AYUB 32 - WUKE SUSI WATTI'U AL᷊AL᷊USASSA

Manga wisaran I Elihu

¹ Ana waugu i Ayub mangngimanna atonna su atatul᷊iddu ririne, ne siri tallu hawene udde maddiri sumimbakka si tou apia.

² Arawe isudde pia sangkatou aranne i Elihu ana'i Berakheel, sangkatou papapulunni Bus wuassu ṛuanganni Ram. I tou tawe naṛṛaddannu asasa'une, waugu i Ayub napaṛṛinon batanganne sassane, wuṛṛu mappasal᷊an Duata.

³ I tou lai massa'u su siri tallu hawen Ayub udde ana waugu i mangitou maasimbakka manga wisaran Ayub, salaiwe i mangitou mapasal᷊ane.

⁴ Elihu taumata arario'anne suwallatti mangitou, ana waugu udde i tou uaṛṛaddo ma'oman sara sarangkanambone buatte mabbisara.

⁵ Napawe naasilo manungku siri tallu udde tawe naasimbakka, i tou nabbal᷊i nasa'u,

⁶ wuṛṛu nabbisara arendi, “I ya'u ta'e dario'a, arawe i yamiu timmaddete, ana waugu udde i ya'u matta'utta wuṛṛu uapapaddua mapasabbangngu addapa'u.

⁷ Ṛingi'u, ete i yamiu apan ṛinone mabbisara, iapa atimmaranne ṛinone mattahia asingkatta.

⁸ Arawe apan nangonggollu asingkatta su taumata, tumba'u Ghaṛṛahon Duata Apan Lembontaṛṛino.

⁹ Taumata mabbal᷊i pande, wal᷊ine ana waugu uukke mal᷊o'engke; taumata maasunna apan naṛṛino, wal᷊ine ana waugu matanggakke uukke.

¹⁰ Ana waugu udde, paddaringikke si ya'u; wala'awe i ya'u mapasabbangngu addapa'u.

¹¹ Ringannu sabbare i ya'u maddaringikka sutempo i yamiu mabbisara, wuṛṛu uaṛṛaddo napawe i yamiu maddea'a manga wisara apan mapia.

¹² Mangke a'innunuangku ringannu maannudda; i ya'u naaringikka i yamiu naasomba sal᷊are. Pasasal᷊a sulal᷊ummu manga wisaran Ayub i yamiu tawe maatiala.

¹³ Ereapa i yamiu wotongnge mabbisara manungku asingkatta buatte niasombanganni yamiu? Ana waugu i yamiu panginsueanne nawaddote. Apan wotongnge sumimbakka si Ayub tumba'u Ruata.

¹⁴ Ete si yamiu i Ayub mabbisara, wuṛṛu wal᷊ine si ya'u, arawe i ya'u tawe sumimbakka ere si yamiu.

¹⁵ Ayub, i mangitou tuttiangnga wuṛṛu tawe maasimbakka; taweddu apan wotongnge i wisaran mangitou.

¹⁶ I mangitou tumba'u uarisikka, tate maawisara apia. Ṛinonewe i ya'u maṛṛaddo salaiwe i mangitou mal᷊annabba?

¹⁷ Tawe, orassa indi i ya'u sumimbakka; addapa'u sarun iapasingkatta.

¹⁸ I ya'u tawe lai masabbare uaṛṛaddo. Tate lai ataṛṛanganna manga wisara'u.

¹⁹ Amungkangngu i ya'u sidutu uatinnannangnga, sarun mapesangnga i ya'u, naal᷊ihidda pato'a apan napenen anggore wakku.

²⁰ I ya'u ṛinone mabbisara, tadea'u naungku matammudda; i ya'u ṛinone mamu'a moṛṛongku wuṛṛu sumimbakka.

²¹ I ya'u tate lai manamba'a sulal᷊ummu patatatiakka indi wuṛṛu tawe saran sangkatou apan ta'u raloanna.

²² Ola'u ereapa maddalo, i ya'u lai wagga, wuṛṛu unnuwisara udde olaangku, Ruata sarun mal᷊ihakka makkuumangku.