AMSAL 28 - WUKE SUSI WATTI'U AL᷊AL᷊USASSA

¹ Taumata lal᷊eo tuttal᷊angnga ringannu taweddu mangangenggenne, arawe taumata matul᷊idda, waṛṛani ere singa.

² Amungkangngu walahanna marosa, piaṛṛangnge ual᷊al᷊ol᷊ossa; amungkangngu piaṛṛangnge pande, walahanna sarun matatana'a wuṛṛu sidutu su lal᷊umanna'a.

³ Tembonanne apan mangngallanga taumata asiangnga, naal᷊ihidda uranna masaddata apan nanggohakku pangitinganna.

⁴ Isai apan tawe mangareggan tita, mannamba'a taumata lal᷊eo; isai matuṛṛutta tita, lullawangnga taumata lal᷊eo.

⁵ Atatul᷊idda tawe asunnannu taumata lal᷊eo, arawe taumata apan massubba Mawu, atonna-tonna maasunna.

⁶ Mappianne taumata asiangnga apan matul᷊idda naungnge wuassu taumata ala apan taṛṛa linga.

⁷ Umbasanna apan matuṛṛutta tita uddewe taumata pande. Arawe taumata apan uahahawen taumata mawoso mammasili iamangnge.

⁸ Isai nabbal᷊ite ala ana waugu nanganu bungane wuṛṛu maddea'a auntunganne manambo-nambo, paa'alane sarun manawo su taumata apan maakannu taumata asiangnga.

⁹ Amungkangngu i'o tawe tumuṛṛutta titan Duata, Ruata lai sarun masamballu aal᷊iomannu.

¹⁰ Isai massal᷊o'u taumata matul᷊idda tadea'u ma'ola'a al᷊al᷊eo, i tou sassane manawo sulal᷊ummu sedda. Taumata apan naungnge waresi sarun al᷊amatanna ma'oman sara su lal᷊umanna'a.

¹¹ Taumata ala sidutu uapendamma watanganne pande, arawe taumata asiangnga apan pia buddine masingkattu isai i tou ṛinone.

¹² Amungkangngu taumata mapia uaparenta, anambon taumata mal᷊uassa, amungkangngu taumata lal᷊eo uaparenta, tumana'u soa ma'imbuni.

¹³ Isai apan mammunin dosane tawe mauntungnga. Isai manga'u wuṛṛu manantangngu rosa, sarun dangnguannu Mawu.

¹⁴ Pangaddate Mawu sidutu, ne i'o sarun su lal᷊umanna'a. Amungkangngu i'o lumawangnga si Tou, i'o sarun maasomba asasilaka.

¹⁵ Taumata lal᷊eo apan uaparenta taumata su awussa, naal᷊ihidda singa mammiṛṛonganna ara'e beruangnga apan tumambote.

¹⁶ Tembonanne apan mangngallanga taumata waine, tawe ṛingiranne mapia; tembonanne apan maddantinnu pallal᷊inga sarun mamarenta su tonnanne.

¹⁷ Sangkatou taṛṛa pate sarun uapendamma sidutu a'enggenanna maddatingngu papatene; tawe saran sangkatou apan wotongnge manaṛṛangnga si tou.

¹⁸ Taumata apan mabbiakka ringannu tawe sangkulle sarun masal᷊amatta. Taumata apan u'al᷊iwu wiakke, sarun manawo.

¹⁹ Mabbawailla apan mammanara maṛṛimadda sarun masuungnga wiakke; taumata apan mandammen tempo sarun su awussa.

²⁰ Taumata matul᷊idda al᷊amatannu Mawu, arawe taumata apan mappulu mal᷊ihakka maala, tawe mal᷊iu wuassu ṛuumanna.

²¹ Dal᷊eo udde mammile taumata; arawe piaddu lai mallaṛṛuungnga apan mallinga tumba'u ana see maasomba roitta addio'a.

²² Taumata apan wal᷊iu apulune mal᷊ihakka maala; i tou wagga manungku paasiangnga mal᷊ihakke maṛṛia'e si tou.

²³ Taumata apan mangngonggollu tatagu panginsueanne lembon aaddatanna wuassu taumata mangngonggollu daralo.

²⁴ Isai manna'o darotongngu hagurangnge i tou massunna manungku udde wal᷊ine rosa, naal᷊ihidda manga taṛṛa ta'o waine.

²⁵ Maṛṛingiddu watanganne sassane mandantan patatiakka; i'o ma'untunganna amungkangngu mangngimanna Mawu.

²⁶ Isai mangngasakka lal᷊annu ṛingiranne sassane, tawe ṛingiranna mapia. Isai tuttuṛṛuta al᷊aṛṛa'u taumata pande sarun masal᷊amatta.

²⁷ Isai apan mangngonggolla taumata asiangnga sarun tawe asueanne. Isai manutubbu mata su awusu taumata asiangnga sarun awontohanna.

²⁸ Amungkangngu taumata lal᷊eo uaparenta; tumana'u soa ma'imbuni; amungkangngu taumata lal᷊eo nate; taumata matul᷊idda sarun mamiaṛṛa'a ringannu tawe gal᷊ahene.