Wahewalla atonna taṛṛinon Duatan kite; i ite tawe mapangundani-Ne, I Tou sidutu tawe awusune wuṛṛu matul᷊idda; tawe saran paassa i Tou mangallangnga taumata.

²⁴ Ana waugu i Tou ṛinone addatannu anambon taumata, wuṛṛu taumata apan mangnga'u pande tawe panduan-Ne.”