AMSAL 25 - WUKE SUSI WATTI'U AL᷊AL᷊USASSA

Manga pira tatantiro waine wuassi Salomo

¹ Manansunna indi manga pira tatantiro waine wuassi Salomo apan nial᷊innu manga mamanaran wal᷊en araratuanni Hizkia, ratun Yehuda.

² Ruata wabbantuhanna ana waugu apa apan iaadapping-Nge; ratu aaddatanna ana waugu apa apan tattal᷊aane.

³ Naal᷊ihidda laudda apan mal᷊al᷊umma wuṛṛu langitta apan matanggakka, aroddiwe ṛingirannu ratu apan tawe asunnanna.

⁴ Waresite suene sal᷊a'a wuassu luhudde, wakkute araṛṛansangnge wotongnge ilanginnu tuangnga.

⁵ Limbuaṛṛete manga mananantiro lal᷊eo wuassu wal᷊en araratuanna, wakkute udde araratuanna matohassu atatul᷊idda.

⁶ Amungkangngu sumaruanna ratu ṛinone masaṛṛionto'a, arie mamunga ere taumata pia aiananne matanggakka.

⁷ Mappianne iapasa'e su tampa apan lembon mawantuga wuassu irolokka mangonggollu aianannu taumata apan pangkanne matanggakka.

⁸ Arie tumaniten masasaṛṛawutta mangapiddu hatto su pallaṛṛuunganna; ana waugu, amungkangngu inauranna i'o nassal᷊a apate apan sarun olaannu?

⁹ Nassal᷊a sunna su hawenu, insuete tumba'u ringanni tou, arawe addapingngu taumata waine arie pabbattia'a.

¹⁰ Ana waugu, sal᷊immurine i'o isaggo taumata mataṛṛupassi wuṛṛu arannu mal᷊al᷊eo su al᷊o'engngu pabbiaṛṛannu.

¹¹ Addapatta apan niwisara naṛṛino sutempone naal᷊ihidda wuan bul᷊awanna su lal᷊ummu lama'a sal᷊a'a.

¹² Tatagun taumata pande su taumata apan mappulu maddaringikka naal᷊ihidda sinsingnga wul᷊awanna ara'e lal᷊oggakka wul᷊awanna.

¹³ Daroloṛṛanna apan matuṛṛutta, maal᷊uassa mandarolokke, naal᷊ihidda ua'e masunge su mangangitingnga wailla.

¹⁴ Manga riandi apan tawe naola'a, naal᷊ihidda winabbawa wuṛṛu anginna apan tawe manossokku uranna.

¹⁵ Asasabbare apan rarundinganannu manga wisara masaṛionto'a wotongnge apangimanannu taumata apan uataṛṛino, wuṛṛu makkimunsa'a anambon lumal᷊awangnga.

¹⁶ Arie pa'inumma pul᷊a manambo-nambo; takkude i'o mawusaingnga.

¹⁷ Arie tumaniten masokka rumanta su wal᷊en al᷊indongannu, takkude i ya'u mawusa see mabbinsinu.

¹⁸ Aansilla awusu wotongnge maapate, naal᷊ihidda hal᷊ele, darupa ara'e anaanna maṛṛoro.

¹⁹ Mangngimanna taumata lal᷊eo sutempon asasusa uddewe naal᷊ihidda sussappan isi huggolle, ara'e u'amattu ledda peṛṛo.

²⁰ Mangantari hunan taumata massusa naal᷊ihidda nanantol᷊e si tou sutempo masunge naal᷊ihidda nallal᷊innu cuka su lessane.

²¹ Amungkangngu seennu mal᷊unussa, i tou onggol᷊eten anna; amungkangngu i tou marou, painuma'e i tou.

²² Ringannu aroddi i'o namansili si tou wuṛṛu Mawu sarun mangal᷊amatta si'o.

²³ Anginna sawannakka sarun mandantan uranna; aroddi lai paggahahatto sarun mandantan asasa'u.

²⁴ Uatana'a su pabbuuannu pangketta malluasanna wuassu uatana'a sambal᷊eanna ringannu awingnga apan apulune uatatiakka.

²⁵ Naasengkamma watti'a wuassu wanua marau naal᷊ihidda na'inumma ua'e masunge sutempo marou.

²⁶ Taumata mapia apan mattingkawaddo su taumata lal᷊eo naal᷊ihidda al᷊imatan kua'e apan mal᷊abbukka ara'e paṛṛihi malabbukka.

²⁷ Lal᷊eo ma'inumma pul᷊a apan nilumebbe, aroddi lai lal᷊eo tumaniten manambo maddalo.

²⁸ Taumata apan tawe ma'ul᷊inna watanganne naal᷊ihidda soa apan naṛṛaate tatandangnge.