AMSAL 31 - WUKE SUSI WATTI'U AL᷊AL᷊USASSA

Tatantiro su ratu

¹ Eteindi manga wisara apan niwisaran inangngi Lemuel, ratun Masa su anangnge,

² “Ana'u, tatunonaungku, apan ta'u niasungkanga maola'a sasimbakku aal᷊iomangku. Apate apan ta'u olaanna si'o?

³ Ariewe mallassa auatannu ara'e manggolo'a auatannu su wawine. Manambote ratu nanawo ana waugu wawine.

⁴ Paanaungete, Lemuel! Ma'inumma anggore wuṛṛu nanamitannu minumanna maawu'anna, tawe ṛinone su tembonanne.

⁵ Ana waugu, amungkangngu ratu ma'inumma ua'e maawu'anna, i tou naabul᷊iten tita wuṛṛu tate maddaringikka taumata lal᷊ebbone.

⁶ Ua'e maawu'anna hunane ete si mangitou apan niawul᷊iannu ṛingidda wuṛṛu naungnge massusa.

⁷ I mangitou ma'inumma tadea'u maabul᷊in paasiangnga wuṛṛu asasusan mangitou.

⁸ Sambaaite i mangitou apan tawe maasamba'a watanganne sassane. Lu'arewe anambon taumata apan tawe maal᷊ore.

⁹ Pammanarate hunan mangitou, wuṛṛu ariaddite mallaṛṛuungnga apan matul᷊idda. Lu'arewe taumata asiangnga wuṛṛu taumata apan nialangnga.”

Awingnga wawine apan pande

¹⁰ Awingnga wawine apan pande masahadda paddeaanne; i tou maareganna wuassu intan berlianna.

¹¹ Awingnge esakka sarun tawe atalanna, ana waugu pia pangangimanna si tou.

¹² I tou tawe saran paassa ma'ola'a al᷊al᷊eo siapa esakka; su al᷊o'engngu pabbiaṛṛanne i tou ma'ola'a apapia si tou.

¹³ I tou maṛṛimadda mangammullu ṛote wuṛṛu wambul᷊un domba ana see i tou mammanarate mandaddu'a.

¹⁴ Wuassu marau i tou mandantan anna, naal᷊ihidda ere niola'u manga apallu mabbawal᷊u'a.

¹⁵ Marua allo maṛṛanggappa i tou napu'ote manaddia annu lal᷊oṛṛon bal᷊ene, wuṛṛu mattahia manaran manga allangnge.

¹⁶ I tou maddea'a sampattangnga leta'a, ana see niwallianne; i tou mammanara sambau wawail᷊annu anggore wuassu addapanne.

¹⁷ I tou mandiahi watanganne mammanara ringannu anambon auatanne.

¹⁸ I tou masingkatta manungku sarangkanambone apan niolangnge, maauntungnga; i tou mammanara ma'oman sara ṛabbi mal᷊al᷊umma.

¹⁹ Wananna niandongnge wuṛṛu mal᷊aṛṛenessa niraddungnge.

²⁰ I tou tawe mapiikka su taumata awussa; i tou masaṛṛionto'a su taumata apan ma'itul᷊ungnga.

²¹ I tou tawe suminggawangnga amungkangngu tempon masunge rumantate, ana waugu laubba masal᷊ihangnga nasaddiate su lal᷊oṛṛon bal᷊ene.

²² I tou sassane apan na'ola'a permadanine; laungnge wuassu mal᷊aṛṛenessa linen ungu apan maarega.

²³ Awingnge esakka udde sangkatou taumata apan tinumelengnga – sangkatou suwallattu piaṛṛa'u soa.

²⁴ I tou ma'ola'a laubba wuṛṛu papeṛṛetta ana see niwal᷊u'a su mabbawal᷊u'a.

²⁵ I tou masaṛṛaungnga wuṛṛu aaddatanna; wuṛṛu tawe suminggawangngu allo addantane.

²⁶ Ringannu masaṛṛionto'a i tou mabbisara; manga wisarane maarega.

²⁷ I tou sidutu maṛṛimadda mammanara wuṛṛu ma'ellega aurangannu lal᷊oṛṛon bal᷊ene.

²⁸ I tou addatannu manga anangnge, wuṛṛu raddaloannu awingnge esakka.

²⁹ “Pia manambo wawine apan mapia,” wisaran awingnge esakka, “arawe i'o apan apianne wuassi mangitou sarangkanambone.”

³⁰ Pahudda maṛṛamaga tawe apangimananna, wuṛṛu araṛṛamaga sarun mawul᷊i; arawe wawine apan mararingikka Mawu ṛinone maasomba daralo.

³¹ Wal᷊isete al᷊awo'u apapiane; i tou wawine apan ṛinone addatanna su anambon tampa!