AYUB 12 - WUKE SUSI WATTI'U AL᷊AL᷊USASSA

I Ayub

^1-2 I Ayub sinumimbakka, “Atonna, i yamiu indi uaapiddu arannu taumata. Napawe i yamiu mate, asingkatta sarun mate lai.

³ I ya'u lai taumata apan pia ṛingiranne; sarangkanambone apan iwabbisaranu udde i ya'u naasunnate. See lai, isai waggan sarangkanambone udde? Nariaddi, arie passunna manungku i yamiu nilumebbe wuassia'u!

⁴ I ya'u ilallagen hawe wuṛṛu ruanganna, sumbal᷊i i ya'u indi naṛṛino wuṛṛu tawe sangkulle. Dorone Ruata sinumimbakka aal᷊iomangku, suapawe i ya'u sumal᷊ande maitul᷊ungnga.

⁵ I yamiu mallobbossa taumata su asasilaka, wutte'e i yamiu mabbiakka mal᷊angnganna; taumata apan maranite manawo nipuulli yamiu.

⁶ Arawe maṛṛarampassa mabbiakka taweddu mamansagga; taumata apan waṛṛani lumawangnga Ruata mabbiakka matammudda. Sumbal᷊i monganna apan ipangngasakki mangitou, tumba'u atatohassa sassane.

⁷ Pa'iwal᷊ote su manu'u winalanganna wuṛṛu winatangnga waine ne i yamiu sarun onggol᷊anni mangitou al᷊aṛṛa'a.

⁸ Paddorongke tatal᷊a'a su riaddianna su runia wuṛṛu su tahal᷊oangnga, ne i yamiu sarun onggol᷊anni mangitou tal᷊aane.

⁹ Isai suwallatu sarangkanambone udde tawe maatutukka, manungku mandariaddin mangitou tumba'u Ruata sassane?

¹⁰ I Tou mangngatokku wiakku al᷊awo'u riaddianna su runia; I Tou uataṛṛino niawan anambon taumata.

¹¹ Naal᷊ihidda lila'u mappulu mattemma anna apan matemangnga, aroddi lai tal᷊inga'u maapulu maddaringikka wisara.

^12-13 Wattingnge, asingkatta pia su taumata apan timmadete, arawe asingkatta wuṛṛu atatohassa tumba'u pia su Ruata. Naudde pasasunna tumba'u pia su taumata apan timmadete, arawe pasasunna wuṛṛu taṛṛino tumba'u pia su Mawu sassane!

¹⁴ Sarangkanambone apan nihohakku Mawu tate iawangunna apia isai apan niatawan-Ne tate mapallossa apia.

¹⁵ I Tou naṛṛapingnga ua'e, ne namarate wuṛṛu naṛṛagasse abbi; I Tou namallossa niapa'elekka, ne manawangnga mallintuadde!

¹⁶ Ruata udde matohassa, ma'uatta wuṛṛu mawantuga! Taṛṛa wahia wuṛṛu iapa niawahianna bowa su al᷊ungngu taṛṛino-Ne.

¹⁷ I Tou nangul᷊e asingkatta su manga tembonannu runia, wuṛṛu manga piaṛṛa'a niolang-Nge ipappapal᷊age.

¹⁸ Niwaddo-Ne ratu wuṛṛu niatawan-Ne i mangitou;

¹⁹ niapawawo-Ne manga imam wuṛṛu manga piaṛṛangnge.

²⁰ Niapamou-Ne taumata apan tal᷊imoṛṛonganna, niul᷊ean-Ne asingkattu manga matatimadde.

²¹ Nipansilian-Ne taumata apan aaddatanna; niul᷊ean-Ne taṛṛinon mangitou apan uaparenta.

²² Nisemaṛṛan-Ne manga tampa apan uawuṛṛau, nisemaṛṛan-Ne manga lintau apan marandumma.

²³ Manga walahanna niolang-Nge aatambanna wuṛṛu su lal᷊umanna'a, ana see nipate-Ne i mangitou na'oman sara nasue.

²⁴ Niolang-Nge manga piaṛṛa'a nial᷊iwune, na'oman sara i mangitou lullallele tawe tuddane.

²⁵ I mangitou uasasaṛṛipo sulal᷊ummu ararandumma, wuṛṛu sussasendekka naal᷊ihidda taumata wu'anna.