AYUB 27 - WUKE SUSI WATTI'U AL᷊AL᷊USASSA

I Ayub

^1-2 I Ayub nanassu tatal᷊aane, wisarane, “Ringannu arannu Ruata apan wiakka, apan tawe nangonggollu atatul᷊idda si ya'u,

³ i ya'u nassal᷊u: Tantal᷊anna Ruata ta'e mangngonggollu sasangngo si ya'u, tantal᷊anna niawa ta'e sulal᷊ummu waddangku,

⁴ wiwi'u tawe managgon manga wisara awusu, lila'u sarun tawe mabbatti'u manga wawahia.

⁵ Nariaddi, i ya'u maddiri mabbal᷊onu manungku i'o naṛṛino; ma'oman sara nate lai i ya'u mabbal᷊o manungku i ya'u tawe sangkulle.

⁶ I ya'u sidutu uaaggassa su tatuṛṛu'u, wuṛṛu lal᷊ummu naungku sidutu waresi.

⁷ Antimanna see'u iṛṛuumanna ere taumata mal᷊awangnga, wuṛṛu ro'a'u heseranna ere taumata lal᷊eo.

⁸ Piawe antimma su taumata lal᷊eo sutempo Ruata maddorongnga niawane?

⁹ Apa Ruata sarun maddaringikka lal᷊uaine napawe asasusa maṛṛia'a si tou?

¹⁰ Ṛinone i tou ṛumintulun lal᷊umanna'a wuassu Ruata, wuṛṛu umal᷊iomanna si Tou ringannu tawe illol᷊one.

¹¹ I yamiu sarun ta'u aṛṛaannu ahewallu taṛṛinon Duata, i ya'u mamasingkatta si'o ṛiinnu Apan Lembontaṛṛino.

¹² Arawe, i yamiu sarangkanambone buatte naasilo sassane. Nariaddi, anio i yamiu nangonggollu tatantiro apan tawe mangal᷊ene?”

I Zofar

¹³ Ne i Zofar nabbisarate, “Etearendi atokku Ruata Apan Lembontaṛṛino makkuumannu taumata mal᷊aṛṛaga wuṛṛu mapontol᷊osanna.

¹⁴ Amungkangngu anangnge manambo, i mangitou sarun mate sulal᷊ummu pangalo wuṛṛu ana'a papapulunne sarun mabbiakka sulal᷊ummu awussa.

¹⁵ Ana'u tuṛṛangnge apan ta'e wiakka, mate ana waugu saiddalu, wuṛṛu wawine wal᷊u sarun tawe lumuain mangitou.

¹⁶ Wotongnge lai sal᷊aane uawombo wuṛṛu laungnge pasi al᷊isansunna,

¹⁷ arawe sal᷊a'a wuṛṛu laubba sarangkanambone udde sarun maola'a pussa'an taumata apan naungnge matul᷊idda.

¹⁸ Wal᷊en taumata lal᷊eo ṛenessa ere sal᷊akku al᷊imbuwutta, tumba'u wal᷊en pangintal᷊anna ere sabbua sangkatou mandariaga.

¹⁹ I tou lullallowangnga naal᷊ihidda taumata ala, arawe i tou tawe mapamelengnga apia, sutempo i tou matimpu'o wuassu matiilla, nawul᷊i nahangginna paa'alane.

²⁰ Atata'utta nirumanta naal᷊ihidda nanawangnga labbangnga nirumanta namaṛṛoro. Anginna ma'ikkatta sutempo ṛabbi tinumiuppa wuṛṛu nangapiddi tou inai.

²¹ Anginna ra'i nanalla'i tou, wuṛṛu nanahangginna wuassu wal᷊ene.

²² I tou niaṛṛiaanne ringannu tawe aakkanne, wuṛṛu naal᷊are tinumal᷊angnga naddea'a pattilummanna.

²³ Ananawone nisal᷊ohoannu taumata ringannu tatal᷊o'appa; suapan tampa i tou naasomba aal᷊uandaga.”