ANTARI MAWANTUGA 5 - WUKE SUSI WATTI'U AL᷊AL᷊USASSA

Esakka

¹ I ya'u nirumanta su wawail᷊angku, tuari, pare'u, ta'u niammulla mur wuṛṛu rampa-rampa'u; ta'u nianna sal᷊akku langon pul᷊a wuṛṛu pul᷊a'u, ta'u niinumma susu wuṛṛu ua'e'u anggore Aante wuṛṛu pa'inumpe, manga hawe, pa'inumpe ma'oman sara iwu'annu paapulu.

Manga wawine Antari Aiappanne Wawine

² I ya'u mattiilla, arawe naungku uatehamma. Paddaringikke, arangnguangku mannengkella ngara. Wu'ate ngara, tuari, arangnguangku, merpati'u, tatuno naungku; pua'u naṛṛolo ana waugu wal᷊angngukka, uta'u napenen ṛente'u wal᷊angngukku ṛabbi.

Esakka Wawine

³ Lau'u buatte ta'u niluatta; apa sarun ta'u iluṛṛe apia? Ledda'u buatte ta'u niukkassa, apan sarun ta'u iapal᷊uhudda apia?

⁴ Naungku sussinggawanga ana waugu arangnguangku uaagasse papal᷊e ngara.

⁵ Ne i ya'u nabbangunte mamu'ate ngara suttannu arangnguangku. Mur tutturo wuassu lima wuṛṛu manga tal᷊imaddo'u, naṛṛolo pangagasannu papal᷊en ngara.

⁶ I ya'u namu'a ngara sutannu arangnguangku, arawe i tou nabbal᷊i'a wuṛṛu napul᷊ete. I ya'u tumaniten luṛṛintulun tingikke; ta'u nireaanna i tou arawe tawe gunane. Ta'u niwagoanna aranne, arawe i tou tawe nitu'a.

⁷ I ya'u nisasombannu manga mandariaga soa; i mangitou namuulla wuṛṛu nallessa si ya'u, aal᷊umbaingku nianun mangitou ringannu niwata'a.

⁸ Paddiandite, ei manga maṛṛualan Yerusalem, napawe i yamiu masangkalla arangnguangku, wal᷊oa'e si tou, manungku i ya'u maradda'u paapulu.

Manga wawine

⁹ Apa arangnguannu nilumebbe wuassu manga arangnguanna wawine, ei maṛṛuala apan aṛṛamahanne? Apa arangnguannu nilumebbe wuassu manga arangnguanna wawine, na'oman sara i'o nandolokki yami maddiandi?

Wawine

¹⁰ Arangnguangku maṛṛansanga wuṛṛu maṛṛamaga, mappianne wuassu siri mapul᷊o ṛiwu su atoune.

¹¹ Puane naal᷊ihidda wul᷊awanna, wul᷊awanna tutune, utangnge longkotta wuṛṛu ma'itumma, ere aitummu gagak.

¹² Matane naal᷊ihidda merpati su al᷊imatan kua'e, merpati nirenon susu, ua'ianna si winggin li'une.

¹³ Wambalane naal᷊ihidda waillu rampa apan mawangngi, wiwikke bunga hal᷊ohomma apan mapaturon mur tutune.

¹⁴ Ta'iakke maṛṛansanga, pia sinsinge wul᷊awanna ringannu permata, waddangnge naal᷊ihidda gadinga rareetaanu batu nilam.

¹⁵ Leddane naal᷊ihidda manga diṛṛi wuassu marmar mawira, ringannu apampakke wul᷊awanna tutune. Saṛṛen baddangnge ere aṛṛansangu manga wowone su Libanon, wuṛṛu aṛṛamage naal᷊ihidda alu aras.

¹⁶ Tumaniten masaṛṛionto'a pabbawisarane, sarangkanambone si tou maanemma. Etearoddi arangnguangku wuṛṛu hawe'u, ei manga maṛṛualan Yerusalem!