AYUB 28 - WUKE SUSI WATTI'U AL᷊AL᷊USASSA

Daralo su asingkatta

¹ Pia paal᷊ianna isudde sal᷊a'a niasombanganna; pia tampa isudde wul᷊awanna wabbaresianna.

² Atta'a aal᷊ianna wuassu lal᷊ummu leta'a; wuassu watu niapa'uno witu'a.

³ Ararandumma apan basa tuudda aal᷊ewesanna, tampa apan al᷊al᷊umanne nisaṛṛasiranna. Isudde, sulal᷊ummu ararandumma, taumata maddea'a manga watu.

⁴ Marau su tampa apan tawe mamanuane, apan taambe niṛṛindanna wuṛṛu niamatanna, taumata mammanara wuṛṛu pasi tungkele su tal᷊i sulal᷊ummu loṛṛangnga apan mal᷊annabba.

⁵ Leta'a mangngonggollu wiakka su taumata, arawe sulal᷊ummu leta'a udde lai, sarangkanambone nial᷊isangnga na'oman sara lal᷊oṛṛon dunia nassal᷊iawukka.

⁶ Watu sulal᷊ummu leta'a pia lal᷊oṛṛone watu maarega, wuṛṛu awune lal᷊oṛṛoannu wul᷊awanna tutune.

⁷ Manu'a asiaṛṛe waggan dal᷊anna inai poiaroddi, wuṛṛu manu'a asiaṛṛe taambe tinumalla'a rosone.

⁸ Taambe saran paassa singa ara'e winatangnga mal᷊aṛṛaga waine sinumabbi su lal᷊anna mal᷊annabba apan matudda poiaroddi.

⁹ Taumata maal᷊i watu salaiwe aatikke ereapa, i mangitou nanongkakku wowone naddatingngu ṛamunne.

¹⁰ Sutempo i tou maal᷊i loṛṛangnga sulal᷊ummu wowone watu, i tou naasomba permata apan maarega.

¹¹ Naddatingngu manga punnu sal᷊ukka i tou maal᷊i, ana see naasi'attu apa apan uawuni.

¹² Arawe suapa asingkatta wotongnge asombanganna? Suapa i ite wotongnge maasi'ol᷊a tadea'u maasunna?

¹³ Asingkatta tawe su pattangngannu taumata; taweddu maasingkattu aregane apan atonna.

¹⁴ Manga wantan tahal᷊oangnga wuṛṛu laudda mabbisara manungku asingkatta tawe si tou.

¹⁵ Asingkatta tawe asal᷊iuanna salaiwe ringannu wul᷊awanna tutune, wuṛṛu ringannu sal᷊a'a lai tawe maawalli.

¹⁶ Wul᷊awanna wuṛṛu permata apan maarega tawe maasul᷊ungnga aregane.

¹⁷ Wul᷊awanna ara'e kaca al᷊ussa tawe maasul᷊ungnga udde, tawe awaeṛṛannu tampan bunga wul᷊awanna.

¹⁸ Asingkatta marau lembon mattanggaṛṛanna aregane wuassu manga ino maṛṛamutta, kaca al᷊ussa ara'e mutiara.

¹⁹ Watu permata maririkka apan tutune wuṛṛu wul᷊awanna tutune, mabbawoanna aregane pallal᷊agu.

²⁰ Suapate punnu asingkatta? Suapate i ite maasomba pasasunna?

²¹ Tawe inariaddianna apan biakka buatte naasilo udde, sara manu'a su winalanganna taambe lai naasilo udde.

²² Papate wuṛṛu asasilaka lai mabbisara, i mangitou lai tumba'u maaringikka sasil᷊imburungnga.

²³ Tumba'u Ruata apan masingkattu tampan asingkatta udde, tumba'u i Tou masingkattu lal᷊anna inai poiaroddi,

²⁴ ana waugu i Tou maasilo manga pentakku runia; al᷊awo'a su al᷊ungngu langitta aellehanne.

²⁵ Sutempo i Tou nangonggollu auatanna su anginna, wuṛṛu i Tou nanantunnu manga passarannu tahal᷊oangnga;

²⁶ sutempo i Tou nanantunnu tampan uranna mangansalla, wuṛṛu lal᷊anna apan amatannu sawallo wuṛṛu rallu'a;

²⁷ sutempo udde i Tou maasilo asingkatta, i Tou naannammu aregane, wua'udde i Tou nangonggollu al᷊aman-Ne.

²⁸ Ruata nabbisara su taumata, “Tadea'u maasomba asingkatta, ṛinone i yamiu mangaddatta Ruata. Tadea'u wotongnge maasunna, i yamiu ṛinone mangindaun al᷊al᷊eo.”