AYUB 14 - WUKE SUSI WATTI'U AL᷊AL᷊USASSA

¹ Ro'en niasungkangnga taumata udde lome, tawe maal᷊ore; uukke maautta see lai napenen asasusa.

² I tou mallal᷊uwo wuṛṛu tuttolangnga ere wunga; sinumabbi ere lintau; lapiddu nawul᷊i.

³ Oh Ruata, ṛatadde I'o ta'e ma'ellega si ya'u, wuṛṛu mangapi'u watukku pallaṛṛuungan-Nu!

⁴ Wotongngewe taumata apan marosa mandantan inolaanna apan nasuungnga?

⁵ Anambon uukku taumata buatte nitantun-Nu; anambon bul᷊anne I'o buatte nangatokka. I'o buatte nanantunnu lai manga panginsueannu pabbiaṛṛanna; i tou tawe mapalliu udde.

⁶ Wala'e aroddi i tou mangillol᷊o, arie mallimbatta si tou; tadea'u i tou wotongnge maatemma pabbiaṛṛanne ma'oman sara masue manarane.

⁷ Ta'e pia antimma su punnu alu apan nituwangnga; i tou sarun massolla apian ana see maddanna.

⁸ Salaiwe sulal᷊ummu leta'a, ṛamunne naṛṛonesse, wuṛṛu tuidde nate ana waugu naṛṛangute,

⁹ arawe napawe naeṛṛetannu ua'e, i tou tumuwo apia, naal᷊ihidda sasuanna wakku, sollane sumabbangnga apia.

¹⁰ Arawe napawe taumata mate, nasue wattingnge; i tou nanantangngu runia, wua'udde watukkuapa?

¹¹ Naal᷊ihidda ua'e sumawudda wuassu rano, naal᷊ihidda sal᷊ukka neṛṛotta na'oman sara nasue ua'ene,

¹² aroddi lai taumata apan natete; i tou tate mapabbangunna apia. I tou tawe mapu'o tantal᷊anna ta'e pia langitta, tate lai mapabbangunna wuassu tattereanne.

¹³ Wunia'a i ya'u sulal᷊ummu runian taumata nate; lu'arewe i ya'u maddatingngu I'o tate lai mamul᷊o. Arawe tantuna'e tempo tadea'u ipannaungnga watangangku.

¹⁴ Ana waugu, napawe taumata mate, wotongngewe i tou mabbiakka apia? Allo uahahantin allo i ya'u uaṛṛaddo maddatingngu tempo asasusa'u indi mal᷊iudda.

¹⁵ Ne I'o sarun mamaggo si ya'u, ne i ya'u lai sarun sumimbakka; I'o sarun mandangngu si ya'u apia, riadianna apan niolang-Ngu.

¹⁶ Ana see suapan lempangku sidutu lal᷊u'aran-Nu, arawe rosa'u tate lai panduman-Nu.

¹⁷ Rosa'u sarun ampungan-Nu wuṛṛu iramme-Nu; pasasal᷊a'u sutempon dorone sarun pappasan-Nu.

¹⁸ Sarun dumanta tempone manga wowone sarun mal᷊alladda, wuṛṛu wowone watu apan matohassa sarun umiru wuassu tampane.

¹⁹ Manga watu sarun iisannu ua'e apan mangngelekka masassaga, leta'a sarun ionoddu uranna apan wahewalla. Etearoddi lai I'o makkimunsa'a antimmu taumata.

²⁰ I'o namaddon tou saran mal᷊annu-l᷊annu; I'o nandolokki tou inai wuṛṛu I'o namal᷊u hatine.

²¹ Manga anangnge naola'a taumata mawantuga, arawe i tou tawe naasingkatta. Wuṛṛu napawe i mangitou mabbal᷊i tawe aregane, piaddu apan tawe mamasingkatta si tou.

²² Tumba'u hiaddu awangnge apan aapendamanne; tumba'u asusan naungnge apan isassal᷊iomanne.”