ANTARI MAWANTUGA 3 - WUKE SUSI WATTI'U AL᷊AL᷊USASSA

¹ Suapan ṛabbi, su lallowangangku, sulal᷊ummu wal᷊iawa i ya'u naddea'a tatuno naungku; ta'u nireaanna i tou, arawe tawe gunane.

² I ya'u mappulute mapu'o wuṛṛu mamal᷊iwutta soa, mamal᷊intaddu anambon dal᷊anna wuṛṛu pappisu'anne. I ya'u mappulute maddea'a tatuno naungku; nireaangku i tou, arawe tawe gunane.

³ I ya'u niasangkal᷊annu mandariaga soa, wuṛṛu ta'u niiwal᷊oanna, “Apa i'o naasilo tatuno naungku?”

⁴ Wakkute ta'u nitantangnga i mangitou, i ya'u massomba tatuno naungku. Aagasangku i tou, wuṛṛu tawe ta'u ipallossa na'oman sara ta'u niapidda su wal᷊en mama'u, su wabbo'an taumata apan nanungkangku.

⁵ Paddiandite, ei manga maṛṛualan Yerusalem, ringannu manga rusa wuṛṛu kijangnga su wadda'a, manungku i yamiu tawe manal᷊asa'u paapulu, maddatingngu umualla.

Antari Atallune Wawine

⁶ Apa udde apan nirumanta wuassu wadda'u anne, naal᷊ihidda ammul᷊annu timbulla? Awangngine ere mur wuṛṛu amania, wuṛṛu manga pupure mawangngi wuassu mabbawal᷊u'a.

⁷ Pa'ellega, udde pamamasannanna si Salomo, papal᷊iwutannu annummu pul᷊o taumata mangkatohassa, manga taumata matatohassu Israel,

⁸ apan piate asingkanne su o'alu pangalo. I mangitou sarangkanambone uapetan hal᷊ele su lawassa nasaddiate sumaruanna pangalo sutempo ṛabbi.

⁹ Salomo na'ola'a sambau pamamasannanna si tou, wuassu alu apan apianne.

¹⁰ Diṛṛine niola'a wuassu sal᷊a'a, wuṛṛu aunsandaṛṛane wuassu wul᷊awanna. Aiananne warnane ungu, nikarawangngu manga maṛṛualan Yerusalem ringannu naungnga mal᷊uassa.

¹¹ Sabbangke, ei manga maṛṛualan Sion, pa'ellege si Ratu Salomo ringannu mahkota apan niluṛṛen inangngene, su allo nipaawinganne, su allo i tou lulluassa.