AYUB 17 - WUKE SUSI WATTI'U AL᷊AL᷊USASSA

¹ Papate'u maranite, maranite mabbassutta sasangngo'u; tumba'u labbingnga apan nallambe si ya'u.

² Taumata na'ola'a si ya'u punnu aal᷊uandaga; aellehengku i mangitou mangke mammasendekka.

³ I ya'u indi matul᷊idda, oh Ruata. Pangimante si ya'u! Isai lai apan wotongnge matatuṛṛutannu wisara'u?

⁴ I'o naṛṛuuddu naungngi mangitou na'oman sara tawe naasunna; arie ma'oman sara i mangitou mamado'u su orassa indi.

⁵ Tumuṛṛuttu sasanato'a, isai mangalae ringanna tumba'u ana waugu auntunganna, manga anangnge sassane sarun manengkamma wawal᷊inne.

⁶ Orassa indi i ya'u pappasendeṛṛannu sasanato'a udde; i mangitou nirumanta nangaddu hati'u.

⁷ Mata'u mal᷊abbukka ana waugu asasusa; ahewallu wadangku naṛṛoadde.

⁸ Taumata apan maagama, niṛṛumindu'a wuṛṛu tinumiangnga; taumata apan tawe sal᷊ane, ma'ellega si ya'u tawe mawune.

⁹ Taumata mapia wuṛṛu tawe sal᷊ane, mangke mangngimanna ola'u wiakka apan ipaapulun Duata.

¹⁰ Arawe unnuwisara i yamiu sarangkanambone rumanta inawarendi, tawe saran sangkatou apan pande lai apan ta'u asangkal᷊anna.

¹¹ Manga allo'u nal᷊iute, tate nariaddi manga ṛiingku; nawul᷊ite lai anambon apulun naungku.

¹² Arawe manga hawe'u mabbisara, ‘Ṛabbi udde allo wuṛṛu semakka maraniten dumanta.’ Arawe i ya'u masingkatta sulal᷊ummu naungku manungku ola'u wia'u uatatana'a marandumma.

¹³ Tumba'u runian papate apan aantimangku, poiaroddi i ya'u sarun matiilla sulal᷊ummu ararandumma.

¹⁴ Labbingku isaggo'u “Iamangku”, wuṛṛu manga ul᷊idda u'inassa waddangku ta'u isaggo “Inangnga” wuṛṛu “Wawine'u”.

¹⁵ Suapa pangangantimangku udde; isai apan naasilo lal᷊umanna'a si ya'u?

¹⁶ Napawe i ya'u sumossokke su runian taumata nate, i ya'u lai tate antimma.”