AMSAL 7 - WUKE SUSI WATTI'U AL᷊AL᷊USASSA

¹ Naungete manga wisara'u, ana'u, wuṛṛu ariete paabul᷊iane manga parenta'u si'o.

² Paatuṛṛute manga tatagu'u tadea'u i'o mabbiakka su lal᷊umanna'a. Pallaṛṛenggente manga al᷊aṛṛa'u mapia-pia ere i'o ual᷊u'adda ana'u matanu sassane.

³ Naungete sidutu manga al᷊aṛṛa'u udde wuṛṛu sahipunte sulal᷊ummu wantan dal᷊ummu naungngu.

⁴ Ola'e manungku hikmatta udde ere tuṛṛangngu wuṛṛu asingkatta maola'a ere hawenu ate.

⁵ Hikmatta sarun mapaaraunu wuassu wawine masandaga, wuassu wawine apan mamol᷊engngu manga wisara maasarootta.

Wawine masandaga

⁶ Su allo sambau i ya'u ma'ellega wuassu sungkettu wal᷊e'u.

⁷ Ana see i ya'u naasilo manambo umbasanna apan ta'e dario'a; arawe pia sangkatou apan tatutuṛṛangku woddo suwallatti mangitou.

^8-9 Napawe wawallote sutempo mannattake marandumma, umbasanna udde u'amatta maranin pappengannu lal᷊anna apan mattuddan tampa tatanaannu sangkatou wawine.

^10-12 Wawine udde wawine apan apulune tawe matatana'a su wal᷊ene. Tal᷊angkadio'a i tou su winggiten dal᷊anna, wua'udde su leta'a mal᷊alangnga, ara'e uarisikka uaṛṛaddo su papengannu lal᷊anna. Pallal᷊agune waṛṛani wuṛṛu tawe masili. I ya'u naasilo i tou sinumabbangnga ringannu ul᷊aṛṛen laubbu wawine masandaga, wuṛṛu naisasomban umbasanna udde ringannu ṛiinna awusu.

¹³ I tou nakka'uppa umbasanna wuṛṛu nangari'a. Ringannu tawe masili i tou nabbisara,

¹⁴ “Allo indi ṛinone i ya'u mamaekka riadi'u, wuṛṛu ringannu udde buatte nangonggollu sasamba.

¹⁵ Ana waugu udde i ya'u sinumabbangnga maddea'a si'o, tadea'u i'o umanna su wal᷊e'u. Orassa indi i ya'u naasangkalle si'o!

¹⁶ Tampan tatiil᷊angku buatte ta'u niampaṛṛannu seprei warnane uawawal᷊u wuassu Mesir,

¹⁷ wuṛṛu buatte ta'u niwokkannu lana mawangngi wuassu mur, cendana wuṛṛu alu manisse.

¹⁸ Orassa indi, wette i ite masasal᷊o'e wuṛṛu mattemmate nenengngu paapulu su al᷊o'engngu ṛabbi.

¹⁹ Awingku tawe baddi'a su wal᷊en, i tou tantal᷊anna su amatanna marau.

²⁰ I tou uaapiddu manambo roitta, wuṛṛu tawe mapul᷊e sulal᷊ummu daruang kamisa indi.”

²¹ Etearoddi wawine udde massal᷊o'u umbasanna udde ringannu manga sasal᷊o'a ipammol᷊engnga na'oman sara i tou niawono'anna.

²² Ringannu tawe naṛṛingidda i tou nallaṛṛenggente wawine udde ere sapi apan niapidda sutampan pamamototanna wuṛṛu ere taumatan ṛuumanna apan niapidda manarimmattu ṛuumanna apan buatte nisaddian taumata woddo;

²³ tal᷊angkadio'a lai anaanna sarun mallappassa su atene. Ere manu'a tuttalla'a mattuddan sedda, aroddi lai umbasanna udde tawe maaṛṛangngo manungku niawane uasaruanna papate.

²⁴ Ana waugu udde al᷊aṛṛana'u, paddaringikke si ya'u. Panutukke manga tatantiro'u.

²⁵ Arie pabbala'a wawine ereudde maanemma naungngu; arie inai maddea'a si tou,

²⁶ ana waugu i tou buatte nanggohakku pabbiaṛṛannu manambo esakka. Tawe iareengnga anambone apan nal᷊al᷊eo waugu i tou.

²⁷ Inai watukku wal᷊ene mangal᷊ene namile lal᷊anna maautta ipattuddan papate.