AMSAL 9 - WUKE SUSI WATTI'U AL᷊AL᷊USASSA

Asingkatta wuṛṛu awawoddo

¹ Asingkatta buatte napararisikku wal᷊en, wuṛṛu namasi'u pitu diṛṛine.

² I tou buatte nakkata winatangnga olaanna andeangnga, namakkan ua'en anggore wuṛṛu nangimbeng kanna.

³ Manga daroloṛṛanna wawine nirolokke inai uu'i wuassu manga tampa matanggakka su soa,

⁴ “Isai apan tawe apanden pabbiaṛṛanne rantate isindi!” Su taumata apan apande asingkatta nabbisara,

⁵ “Wette umante ringangku wuṛṛu pattemate anggore apan ta'u niola'a.

⁶ Tantanga'e awawoddo, tadea'u i'o mabbiakka su lal᷊umanna'a. Paddaringikke taumata pande.”

⁷ Amungkangu taumata maddiri aṛṛaanna ta'ea'a pasasal᷊ane, i tou sarun lumaggenu. Amungkangngu taumata lal᷊eo wul᷊oannu, i tou sarun mallela si'o.

⁸ Imbaṛṛangnga mapasal᷊an taumata apan maddiri aṛṛaanna, i tou sarun maisaseennu. Arawe amungkangngu taumata pande ipantingidda pasasal᷊ane, i tou sarun mangaddatta si'o.

⁹ Amungkangngu i'o managu taumata pande, i tou sarun maola'a nangillembo apandene. Wuṛṛu amungkangngu matuṛṛutta Ruata udde aṛṛaannu, asingkanne sarun aatambanna.

¹⁰ Tadea'u maola'a pande, paarorone ṛinone taumata pia apendamma mangngaddatta wuṛṛu matta'uttu Mawu. Amungkangngu i'o maaillal᷊a Apan Lembonsusi, i'o sarun maasomba pasasunna.

¹¹ Asingkatta sarun mangonggolla si'o uukka mal᷊o'engnga.

¹² Napawe asingkatta udde natahuanannu, i'o sassane apan naauntungnga. Arawe amungkangngu i'o nanol᷊a'u asingkatta, i'o sassane lai apan nirugianne.

¹³ Awawoddo eteudde naal᷊ihidda wawine tal᷊imoṛṛonganna apan waggan ola'u pabbiaṛṛanna wuṛṛu tawe masili.

¹⁴ Tampane eteudde su ngaran bal᷊ene ara'e su ngara wahewallu soa.

¹⁵ Wua isudde i tou uui su taumata apan sumabbi. Taumata apan naungnge mapia isal᷊o'i tou.

¹⁶ “Wette otongke, ei i yamiu apan ta'e waggan ola'u pabbiaṛṛanna!” Wuṛṛu su taumata apan dal᷊eo i tou mabbisara,

¹⁷ “Ua'e nita'o pendamanna matemangnga, wuṛṛu u'anna ma'imbuni mattemanganna.”

¹⁸ I mangitou apan naola'a pabbawiakke wagga manungku taumata apan nattembo si tou naasangkalla papatene isudde; wuṛṛu i mangitou apan buatte sinumutta sulal᷊ummu wal᷊ene, orassa indi sulal᷊umpen runian taumata nate.