AYUB 24 - WUKE SUSI WATTI'U AL᷊AL᷊USASSA

¹ Anio Ruata tawe nanantunnu allo pakkuunganna, tadea'u manga taumata apan masingkan-Ne maasomba atatul᷊idda?

² Pia manga taumata apan mannesse'u passaranna, tadea'u letangnge mabbal᷊i wahewalla. I mangitou manna'o ammul᷊annu domba, wuṛṛu nitaṛṛu su kandangngu domban mangitou.

³ Keledai tatahuanannu asisin timpal᷊ussa, tinal᷊angngi mangitou; sapin sangkatou inawal᷊uanna, nianun mangitou maola'a wataṛṛu.

⁴ I mangitou mannal᷊are taumata asiangnga maasomba wuanne, ne naal᷊are na'imbunite taumata masa'ina.

⁵ Nariaddi, i asiangnga udde naal᷊ihidda keledai lul᷊u apan maddea'a anna su wadda'u anggaṛṛumunanne; tumba'u su manga tampa udde lai pia anna ionggolla su manga anangnge.

⁶ Wawail᷊annu taumata waine naalal᷊e nimanarane; wuan anggoru taumata lal᷊eo ṛinone i tou mangammulla.

⁷ I tou tawe uatahuanna nasa wuṛṛu laubba, ipanal᷊ihangnga wadangnga sutempo ṛabbi.

⁸ I tou naṛṛolon uranna masaddatta su wowone, ana see nangunsalle'a su wowone watu tadea'u massirungnga.

⁹ Taumata apan mangngallangnga ana'a apan tawe hagurangnge, wuṛṛu nanganu ana'a addio'a wuassu taumata asiangnga apan pia awallassa si tou.

¹⁰ Taumata asiangnga niumamatta tawe laungnge; i tou mal᷊unussa tantal᷊anna mangngitingnga gandumma su wailla.

¹¹ Wuassu zaitun i tou nanaṛṛitta lana wuṛṛu wuassu wuan anggore, na'ola'a inumanna, arawe i tou sassane mangke tumaniten marou.

¹² Su manga soa aaringiṛṛanna aintul᷊in taumata maraniten mate, manga taumata nal᷊essa u'ui maddorongnga maiundamma, arawe Ruata tawe maddaringikka aal᷊iomanni mangitou; I tou maddiri mappandumma.

¹³ Pia manga taumata apan mannol᷊a'u asasemakka wuṛṛu ma'isaseenne, i mangitou ma'ielembaga wuṛṛu tawe tumuṛṛutta dal᷊anne.

¹⁴ Sutempo maraninnallo i taṛṛa pate nabbangunna wuassu atatiille, wua'udde sinumabbangnga wuṛṛu namate taumata asiangnga, wuṛṛu tantal᷊anna taambe maruaallo, i tou mangngal᷊oto'a naal᷊ihidda manana'o.

¹⁵ Iapa masandaga uaṛṛaddo wawallo; i tou nattatindungnga tadea'u taumata tawe maaillal᷊a si tou.

¹⁶ Manana'o nanggohakku wal᷊en sutempo ṛabbi; sutempo allo i tou mallinda'u semakka wuṛṛu ma'imbuni.

¹⁷ Si tou, ruaallo tumaniten maata'utta, arawe wasa tuudda, maal᷊uassa.”

I Zofar

¹⁸ Wua'udde i Zofar nabbisara, “Taumata lal᷊eo nielekku manawangnga wahewalla, leta'a tatahuananne niwontohannu Ruata; waillu anggorene orassa indi mal᷊annabbe; tate lai mamamanara isudde.

¹⁹ Naal᷊ihidda salju nawul᷊i niatarangannu paddissa wuṛṛu matannallo, etearoddi taumata marosa nialluppa su runian taumata nate.

²⁰ Inangngene sassane naabul᷊iten tou, wuṛṛu manga ul᷊idda niuminassa watanganne. Aranne tate lai naunganna; i tou niinsue naal᷊ihidda alu apan nasuatta.

²¹ Sarangkanambone udde nariaddi waugu i tou mannansara manga wawine wal᷊u, wuṛṛu tumaniten maṛṛagissa su inangnga apan tawe anangnge esakka.

²² Arawe Ruata, ringannu taṛṛino-Ne nallimbuakka taumata matohassa. Ruata na'inolaanna, ne natete taumata lal᷊eo.

²³ Ruata nangonggolla si tou wiakka su lal᷊umanna'a, arawe ual᷊u'adda si tou tawe illol᷊one.

²⁴ Tumba'u tal᷊ang kadio'a i tou mabbiakka su lal᷊umanna'a, arawe wua'udde nanantangken saran mal᷊annu-l᷊annu. I tou tinumolangnga naal᷊ihidda nannal᷊o apan tawe gunane; naal᷊ihidda raeng kamme apan niitingnga wuassu alune.

²⁵ Isai apan wotongnge massinaaddu olangnge udde, ara'e manongga atatul᷊iddu wisara'u?”