AYUB 23 - WUKE SUSI WATTI'U AL᷊AL᷊USASSA

I Ayub

^1-2 Arawe i Ayub sinumimbakka, “I ya'u ma'ial᷊are wuṛṛu sussal᷊iomanna su Ruata; i ya'u tawe maaṛṛaddannu auare'u.

³ Ah, addonganne i ya'u masingkaku tampa atatanaan-Ne, tadea'u i ya'u wotongnge inai maisasomban Tou.

⁴ Ne ete si Tou hatto'u indi iapidda, wuassu moṛṛongku sussabbangnga manga wisara ipannahekka.

⁵ I ya'u maapulu maasingkatta apate apan sarun iwisara-Ne, wuṛṛu ereapa i Tou mangonggollu sasimbakke.

⁶ Apa i Tou sarun mapaamattu taṛṛino-Ne si ya'u? Tawe! I Tou sarun maddaringikka manga wisara'u.

⁷ I ya'u tawe sal᷊ane wuṛṛu wotongnge manahekku watagangku su saruan-Ne, ne i ya'u sarun iwal᷊o napallossa saran mal᷊annu-l᷊annu.

^8-9 Niareaangku Ruata su samba'a ra'i, waṛṛatta, timukka, sawannakka, arawe su al᷊awo'u tampa Ruata tawe gaddi'a; wuṛṛu i ya'u tawe naasangkalla si Tou.

¹⁰ Arawe i Tou masingkattu anambon dal᷊angku wuṛṛu suapan lempangku. Amungkangngu ere wul᷊awanna i ya'u iannamma, sarun asingkattanna manungku naungku waresi.

¹¹ I ya'u matuṛṛutta si Tou ringannu maaddunna, tawe saran paassa i ya'u sinumewadda wuassu lal᷊anna apan tinantun-Ne.

¹² Manga parentan Duata sidutu tattuṛṛutangku, apulu-Ne daringiṛṛangku, wuṛṛu wal᷊ine apulu'u sassane.

¹³ Ruata udde tawe mawal᷊u, taweddu maal᷊awangnga si Tou. I Tou ma'ola'a sarangkanambone apan ipaapulu-Ne.

¹⁴ I tou sarun mapaamattu ṛiin-Ne si ya'u, wuṛṛu ta'e manambo lai ṛiin-Ne waine.

¹⁵ Ana waugu matta'uttu Mawu, i ya'u mangngiladda; mangkiṛṛingi'u sarangkanambone udde, aatambate lai atata'u.

^16-17 Apan Lembontaṛṛino nakkimunsa'a al᷊awo'u awawaṛṛani'u. I ya'u matta'utta ana waugu Ruata, wuṛṛu wal᷊ine ana waugu ararandumma, salaiwe ararandumma udde uapal᷊iwutta si ya'u, wuṛṛu uataappa hati'u.