AMSAL 19 - WUKE SUSI WATTI'U AL᷊AL᷊USASSA

¹ Mapianne taumata asiangnga apan mabbiakka matul᷊idda, wuassu taumata woddo apan apulune mammahia.

² Araṛṛimadda ringannu tawe asingkatta, lal᷊eo; taumata apan uasasaṛṛawutta sarun ma'ola'a pasasal᷊a.

³ Taumata mandugi watanganne sassane ana waugu awawoddone, wua'udde mapasal᷊an Mawu su olangnge udde.

⁴ Taumata ala, hawene sidutu aatambanna; taumata asiangnga ewe'e tinantangngu ringanne.

⁵ Taumata apan mammahia su pallaṛṛuunganna, tawe mal᷊iu wuassu ṛuumanna.

⁶ Suapan taumata maddea'a manganu naungngu tembonanne; anambon taumata maapulu maggawen taumata taṛṛa onggolla.

⁷ Taumata asiangnga aaddio'annu tuṛṛangnge, lembonete lai hawene. Salaiwe i tou mattinsahadda, i tou tawe maawohe si mangitou.

⁸ Isai mangngenggenna asingkatta, mandangngu watanganne; wuṛṛu isai mannaungnga apa apan a'urumanne, sarun su lal᷊umanna'a.

⁹ Taumata apan mangngawusu su pallaṛṛuunganna sarun iṛṛuumanna wuṛṛu pateanna.

¹⁰ Tawe su ṛinone taumata woddo mabbiakka pia lembone, wuṛṛu tawe lai su tampane allangnga mammarenta tembonanne.

¹¹ Taumata pande wotongnge maaṛṛaddannu asasa'une. I tou raddaloanna ana waugu tawe mandeengngu pasasal᷊an taumata si tou.

¹² Asasa'un datu ere tingikku singa; apapian datu naal᷊ihidda wal᷊angngukka apan nakkolo al᷊awo'u sinuananna.

¹³ Ana'a woddo maal᷊al᷊eo iamangnge. Awingnga apan tal᷊imoṛṛonganna naalihidda ua'e tutturo tawe illol᷊one.

¹⁴ Wal᷊en wuṛṛu darotongnga wotongnge asombanganna wuassu hagurangnga, arawe awingnga apa pande udde aonggollu Mawu.

¹⁵ Amamalassa maaola'a taumata mattiilla mal᷊angnga, wuṛṛu panginsueanne i malassa sarun amal᷊unusanna.

¹⁶ Taumata apan tuttuṛṛutta manga parentan Duata sarun masal᷊amatta, taumata apan tawe mangaregane sarun nate.

¹⁷ Mantul᷊ungngu taumata asiangnga naal᷊ihidda ere nangonggollu awallassa su Mawu; ne ete Mawu lai apan sarun mabbal᷊issa.

¹⁸ Atoṛṛa'a anangngu tantal᷊anna ta'e pia antimma; amungkangngu tawe, atappasanne i'o maapulu i tou mal᷊al᷊eo.

¹⁹ Wala'e taumata mal᷊ihakka masa'u maapendamma sassane pangillul᷊eanne. Amungkangngu i'o mantul᷊ungngi tou, i'o tumba'u mannamba asasa'une.

²⁰ Amungkangngu i'o mappulu mangurumma wuṛṛu maddaringikka tatantiro, sal᷊immurine i'o mabbal᷊i taumata apan pia apande.

²¹ Taumata pia manambo ṛiinna, arawe tumba'u laṛṛawessu Mawu apan maola'a.

²² Pallal᷊agu apan aantimanna wuassu sangkatou eteudde asasatiane. Mappianne asiangnga wuassu mabbal᷊i taṛṛa awusu.

²³ Pangaddate Mawu, ne wiakku sarun su lal᷊umanna'a; i'o sarun mawusa wuṛṛu mal᷊iu wuassu silaka.

²⁴ Pia taumata malassa tassul᷊ungnge; mamo'on anna lai su moṛṛongnge masahadda.

²⁵ Amungkangngu taumata mawunga iṛṛuumanna, taumata apan tawe pangalamanne maasomba al᷊aṛṛa'a. Amungkangngu taumata mapia tagguanna i tou sarun aatambanna apandene.

²⁶ Ana'a apan mandal᷊eo wuṛṛu mallimbuakka hagurangnge, uddewe ana apan maasili wuṛṛu lal᷊eo.

²⁷ Ana'u, amungkangngu i'o maddirite lai massi'ala, i'o sarun maabul᷊in apa apan buatte niurumannu.

²⁸ Mattiala awusu, atappasanne tawe mangaregan tita; mannilaka taumata, matemangnga pendamanne su taumata lal᷊eo.

²⁹ Taumata woddo apan naungnge matanggakka i tou sarun puul᷊anna.