AYUB 31 - WUKE SUSI WATTI'U AL᷊AL᷊USASSA

¹ Ringannu sasalu i ya'u buatte naddiandi maṛṛuala wakku tawe aellehangku ringannu paapulu.

² Apate apan niola'u Ruata su saruanni ite? Ereapa i Tou nabbal᷊issa pallal᷊aghun taumata?

³ Silaka wuṛṛu asasusa sarun iaparantan Mawu su taumata apan ma'ola'a al᷊al᷊eo!

⁴ Ruata sarun masingkattu al᷊awo'u inolaangku; I tou maasilo al᷊awo'un lempangku.

⁵ I ya'u massalu manungku taambe saran paassa nallinga taumata; taambe saran paassa lai i ya'u mangngawusu taumata.

⁶ Wala'ewe Ruata manimbangku su tatimbanganna apan mapia, ne i Tou sarun masingkatta manungku i ya'u tawe sal᷊ane.

⁷ Unnuwisara i ya'u buatte sinumewadda wuassu lal᷊anna apan naṛṛino, ara'e naungku ninumemman al᷊al᷊eo, napawe lima'u nappeta'u rosa,

⁸ ne wala'e taumata waine umanna anna apan ta'u niasi'a, wuṛṛu anambon inasaharangku maṛṛimunsa'a.

⁹ Unnuwisara i ya'u buatte ninumemman awingngu al᷊indongangku, wuṛṛu ringannu ma'imbuni, i ya'u mallinge si tou wuassu samba'an ngara,

¹⁰ ne wala'e awingku mallaha wiakku taumata waine; wala'e i tou lumallowangnga su tattereannu esakka waine.

¹¹ Napawe rosa apan lal᷊eo udde atonna niola'u, i ya'u ṛinone manengkamma ṛuumanna.

¹² Rosa udde maapate ere putungngu naraka, sarangkanambone apan tatahuanangku nasue nisoṛṛobbe.

¹³ Napawe allangku sussal᷊iomanna waugu pussa'ane niapala'u, i ya'u naddaringikka si tou wuṛṛu a'olaangku ringannu naungnga matul᷊idda.

¹⁴ Amungkangngu tawe, ereapate ṛinone i ya'u sumaruanna Ruata? Apa sasimba'u sutempo i Tou rumanta makkuungnga si ya'u?

¹⁵ Wal᷊inewe Ruata apan nandiaddi si ya'u, nandiaddi lai manga allangku udde?

¹⁶ Taambe saran paassa i ya'u maddiri mantul᷊ungngu taumata asiangnga, ara'e namalan manga wawine wal᷊u mabbiakka tawe antimma.

¹⁷ Taambe saran paassa i ya'u namalan asisitimpal᷊ussa niamal᷊unusanna, tantal᷊anna i ya'u sassane pia anna natimu.

¹⁸ Ro'en ta'e maradio'a i mangitou papadul᷊ianangku; su al᷊o'engngu pabbiaṛṛangku i ya'u ua'ehetta si mangitou.

¹⁹ Napawe i ya'u maasilo taumata apan su awussa, tumaniten asiangnga na'oman sara tate maawalli laubba,

²⁰ i ya'u mannal᷊ihangnga si tou ringannu nasa wolla wuassu domba'u sassane, ne i tou sarun maddalo si ya'u ringannu ahewallu naungnga.

²¹ Unnuisara i ya'u buatte nangallangnga asisitimpal᷊ussa, ana waugu mangngimanna hatto'u sarun maauntungnga,

²² ne wala'ewe ta'iakka ruan ba'a mapaddi na'oman sara mattal᷊ei wuassu wambangku.

²³ I ya'u sarun tawe ma'ola'a aroddi, ana waugu ṛuumannu Ruata tumaniten maata'utta naungku.

²⁴ Taambe saran paassa i ya'u mangngasakku darotongku,

²⁵ ara'e mammungan paa'ala'u.

²⁶ Taambe saran paassa i ya'u nassubba matannallo lukkena masemakka ara'e wul᷊anna apan semakke maṛṛamagga.

²⁷ Taambe saran paassa i ya'u ninumemmane, ara'e i ya'u nangari'a limane ipangaddatta si tou.

²⁸ Rosa ereudde ṛinone maasomba ṛuumanna pateanna; ana waugu Ruata Apan Lembontaṛṛino buatte nissinaadda.

²⁹ Taambe saran paassa i ya'u lulluassa ana waugu see'u uatataṛṛangnga, ara'e lullala'a ana waugu i tou naasomba asasilaka.

³⁰ I ya'u tawe umal᷊iomanna su papaten see'u; taambe saran paassa i ya'u na'ola'a rosa ereudde.

³¹ Manga taumata apan mammanara ringangku masingkatta, manungku suapan taumata ta'u saruanna su wal᷊e'u.

³² Wal᷊e'u wawu'anna su taumata apan sussal᷊ele; taambe saran paassa i mangitou niwala'u mattiilla su lal᷊anna.

³³ Taumata waine mamunin dosane, arawe i ya'u taambe saran paassa na'ola'a ere i mangitou.

³⁴ I ya'u tawe mata'uttu addapattu awadaalla, wuṛṛu aal᷊uandagu taumata, tawe pandumangku. Taambe saran paassa i ya'u natana'a su wal᷊en ara'e uatinnannangnga aroddi, ana waugu tumba'u matta'utta aal᷊uandahanna.

³⁵ Apa tawe taumata apan maapulu maddaringikka manga wisara'u? I ya'u massalu manungku naṛṛinote sarangkanambone udde. Antimanna Apan Lembontaṛṛino sumimbakka si ya'u. Unnuwisara aalaen seetta si watangangku mawoṛṛetta abbi ma'oman sara i ya'u lai maasilo,

³⁶ ne ringannu lullala'a sarun iandangnga su wambangku, wuṛṛu maola'a mahkota iaddo su pua'u.

³⁷ I ya'u sarun mamasingkatta su Ruata sarangkanambone apan ta'u niola'a; I tou sarun ta'u saruananna ringannu lullala'a wuṛṛu pua uatingngara.

³⁸ Unnuwisara leta'a pappajekoangku piaddu nanna'o, wuṛṛu ta'u aṛṛoana wuassu tatahuanne tutune,

³⁹ unnu wisara hessine nasue ta'u nianna, wuṛṛu mabbawailla apan nassuanna niwala mal᷊unussa,

⁴⁰ wala'ewe wal᷊ine jelai ara'e gandumma apan tumuwo su wailla, arawe ete nannal᷊o ṛoanna wuṛṛu akke.” Nasuete isindi manga wisaran Ayub.