AMSAL 4 - WUKE SUSI WATTI'U AL᷊AL᷊USASSAAuntunganna apan asombanganna wuassu asingkatta 1 Ei manga al᷊aṛṛana'a, paddaringikke al᷊aṛṛa'u iamangngu! Paatutuṛṛe udde, ne i'o sarun mabbal᷊i masiṛṛungnga. 2 Ta'u iaaṛṛa'a si'o indi mapia, ana waugu udde ariewe i'o tawe maddaringikka al᷊aṛṛa'a udde. 3 Sutempo i ya'u ta'e al᷊aṛṛana'a, ana'a tinggassan hagurangku, 4 i ya'u aaṛṛannu iamangku. I tou mabbisara, “Paanaungete manga tatantiro'u, imbaṛṛangnga i'o maabul᷊ine. Amata'e manga tatantiro'u tadea'u i'o sidutu mabbiakka su lal᷊umanna'a. 5 Ariaddite masiṛṛungnga wuṛṛu pande! Naungete sidutu manga tatantiro'u wuṛṛu arie paddammea'a.” 6 Arega'e asingkatta udde, ne asingkatta sarun mallu'adda si'o; pandangngute si tou ne i tou sarun mandiaga si'o tadea'u sidutu mal᷊angnganna. 7 Apan ṛinone olaanna paarorone eteudde pattinsahadda maola'a masiṛṛungnga. Al᷊awo'a apan raddeaannu, arawe paarorone eteudde pattinsahadde maaddea'a pasasunna. 8 Wattea'e asingkatta, ne i'o sarun itanggakki tou. Ṛa'uppa i tou, ne i Tou sarun mandantan awawantuga si'o. 9 I tou sarun mangonggollu wantin bunga apan maṛṛansangnga si'o tadea'u maola'a mahkotanu. 10 Paddaringikke si ya'u, ana'u! Panutukke paapia-pia manga tatantiro'u, ne uukku sarun mal᷊o'engnga. 11 I ya'u buatte nangaṛṛa'u asingkatta si'o wuṛṛu buatte nangaṛṛa'u ola'u mabbiakka apan mapia. 12 Amungkangngu i'o mabbiakka aroddi, ne tawe sal᷊awangnge sutempo u'amatta, wuṛṛu sarun tawe itara sutempo tuttutal᷊angnga. 13 Paanaungete sidutu al᷊aṛṛa'a apan buatte nisengkammu wuassia'u. Pal᷊u'are udde mapia-pia, ana waugu ringannu al᷊aṛṛa'a udde pabbiaṛṛannu pia hessine. 14 Arie manantuṛṛutta lal᷊annu pabbiaṛṛannu taumata lal᷊eo wuṛṛu arie pattanno inolaanni mangitou. 15 Arie paṛṛingiddi mangitou. Linda'a i mangitou wuṛṛu sidutua'e amatannu! 16 Taumata lal᷊eo tawe maatiilla tantal᷊anna taambe na'ola'a al᷊al᷊eo. I mangitou tawe amatiil᷊anna tantal᷊anna taambe napanilaka taumata waine. 17 Al᷊al᷊eo wuṛṛu araṛṛagissa udde naola'a ere anna wuṛṛu ua'en mangitou. 18-19 Dal᷊annu taumata lal᷊eo marandumma ere randummu ṛabbi. I mangitou natara wuṛṛu nanawo awagananna. Arawe lal᷊anna apan aamatannu taumata mapia mangke ere matannallo sussabbangnga; mallannu massemakka, sara panginsueanne mabbal᷊i masema-semakka. 20 Panutukke manga wisara'u, ana'u! Paddaringikke manga tatantiro'u. 21 Ariewe paddammea'a, ewe'e sahipunte sidutu sulal᷊ummu naungngu. 22 Taumata apan maasunna sarun masal᷊amatta wuṛṛu maola'a lal᷊umanna'a. 23 Paariagai mapia-pia naungngu, ana waugu ete naungngu apan manantunnu lal᷊annu pabbiaṛṛannu. 24 Imbaṛṛangnga saran paassa mabbisara tawe suṛṛinone. Paaraua'e manga wisara wahia wuṛṛu manga wisara apan pandumanne i pangngil᷊iwun taumata. 25 Ṛinone hatinu mammasilon atatul᷊iddu naungngu; tawe ṛinone paṛṛimaunanapa ereola'u pia sampu su samba'an batu. 26 Ṛingira'e paapia-pia tantal᷊anna taambe mamanara, ne i'o sarun mahessi sulal᷊ummu al᷊awo'u inasaharannu. 27 Pangindauten al᷊al᷊eo, wuṛṛu pabbiakke ringannu matul᷊idda. Imbaṛṛangnga sumewadda wuassu lal᷊anna apan atonna. |
@ LAI 2003
Indonesian Bible Society