AYUB 35 - WUKE SUSI WATTI'U AL᷊AL᷊USASSA

^1-2 Ayub, i'o niumal᷊iwu amungkangngu massunna manungku su matan Duata i'o tawe sal᷊ane.

³ I'o naabul᷊i amungkangngu maiwal᷊o, apa pangillul᷊eannu rosanu su saruan-Ne; wuṛṛu auntunganna apa apan sengkamannu amungkangngu i'o tawe ma'ola'a rosa.

⁴ Ete i ya'u apan mangonggollu sasimbakke si'o wuṛṛu lai su manga hawenu udde.

⁵ Paningngarate watukku langitta wuṛṛu pa'ellege aroddi atanggakke winabbawa.

⁶ Amungkangngu i'o marosa, Ruata tawe marugi. Amungkangngu pasasal᷊anu manambo, i Tou maurangnga.

⁷ Ringannu ma'ola'a apapia, Ruata tawe nilal᷊imannu. Atonna, i Tou tawe mappandumma saran sambau wuassi'o.

⁸ Tumba'u sansul᷊ungngu apan niarugiannu manga rosanu. I tou lai apan mauntungnga ana waugu apapianu.

⁹ Manga taumata apan niallangnga, sarun sumal᷊iomanna; i mangitou mangngintul᷊i ma'iontolla.

¹⁰ Arawe wal᷊ine su Ruata, Mandariaddine apan mangngonggollu antimma sutempo i ite massusa,

¹¹ wuṛṛu nangonggolla su taumata ṛingidda mapia, nilumebbe wuassu manu'a wuṛṛu winatangnga su runia.

¹² Manga taumata niallangnga i tou ma'ial᷊are, arawe Ruata mal᷊annabba ana waugu i mangitou lal᷊eo wuṛṛu napenen awawunga.

¹³ Tawe gunane i mangitou mangngintul᷊i ma'ikka-ikkatta; Apan Lembontaṛṛino tawe maasilo ara'e maaringikka si mangitou.

¹⁴ Ayub, nangillembote lai amungkangngu i'o mabbisara manungku tawe naasilo si Tou, manungku hattonu uddete su saruan-Ne wuṛṛu i'o uaṛṛaddo si Tou!

¹⁵ Su sunnanu Ruata tawe makkuumanna wuṛṛu tawe manutukka pallal᷊awangnga.

¹⁶ Tawe gunane i'o manassu wisaranu; nasemakke, i'o wagga apa apan iwabbisara'u.