AMSAL 2 - WUKE SUSI WATTI'U AL᷊AL᷊USASSA

Hunane uatahuanna asingkatta

¹ Sengkampe manga al᷊aṛṛa'u, wuṛṛu sidutu panaungete tatagu'u si'o.

² Daringiṛṛete sarangkanambone apan maapande wuṛṛu pattinsahadde tadea'u maasunna.

³ Oh, ana'u, pattinsahadde tadea'u maatahuanna ṛingiranna maṛṛoro, wuṛṛu paddorongnge pasasunna.

⁴ Rea'ete udde naal᷊ihidda maddea'a wul᷊awanna, wuṛṛu enggenete udde naal᷊ihidda maddea'a darotongnga apan uaal᷊i.

⁵ Ringannu aroddi i'o sarun maasingkatta apa atappasanne matta'uttu Mawu wuṛṛu i'o sarun maasomba asingkatta su ola'u Ruata.

⁶ Tumba'u Mawu apan mangonggollu asingkatta; ete wuassi Tou taumata maasomba apande wuṛṛu pasasunna.

⁷ Su taumata apan matul᷊idda wuṛṛu tawe sangkulle, i Tou niumontolla wuṛṛu nanillumma.

⁸ Mawu ual᷊u'adda manga taumata apan ma'ola'a atatul᷊idda wuṛṛu mannillumma si mangitou apan marangngu si Tou.

⁹ Amungkangu i'o matuṛṛutta si ya'u, ana'u, i'o sarun maasingkatta sarangkanambone apan matul᷊idda, tawe awusune wuṛṛu mapia. I'o lai sarun maasingkatta ereapa lal᷊anne i'o mabbiakka.

¹⁰ I'o sarun maola'a pande, wuṛṛu asingkannu sarun maal᷊uassa naungngu.

¹¹ Pasasunna wuṛṛu apandenu sarun mallu'adda si'o,

¹² see lai maningaddu mallaṛṛenggenna lal᷊annu wiakka apan suṛṛinone, wuṛṛu lai mangindaun batangannu wuassu manga taumata apan moṛṛongnge lal᷊eo.

¹³ I mangitou maddiri mallaṛṛenggenna lal᷊annu pabbiaṛṛanna apan suṛṛinone; i mangitou niumamatta su lal᷊anna apan marandumma wuṛṛu napenen dosa.

¹⁴ I mangitou naasomba al᷊al᷊uassa wuassu inolaanni mangitou apan dal᷊eo.

¹⁵ I mangitou taṛṛa l᷊inga wuṛṛu lal᷊annu pabbiaṛṛanni mangitou wengkolla.

¹⁶ I'o, ana'u, sarun botongnge manol᷊a'u sasal᷊o'u wawine masandaga apan maddea'a mamohe si'o ringannu manga wisara apan mapia.

¹⁷ Wawine udde mal᷊awangnga awingnge wuṛṛu naabul᷊iten paairene su Ruata.

¹⁸ Amungkangu i'o inai watukku wal᷊ene udde atappasanne inai mattuddan papate. Inai poiaroddi nassul᷊ungngu lai inai su runian taumata nate.

¹⁹ Taumata apan inai ringanni tou taambe piaddu nawelengnga apia su lal᷊anna apan matuddan sasal᷊amatta.

²⁰ Ana waugu udde, ana'u, pangaṛṛusse tul᷊addan taumata mapia, wuṛṛu pabbiakke ere su apulun Duata.

²¹ Ana waugu, taumata apan mabbiakka tuttuṛṛutta apulun Duata, eteudde taumata apan naungnge matul᷊idda, ete i mangitou apan matana'a su wanua apan pina'iren Mawu.

²² Arawe taumata lal᷊eo wuṛṛu marosa sarun iwaretan Duata su liuddu wanua udde, ere nannal᷊o niabutta wuassu leta'a.