AMSAL 21 - WUKE SUSI WATTI'U AL᷊AL᷊USASSA

¹ Uasul᷊ungngu ere Mawu nangatokku ua'en sal᷊ukka tadea'u mangelekka tumuṛṛuttu apulu-Ne, aroddi lai i Tou mangngehetta ṛingirannu ratu.

² Suapan inolaannu taumata asinungka mapia sulal᷊ummu aellege sassane, arawe tumba'u Mawu apan masingkattu naungnge.

³ Inolanna apan matul᷊idda wuṛṛu naṛṛino lembon maal᷊uassa Mawu sul᷊ungnge wuassu al᷊awo'u sasamba.

⁴ Taumata lal᷊eo udde marosa, ana waugu tataṛṛinoannu atatanggakke wuṛṛu awawungane.

⁵ Ṛiinnu taumata marassagga mangngapiddu auntunganna; inolaanna apan uasasaṛṛawutta pangillul᷊eanne awussa.

⁶ Paa'ala apan niasombanganna ringannu mallinga mal᷊ihakka mawul᷊i wuṛṛu mangngapiddu taumata su loṛṛangngu labbingnga.

⁷ Taumata lal᷊eo maddiri tumuṛṛutta tita; i tou nasansaran araṛṛaginne sassa.

⁸ Taumata nassal᷊a, pasi wengkolla lal᷊anne; taumata mapia sidutu matul᷊idda wiakke.

⁹ Uatana'a su pabbuuannu pangketta maal᷊uassa wuassu uatana'a sambal᷊eanna ringannu awingnga apan apulune uatatiakka.

¹⁰ Taumata lal᷊eo sidutu mappulu ma'ola'a al᷊al᷊eo; su saruannu anambon taumata i tou tawe aakkanna.

¹¹ Ṛuumanna su taṛṛa lobbossa maola'a al᷊aṛṛa'a su taumata apan tawe pangalamanne. Amungkangngu taumata mapia taguanna, i tou sarun aatambanna pande.

¹² Ruata Apan Lembonmatul᷊idda masingkattu apa apan nariaddi sulal᷊ummu wal᷊en taumata lal᷊eo. I tou sarun mamontolli mangitou ma'oman sara nate.

¹³ Isai maddiri maddaringikka sasal᷊iomannu taumata apan awussa tawe daringiṛṛanna amungkangngu i tou sassane maiontolla.

¹⁴ Su i mapa'ulen asasa'u wuṛṛu wawansaga, untureten aonggolla ringannu mal᷊anna-l᷊annabba.

¹⁵ Amungkangngu atatul᷊idda iapaamatta, ne taumata mapia sarun maapendamma al᷊al᷊uassa, arawe taumata lal᷊eo uapendamma silaka.

¹⁶ Taumata apan tawe tumuṛṛutta su lal᷊annu pabbiaṛṛannu taumata mapia, i tou sarun ma'oma su runian taumata nate.

¹⁷ Taumata apan apulune mal᷊uassa sidutu sarun su awussa; taumata apan apulune maddamea, i tou sarun tawe maala.

¹⁸ Amungkangngu tumana'u soa iṛṛuumannu Mawu, wal᷊ine taumata mapia, ewe'e taumata lal᷊eo apan maasomba asasusa.

¹⁹ Mappianne uatana'a wadda'a mal᷊alangnga, sul᷊ungnge'e uatana'a ringannu sawa tal᷊immoṛṛonganna wuṛṛu taṛṛa rona.

²⁰ Taumata pande sidutu uatatana'a su al᷊al᷊uassa wuṛṛu su paa'ala; arawe taumata woddo mabbasabbangngu darotongnge tawe deenganne.

²¹ Isai mattinsahadda tadea'u atatul᷊idda wuṛṛu darangngu iapaamatta, sarun maasomba lal᷊umanna'a, aaddatta wuṛṛu uukka mal᷊o'engnga.

²² Taumata pande wotongnge mapangaṛṛo soa apan rariagannu tantara apan matohassa; i tou naṛṛa'an manga tanda'a watu apan ipangngasakki mangitou.

²³ Su ipallinda'u asasusa, ṛinone paatehamma malluan bisara.

²⁴ Taumata mawunga wuṛṛu naungnga matanggakka apulune mappasal᷊a wuṛṛu tawe atoranne.

²⁵ Imalassa apan maddiri mammanara; namate watanganne ringannu apulune sassane.

²⁶ Su al᷊o'engngu allo i tou tumba'u maṛṛingidda su ola'u apa apan ipaapulune. Arawae mawal᷊i'a, taumata apan matul᷊idda wiakke wotongnge mangonggolla ringannu manambo-nambo.

²⁷ Mawu tawe lumuassu sasamban taumata lal᷊eo, nangillembote amungkangngu ionggolla ringannu naungnga lal᷊eo.

²⁸ Tatiala awusu tawe pangimananna; arawe wisaran taumata apan masingkattu lal᷊annu hatto, sarun daringiṛṛanna.

²⁹ Taumata matul᷊idda mangngimanna watanganne; taumata lal᷊eo hatine maappalla.

³⁰ Tawe apapande, asasiṛṛunga ara'e ṛingiranna matakko'a apan wotongnge mataṛṛangnga su saruannu Mawu.

³¹ Salaiwe pangalo riahiannu ringannu awal᷊on pangalo, apan manantunnu auntunganna tumba'u Mawu.