AYUB 11 - WUKE SUSI WATTI'U AL᷊AL᷊USASSA

I Zofar

^1-2 Wua'udde i Zofar nabbisara, “Talawe wawahia udde pia sasimbakke? Apa ṛinone taumata apan tal᷊imoṛṛonganna udde iapaṛṛino?

³ Ayub, i'o massunna manungku i yami tawe maasimbakka si'o? su pahinu i yami mal᷊annabba ana waugu aal᷊uandagu?

⁴ Tumuṛṛuttu sunnanu manga wisaranu udde tawe sal᷊ane; tumuṛṛuttu addapannu i'o waresi su saruannu Ruata.

⁵ Arawe, antimanna Ruata sassane mabbisara!

⁶ Wuṛṛu antimanna i'o pasingkatannu Ruata, manungku asingkatta udde manambo lihidde, wuṛṛu tawe asunnannu taumata. Ne i'o naatutukke manungku asasusanu udde tawe tumani, isumandingu ṛuumanna apan ṛinone sengkamannu.

⁷ Tawe mariaddi ola'u Ruata wotongnge asunnannu? Tawe mariaddi taṛṛino-Ne wotongnge asingkatannu?

⁸ Taṛṛino-Ne mattanggaṛṛanna wuassu winalanganna; i'o tawe mapangame wuṛṛu tawe mapanganu. Taṛṛino-Ne mallal᷊umanna wuassu runian taumata nate, i'o tawe maasunna sarangkadio'a.

⁹ Taṛṛinon Duata maggewal᷊anna wuassu talloara, wuṛṛu mallal᷊aṛṛanna wuassu laudda mal᷊alangnga.

¹⁰ Amungkangngu i Tou manametta wuṛṛu i'o iapidda su mallaṛṛuung-Nge, ne isai waṛṛani manal᷊are inolaan-Ne?

¹¹ Ruata masingkattu taumata apan taṛṛa wahia; al᷊al᷊eon mangitou tawe mal᷊iudda wuassu mata-Ne.

¹² Amungkangngu inangngu keledai lul᷊u maṛṛana'u keledai maṛṛaro, wakkute udde taumata woddo mabbal᷊i pande.

¹³ Ayub, waresite naungngu, wuṛṛu sassille! Aal᷊iomante su Ruata!

¹⁴ Rammea'e rosa wuassu naungngu wuṛṛu paaraua'e al᷊al᷊eo wuassu wal᷊enu!

¹⁵ Ne i'o wotongnge sumaruanna pabbiaṛṛanna ringannu matammudda wuṛṛu waṛṛani; i'o sarun uarisikka matohassa wuṛṛu tate singgawangnge,

¹⁶ ewe'e lai asasusanu tate lai naungannu; naal᷊ihidda manawangnga apan neṛṛotta, niabul᷊ianannu taumata.

¹⁷ Pabbiaṛṛannu sarun maola'a massemaṛṛanna wuassu allattune, wuṛṛu manga tempo marandumma sulal᷊ummu pabbiaṛṛannu asasemmake ere marua allo.

¹⁸ I'o sarun matohassa wuṛṛu napenen antimma; Ruata sarun mallu'adda si'o ma'oman sara i'o malangnganna.

¹⁹ I'o sarun tawe mata'uttu seetta; manambo taumata sarun maiontolla si'o.

²⁰ Arawe taumata lal᷊eo sarun ma'ellega ringannu u'al᷊iwu, waugu i mangitou tawe aontolla. Tumba'u sambau antimmi mangitou eteudde papate paal᷊ihakke rumanta.”