AYUB 29 - WUKE SUSI WATTI'U AL᷊AL᷊USASSA

Panga'uanni Ayub panginsueanne su ola'u hattone

¹ Ayub nanassute tatal᷊aane, wisarane,

² “Antimanna wia'u mabbelengnga ere paarorone, sutempo Ruata ual᷊u'adda si ya'u.

³ I Tou sidutu mangnggollu aontolla si ya'u, I Tou sidutu mannemakka si ya'u sutempo u'amatta sulal᷊ummu ararandumma.

⁴ Eteudde manga allo apan i ya'u tinumelengnga, sutempo apapian Duata uasirungnga wal᷊e'u.

⁵ Sutempo udde, Apan Lembontaṛṛino ta'e uaringanna si ya'u, wuṛṛu manga ana'u uapal᷊iwutta si ya'u.

⁶ Winatangnga papadul᷊iananna manambo mangngonggollu susu si ya'u. Manambo lana apan niapasabbangngu manga punnu zaitun, salaiwe nisuanna su leta'a annalanne.

⁷ Napawe manga matatimmaddu soa ua'ianna suadio'a, wuṛṛu i ya'u niuma'ianna suwallatti mangitou,

⁸ mannewekke manga dario'a, napawe i mangitou naasilote si ya'u. Wuṛṛu lai manga matatimmadde nabbuatta ringannu piane; tadea'u mangaddatta si ya'u.

⁹ Ewe'e lai manga tembonanne nangillol᷊o mabbisara,

¹⁰ wuṛṛu ingana'a piaṛṛangnga lai tate mabbisara.

¹¹ Salaiwe isai sarun tumiangnga amungkangngu maaringikka ola'u watangangku; isai apan maasilo si ya'u, maddalo inasaharangku.

¹² Waugu, i ya'u nantul᷊ungngu taumata asiangnga apan ma'isumbala; i ya'u nassumbala asisintimpal᷊ussa apan taweddu mappadul᷊i.

¹³ I ya'u raddaloannu taumata apan tumaniten massusa, i ya'u natul᷊ungngu wawine wal᷊u na'oman sara i mangitou matammudda.

¹⁴ Inolaangku matul᷊idda tawe sangkulle; i ya'u sidutu mannahekku atatul᷊idda.

¹⁵ Su taumata wuta, i ya'u naola'a matane; su taumata lome, i ya'u naola'a leddane.

¹⁶ Su taumata asiangnga, i ya'u naola'a iamangnge; su taumata raho, i ya'u naola'a mananambaane.

¹⁷ Arawe taṛṛinon taumata maṛṛagissa, nipaddi'u, wuṛṛu sasamban mangitou papadul᷊ianangku.

¹⁸ Antimangku eteudde maal᷊al᷊appa uukka apan matanggakka, wuṛṛu mate ringannu matammudda su wal᷊e'u sassane.

¹⁹ I ya'u naal᷊ihidda aal᷊uanna apan masuwukka tatuwone, ṛamutta ua'ene natimu wuṛṛu wal᷊angngukka maṛṛolo rannane.

²⁰ I ya'u sidutu raddaloannu anambon taumata, wuṛṛu taambe saran paassa atatoha'u nahaingnga.

²¹ Manga taumata mal᷊annabba, napawe i ya'u mangonggollu tatantiro; anambon bisara'u raringiṛṛanni mangitou ringannu maaddunna.

²² Napawe i ya'u buatte nabbisara, tateddu lai ipanamba; wisara niumusippa ere ua'en uranna tinumuro.

²³ Anambon taumata mannengkamma wisara ringannu mal᷊uassa, naal᷊ihidda mabbawailla mannal᷊oho uranna sutempo makkuangnga.

²⁴ I ya'u umamminna si mangitou sutempo i mangitou tate antimma; hati'u apan mal᷊uassa naatamba atatohassi mangitou.

²⁵ Etea i ya'u apan uaagassa piaṛṛangnge, wuṛṛu manantunnu al᷊awo'u laṛṛawessa. I ya'u namiaṛṛa'i mangitou naal᷊ihidda ratu su tangngan tantarane, wuṛṛu i ya'u nallimbatta si mangitou sulal᷊ummu asasusane.