AYUB 33 - WUKE SUSI WATTI'U AL᷊AL᷊USASSA

¹ Orassa indi, ei Ayub, paddaringikke ringannu mapia-pia manga wisara'u apan ta'u iapasingkatta indi.

² I ya'u nasaddiate mappulute mabbisara.

³ Ringannu naungnga mal᷊uassa i ya'u mabbisara; apan ta'u niwisara udde ṛinone.

⁴ Ghaṛṛahon Duata buatte nandiaddi si ya'u wuṛṛu nangonggollu wiakka si ya'u.

⁵ Nariaddi, amungkangngu wotongnge, simbakke si ya'u. Isaite mananambaanu.

⁶ Su Ruata, i'o wuṛṛu i ya'u tawe paṛṛalane wuassu leta'a abbi iaddua niolang-Nge.

⁷ Nariaddi, ariete i'o matau'u; i ya'u tawe pandumma mamaddonu.

⁸ Ne, i ya'u buatte naaringikka apa apan iwabbisaranu, wuṛṛu i ya'u naasunnate apa pandumannu.

⁹ I'o mabbisara, ‘I ya'u waresi, tawe na'ola'a pasasal᷊a. I ya'u tawe sangkulle wuṛṛu tawe na'ola'a pasasal᷊a.

¹⁰ Arawe Ruata sidutu maddea'a pangiananne lumawangnga si ya'u, wuṛṛu i ya'u niolang-Nge ere seetta.

¹¹ I tou nama'issu ṛate su ledda'u; wuṛṛu ua'ellega al᷊awo'u lempangku.’

¹² Ei Ayub, addapannu nassal᷊a atonna! Waugu Ruata maggewal᷊anna wuassu taumata.

¹³ Anio i'o mammaṛṛansilla Ruata manungku i Tou tawe maddaringikka sasal᷊iomannu taumata?

¹⁴ Ruata mabbisara ringannu manambo olangnge, arawe tawe saran sangkatou maddaringikka wisara-Ne.

¹⁵ Tantal᷊anna taumata mattiilla mal᷊angnga sutempo ṛabbi, Ruata mabbisara sulal᷊ummu wal᷊iawa wuṛṛu sondappa.

¹⁶ Ruata nandolokki mangitou niapararingikka; I Tou namaṛṛindu'a si mangitou ringannu manga tataggu.

¹⁷ Panduman-Ne tadea'u i mangitou mangillol᷊on paaola'a rosa, wuṛṛu manantangngu awawungan mangitou.

¹⁸ Tawe niwala-Ne i mangitou maapendamma papate; niluaran-Ne i mangitou wuassu papate.

¹⁹ Ruata namo'a taumata apan mangngapiddu radda'a na'oman sara waddangnga napenen atataddu'a.

²⁰ Iapa maradda'a niawul᷊iannu apulu umanna, anna apan atemanganne lai maamuta.

²¹ Waddangnga nabbal᷊i maṛṛasa-ṛasa, manga duṛṛine iaasilote abbi.

²² I tou maraniten mapul᷊e su runia tawe panguddusanne runian taumata nate maraniten tou.

²³ Asinungka sambau suwallattu saṛṛiwu mala'ekattu Ruata apan mapanaungngu taumata su ola'u manarane, sarun dumanta mantul᷊ungngi tou.

²⁴ Ringannu u'akkanna mala'ekatta udde sarun mabbisara, ‘Pallosa'e i tou, tawe wotongnge i tou sumossokka su runian taumata nate. Indite roitta tatubbunne, tadea'u i tou mapallossa apia.’

²⁵ Waddangnge sarun maola'a matohassa ma'uatta ere taumata saṛṛentumuwo.

²⁶ Napawe i tou umal᷊iomanna, Ruata sarun umakkanne, ne i tou sarun maddalo Ruata ringannu lullala'a wuṛṛu Ruata sarun mamelengngu lal᷊umannangnge.

²⁷ Ne su saruannu awadaalla i tou sarun mabbisara, ‘Iapa lal᷊eo sassunnangku mapia, ahewallawe eteapa rosa'u, arawe Ruata tawe makkuumangku.’

²⁸ Ruata naninga'u inai su runian taumata nate, na'oman sara i ya'u ta'e wiakka naddatingngu orassa indi.

²⁹ Ringannu masokka-sokka, Ruata buatte na'ola'a sarangkanambone indi,

³⁰ tadea'u i Tou wotongnge manal᷊amatta taumata wuṛṛu mangonggollu lal᷊umanna'a sulal᷊ummu pabbiaṛṛanne.

³¹ Ne paddaringikke Ayub, tainga'e tal᷊inganu paal᷊annabbe, orassa indi tumba'u i ya'u apan mabbisara.

³² Arawe amungkangngu piaddu iwisaranu, pabbisarate; wuṛṛu napawe i'o naṛṛino, i ya'u mal᷊uassa manga'u udde.

³³ Arawe amungkangngu tawe, paal᷊annabbe wuṛṛu paddaringikke si ya'u, i ya'u manantiroten asingkatta si'o.