AMSAL 30 - WUKE SUSI WATTI'U AL᷊AL᷊USASSA

Manga wisaran Agur

¹ Eteindi manga wisaran apan niwisaran Agur ana'i Yake wuassu Masa: “I ya'u nal᷊otakke, oh Ruata, i ya'u nal᷊otakke! Nasuete ikka'u!

² I ya'u woddo ere winatangnga; tawe uatahuanna pasasunna.

³ Taambe saran paassa i ya'u nassi'ol᷊a apande, sarangkadio'a i ya'u wagga su ola'u Ruata.

⁴ Taumata suapane apan buatte napapal᷊ele su surga? Buattewe i tou nakkangkumma anginna sulal᷊ummu limane, wuṛṛu nami'unna ua'e sulal᷊ummu laungnge, ara'e nanantunnu manga passarannu runia? Isai i tou, wuṛṛu isai anangnge? I'o sarun masingkatta!

⁵ Ruata nanipussu suapan paaire-Ne. I tou naal᷊ihidda allungnga su sarangkanambone apan uatillumma si Tou.

⁶ Amungkangngu i'o manamba wisara-Ne, ne i Tou sarun managgu si'o wuṛṛu mappal᷊iatta manungku i'o taṛṛa wahia.”

Manga pira tatantiro waine

⁷ “Oh Ruata, i ya'u sumal᷊ande tantal᷊anna i ya'u taambe nate, onggol᷊aawe si ya'u hatto darua indi.

⁸ Arie ma'oman sara i ya'u mabbisaran manga wisara lal᷊inga wuṛṛu wahia, wuṛṛu arie pabbala'a asiangnga ara'e ala. Onggol᷊aawe si ya'u tumba'u apa apan haggausangku.

⁹ Ana waugu, amungkangngu i ya'u ala, asinungka i ya'u sarun mabbisara manungku i ya'u tate mappandumma si'o. Wuṛṛu napawe i ya'u asiangnga, asinungka i ya'u sarun manna'o ma'oman sara mandal᷊eote aran-Nu.”

¹⁰ Imbaṛṛangnga mangngaddio'a allangnga su mawune, i'o sarun ipassalu wuṛṛu iapasal᷊a.

¹¹ Pia taumata apan massalun iamangnge wuṛṛu tawe mangareggan inangngene.

¹² Pia taumata apan massunna watanganne na'ukkassa wutte'e i tou marosa atonna.

¹³ Pia taumata apan massunna watanganne mapia atonna – tawe hampa apapiane!

¹⁴ Pia taumata apan maddea'a wiakka ringannu araṛṛagissa; i mangitou mal᷊aṛṛaga wuṛṛu mallinga taumata asiangnga see lai taumata lome.

¹⁵ Lamati'u ammaranne pia anangnge darua; itarua aranne “Tumba'u wua'u”! Pia appata hatto apan tawe masue:

¹⁶ runian taumata nate, wawine apan tawe mangunsiwe, leta'a mamara apan maroung kuranna, wuṛṛu putungnga apan lullewa su al᷊awo'u tampa.

¹⁷ Taumata apan mangngal᷊uandaga iamangnge ara'e inangngene apan timmadete, ṛinone iramme su liudde tadea'u matane tembonannu manu'a gagak wuṛṛu winal᷊unanne inasannu manu'a a'a.

¹⁸ Pia appatta hatto apan tumaniten masahadda si ya'u passunnanne:

¹⁹ manu'a a'a apan tuttlla'a su winalanganna, atoanna apan tuttondo su wowon batun sahatta, apalla apan maseenggotta su tangngan tahal᷊oangnga, wuṛṛu sampare maṛṛuala umbasanna apan tantal᷊anna uararangngu.

²⁰ Eteindi apanden sangkatou wawine apan mal᷊awangnga awingnge: Napawe buatte sinumandaga, i tou niumanna ana see namedda moṛṛongnge, wua'udde nabbisara, “I ya'u tawe na'ola'a apa-apa!”

²¹ Pia appata hatto apan masahadda daringiṛṛanna su ahewallu runia:

²² sangkatou allangnga apan naola'a ratu, sangkatou woddo apan naasomba sarangkanambone apa ipaapulune,

²³ sangkatou wawine apan napaawingnga sumbal᷊i i tou ipaaddirin taumata, sangkatou allangnga wawine apan nangaṛṛo aianannu mawune wawine.

²⁴ Su runia indi appatta hatin binatangnga addio'a arawe pande atonna, eteudde:

²⁵ Haṛṛammissa, winatangnga apan lome, arawe mannadia wiakke sutempon paddissa.

²⁶ Pelanduk, winatangnga lome, arawe ma'ola'a wal᷊ene su wuiddu watu.

²⁷ Saṛṛappalanna, winatangnga apan tawe ratune, arawe mabbarissa ringannu uaatokka.

²⁸ Mangal᷊imma, winatangnga apan wotongnge sametannu lima, arawe i tou poi su wal᷊en araratuanna.

²⁹ Pia appata hatto apan maatiangnga amungkangngu tutuṛṛanna olangnge umamatta, eteudde:

³⁰ Singa, winatangnga atohasanne wuassu al᷊awo'u winatangnga wuṛṛu tawe mata'uttu manga apa;

³¹ ambingnga mandangenna, manu'a tarau apan u'amatta mal᷊ihakka, wuṛṛu ratu su saruannu tumana'u soane.

³² Amungkangngu ana waugu awawoddonu i'o ringannu matanggakka manggol᷊agu manga hatto lal᷊eo, paatehamma!

³³ Ana waugu, amungkangngu i'o malluakku susu, i'o ma'ola'a mantega. Amungkangngu i'o mamuulla ngirunnu taumata, see sinumabbangke daṛṛa. Amungkangngu i'o nandantan asasa'u, ne i'o lai nasutta sulal᷊ummu pattatiakka.