ANTARI MAWANTUGA 8 - WUKE SUSI WATTI'U AL᷊AL᷊USASSA

¹ Ei, unnuwisara i'o tuṛṛangku sidutu, apan buatte sinumusu su inangku, i'o sarun ta'u ari'anna napawe massomba su lal᷊anna, taweddu apan mangal᷊uandaga si ya'u.

² I'o sarun ta'u iapidda su wal᷊en inangku, tadea'u i'o wotongnge mangaṛṛa'a si ya'u. I'o ta'u iapa'inumma anggore mawangngi, wuṛṛu ua'e wuan delima.

³ Limanu aiṛṛi uataṛṛangnga si ya'u, limanu aikkatanna uaṛṛa'uppa si ya'u.

⁴ Paddiandite, ei manga maṛṛualan Yerusalem, manungku i yamiu tawe manal᷊asa'u paapulu, ma'oman sara iapawusa.

Antari aiannumme Manga wawine

⁵ Isaite udde apan nirumanta wuassu wadda'u anne, uasandakka su tunanangane? Ta'u nipu'o i'o su al᷊ungngu punnu apel, sutampa i'o su illoṛṛo wuṛṛu niasungkanga.

Wawine

⁶ Ola'ewe i ya'u lal᷊engke doonu, ariete maṛṛa'uppa si sai-sai tumba'u i ya'u; ana waugu paapulu udde ere atatohassu papate, wuṛṛu apulu mamarenta ere papate. Ṛenggamme naal᷊ihidda ṛenggammu putungnga apan sussal᷊oi ringannu wahewalla.

⁷ Ua'e manambo tawe maapadduma patatunanga, wuṛṛu manawangnga tawe ma'onoddi tou. Amungkangngu piaddu sangkatou mangonggllo al᷊awo'u darotongnge tadea'u ipamalli patatunanga, udde tumba'u hahelo apan asombanganne.

Manga tuṛṛangnge esakka wawine

⁸ I yami pia sangkatou tuari wawine apan ta'e addio'a susune. Apate apan ṛinone olaanni yami si tou amungkangngu piaddu rumanta mangonokka si tou?

⁹ Unnu wisara i tou sambau darandunga, sarun iaparisikki yami candi sal᷊a'a al᷊iu rosone. Unnu wisara i tou sambau ngara mal᷊oangnga, sarun tandaanni yami ringannu alu cemara.

Wawine

¹⁰ I ya'u indi sambau darandunga, wuṛṛu susu'u candine. Arangnguangku masingkatta manungku si tou i ya'u su lal᷊umanna'a.

Esakka

¹¹ Salomo uatahuanna waillu anggore su Baal-Hamon; wailla udde nitantille su manga mandariaga. Sangkatou-sangkatou mammaekka saṛṛiwu roitta sal᷊a'a wuassu wuane,

¹² wuṛṛu naasomba dua ṛasutta su inasaharanne. Wala'e roitta udde si'ote, Salomo, wuṛṛu su manga mandariaga wawail᷊annu. Arawe waillu angoṛṛe'u, tatahuanangku sassane, udde su saruangku.

¹³ Ei, tumatana'a su wailla, manga mappulu maddaringikka tingikku!

Wawine

¹⁴ Arangnguangku, rantate ere kijanga, naal᷊ihidda ana'u rusa su panenteannu Beter.