AYUB 2 - WUKE SUSI WATTI'U AL᷊AL᷊USASSA

I Mamamono'a namono'a apia si Ayub

¹ Manga riadianna su surga sinumaruanna Mawu apia, wuṛṛu i Mamamono'a isudde lai suwallatti mangitou.

² Ne Mawu naiwal᷊o si tou, “Wuassuapa i'o?” I Mamamono'a sinumimbakka, “Wuassu amatanna mammal᷊intaddu runia.”

³ Mawu naiwal᷊o, “Apa i'o buatte nanutukka allang-Ku i Ayub? Su ahewallu runia tawe taumata aroddi atuṛṛunne wuṛṛu naungnge mapia ere i tou. I tou massubba si Ya'u wuṛṛu tawe saran paassa na'ola'a al᷊al᷊eo. I tou ta'e uatatana'a satia si Ya'u, salaiwe i'o buatte nassal᷊o-U manilaka si tou ringannu tawe pinangiananne.”

⁴ Arawe i Mamamono'a sinumimbakka, “Niawa wuṛṛu apapian baddangnge maareganna wuassu darotongnga. Taumata wotongnge manantillu anambon tatahuananne sawal᷊iate i tou sidutu wiakka.

⁵ Unnuwisara i tou sansaran-Nu, i tou sarun apiddu mamontoga Si'o!”

⁶ Ne Mawu nabbisarate si Mamamono'a, “Aroddite, walate i'o ma'inolaanna si tou, sawal᷊iate arie pappate i tou.”

⁷ Ne i Mamamono'a inaite wuassu saruannu Mawu, wuṛṛu napatuwon hanne su ahewallu awa'i Ayub wuassu pal᷊addu ledda maddatingngu tatuwonanne.

⁸ See i Ayub niuma'ianna maranin undu'u sapadda wuṛṛu nanganu pesangngu saṛṛuminanna ipaaṛṛo wadangnge.

⁹ Awingnge nabbisara si tou, “I'o ta'e lai satia su Ruata? Otte wontehete I tou, ana see i'o atete!”

¹⁰ Sasimbakki Ayub, “I'o mabbisara naal᷊ihidda taumata longonna! Ṛatadde i ite tumba'u mappulu manengkamma apa apan apianne wuassu Ruata, wuṛṛu al᷊eoanne i ite maddiri?” Nariaddi, salaiwe i Ayub uapasanna anambon asasilaka udde, i tou tawe mapasabbangngu wisara apan lullawangnga Ruata.

Manga hawen i Ayub nirumanta

¹¹ Asasilaka apan naṛṛia'a si Ayub niaringiṛṛanten hawene siri tallu, eteudde i Elifas wuassu soa Téman, i Bildad taumatan Suah wuṛṛu i Zofar taumatan Naamah. I mangitou na'ire inai mattembo wuṛṛu mappaal᷊uassu naungnge.

¹² Arawe ro'en ta'e marau i mangitou tallu naasilote si tou, i mangitou ete addio'a tate maaillal᷊a lai si tou. I mangitou nilumuai ringannu ma'ikkatta wuṛṛu nanggesa'a laubbi mangitou see nangalassu awu su winalanganna wuṛṛu su pua.

¹³ Pitu allo pitu ṛabbi i mangitou ua'ianna su leta'a, su sandiṛṛanni Ayub, ringannu tawe nabbisara saran sampaddi, ana waugu i mangitou ma'ellega tumaniten mawakkatta asasusane.