AMSAL 22 - WUKE SUSI WATTI'U AL᷊AL᷊USASSA

¹ Aranna mapia maareganna wuassu darotongnga manambo; raddangnguannu taumata mappianne wuassu onggol᷊annu sal᷊a'a wuṛṛu wul᷊awanna.

² Taumata ala wuṛṛu taumata asiangnga pia sambau inolanna apan uasul᷊ungnga: ete Mawu apan nandiaddi si mangitou sarangkanambone.

³ Taumata pande mallinda'a napawe maasilo asasilaka; taumata woddo sidutu u'amatta ana see niaṛṛiaannu asasilaka.

⁴ Taumata apan ma'imanna Mawu wuṛṛu sussallungngu watanganne, sarun su lal᷊umanna'a, mal᷊uassa wuṛṛu aaddatanna.

⁵ Paṛṛabba wuṛṛu sedda nitaingnga su lal᷊annu taumata taṛṛa linga; pangindauten sarangkanambone udde amungkangngu i'o mappulu masal᷊amatta.

⁶ Aṛṛa'ete sangkatou ana'a sambau lal᷊annu pabbiaṛṛanna apan ṛinone si tou, ne maddatingngu i tou matimmade i tou sarun mabbiakka aroddi.

⁷ Taumata asiangnga tataṛṛinoannu taumata ala; taumata apan mabballassa tataṛṛinoannu taumata apan napawallassa.

⁸ Taumata apan mangngasi'u linga sarun mangitingnga papate; panginsueanne taṛṛinone apan ipappaatta walate apulune sarun mawul᷊i.

⁹ Taumata apan naungnge mapia sarun al᷊amatannu Mawu, ana waugu i tou mattahia wiakka su taumata awussa.

¹⁰ Limbuaṛṛete taumata apan taṛṛa al᷊uandaga, ne naddote patatiakka, pasaseetta wuṛṛu ual᷊al᷊obbossa.

¹¹ Taumata apan mappulun atatul᷊idda wuṛṛu mapia wisarane, sarun maola'a hawen datu.

¹² Ringannu mammongkakku awusun taumata taṛṛa linga, Mawu mallu'adda tadea'u asingkatta apan atonna sarun lal᷊u'aranna.

¹³ I malassa apulune uatana'a su wal᷊en; i tou nabbisara, “Pia singa su liudde, i ya'u sarun tamboanne su tangngan dal᷊anna.”

¹⁴ Sasal᷊o'u wawine masandaga maoala'a sedda; taumata apan aasa'uannu Mawu umul᷊ussa sulal᷊umme.

¹⁵ Suṛṛinonete al᷊aṛṛana'a ma'ola'a pallal᷊aghun longonna, arawe ua'e wotongnge mangaṛṛa'a si mangitou ringannu mamal᷊u pallal᷊agu.

¹⁶ Isai mappulu mabbal᷊i ala ringannu mangallangnga taumata asiangnga wuṛṛu mangonggollu aonggola su taumata pia darotongnge panginsueanne sarun masusa.

Tallun pul᷊o al᷊aṛṛa'u taumata pande

¹⁷ Paddaringikka, i ya'u sarun mangaṛṛa'a si yamiu al᷊aṛṛa'u taumata pande! Panutukke al᷊aṛṛa'u.

¹⁸ I'o sarun mal᷊uassa amungkangngu al᷊aṛṛa'u udde sahipunannu sulal᷊ummu naungngu. Ana waugu ringannu aroddi i'o nariahite mappaattu al᷊aṛṛa'a udde.

¹⁹ I ya'u nangaṛṛa'a si'o orassa indi ana waugu i ya'u mappulu i'o mangngimanna Mawu.

²⁰ Tallun pul᷊o al᷊aṛṛa'a apan buatte ta'u niwoṛṛetta si'o al᷊aṛṛa'a apan lal᷊oṛṛoannu asingkatta wuṛṛu tatantiro apan mapia;

²¹ wuṛṛu sarun mangaṛṛa'a si'o apa apan atonna-tonna wuṛṛu naṛṛino. Mantewe i'o iwal᷊oanna, i'o wotongnge sumimbakka ringannu naṛṛino.

–1–

²² Imbaṛṛangnga mandugi taumata asiangnga, tumba'u ana waugu i tou lome; wuṛṛu su pallaṛṛuunganna ariewe makkampassa hakkan taumata tawe ikanne.

²³ Ana waugu, Mawu sarun manamba'a hatton mangitou wuṛṛu manawutta niawan taumata apan mangngallanga si mangitou.

–2–

²⁴ Ariewe maggahawen taumata apan apulune massa'u wuṛṛu mal᷊ihakka umawitta daṛṛane.

²⁵ Sal᷊immurine i'o sarun mattanno si tou, wuṛṛu masahadde mamul᷊in anaramma udde.

–3–

²⁶ Imbaṛṛangnga maddiandi mamaekka awallassu taumata waine.

²⁷ Napawe i'o tawe mawaekka, tampan tatiil᷊annu lai sarun anuanna.

–4–

²⁸ Imbaṛṛangnga manesse'u passaranna apan buatte niatookku al᷊amonanu.

–5–

²⁹ I'o buatte naasilo sangkatou taumata pande mammanara manarane? Taumata udde sarun iapamanara su wal᷊en manga ratu, wal᷊ine su wal᷊en taumata wiasa.