AYUB 18 - WUKE SUSI WATTI'U AL᷊AL᷊USASSA

I Bildad

^1-2 Ne sasimbakki Bildad, “Ei Ayub, tingngerate i'o muddussa mabbisara? Paal᷊annabbe, wuṛṛu paddaringikke orassa indi i yami maapulu mabbisara.

³ Anio i'o massunna si yami longonna, wuṛṛu i yami nisul᷊ungngu sapi?

⁴ Asasa'unu tumba'u mannansara watangannu. Ṛinonewe hunan hausannu runia awul᷊iannu tumanangnge, wuṛṛu manga wowone iingkatta wuassu tampane?

⁵ Sasol᷊oannu taumata lal᷊eo sarun paddumanna; putungnge tate lai re'omanna.

⁶ Semakka sulal᷊ummu rasanne mapoddo'e; sasol᷊oanna ipannemakka tate lai ṛumenggamma.

⁷ Lempangnge apan mapia nabbal᷊ite sussassendekka; ṛiinne sassane naatara si tou.

⁸ I tou niumamatta sulal᷊ummu soma, ne leddane naaitte.

⁹ Paale nasongnga su sasedda, na'oman sara niasametante i tou.

¹⁰ Su leta'a, uawuni tal᷊in sedda; su lal᷊anna, uataingnga paṛṛabba wuṛṛu sedda.

¹¹ Taumata lal᷊eo niṛṛumoron atata'utta wuassu al᷊awo'u pappi'uanne; atata'utta uatantalongnga su manga lempangnga.

¹² Dorone i tou matohassa, orassa indi i tou lomete; asasilaka uaringanna si tou su al᷊awo'u tampa.

¹³ Pisine niinassu radda'a mawakkatta; ta'iakka wuṛṛu leddane mawukku'a pia nanane.

¹⁴ I tou niwangkassa wuassu rasanne, sutampa i tou amanna, ana see niwol᷊engnga iapasaruanna papate.

¹⁵ Orassa indi walate isai matana'a sulal᷊ummu rasanne, wuṛṛu isudde nisal᷊iawukka belerangnga, ipamate raddangnge.

¹⁶ Manga ṛamunne namara wuṛṛu naal᷊umpissa; manga rannane naṛṛangu wuṛṛu naaṛṛiunnudda.

¹⁷ I tou tate tinumelengnga lai sulal᷊umme ara'e su liuddu soa; tate saran sangkatou apan maanaungnga aranne.

¹⁸ Wuassu asasemakka i tou nilimbuaṛṛanna sulal᷊ummu ararandumma; wuassu runian taumata wiakka i tou niapasal᷊iu.

¹⁹ Ana'a wuṛṛu papapulunna i tou tawe uatahuanna, su ampungnga niasungkanganne saran sangkatou taweddu nallambe.

²⁰ Naaringikka ola'u wiakke tumanangnge su waṛṛatta niṛṛumoro, arawe tumanangnge su ra'i mangngindo ana waugu matta'utta.

²¹ Etearoddi ola'u wiakku taumata lal᷊eo, i mangitou apan tawe mandeengngu Ruata.”