AMSAL 18 - WUKE SUSI WATTI'U AL᷊AL᷊USASSA

¹ Taumata apan makkaen batanganne wuassu taumata waine atappasanne tumba'u mannutukka watanganne sassane; suapan addapattu taumata waine tompol᷊anni tou.

² Taumata woddo maddiri onggol᷊annu pasasunna; i tou tumba'u mappulu mapasabbangngu lal᷊oṛṛon naungnge.

³ Rosa wuṛṛu aasiangnga u'amatta suadio'a; napawe nassal᷊ate, i tou sarun al᷊uandahanna lai.

⁴ Wisaran taumata wotongnge maola'a punnu apapande mal᷊al᷊umma ere laudda, mapia ere ua'e mangngelekka.

⁵ Dal᷊eo manamba'a taumata lal᷊eo wuṛṛu mangallangnga taumata tawe sal᷊ane.

⁶ Amungkangngu taumata woddo mabbisara, i tou mandantan pattatiakka wuṛṛu nipuulla.

⁷ Wisaran taumata woddo maawinasa watanganne; i tou niasongngan bisarane sassane.

⁸ Aal᷊uandaga udde matemangnga pendamanna; taumata apulune mangalluppa.

⁹ Taumata apan tawe manginsue manarane al᷊eone nassul᷊ungngu taumata apan apulune manggohakka.

¹⁰ Mawu udde naal᷊ihidda menara apan matohassa; ete poiaroddi taumata matul᷊idda inai wuṛṛu maasomba tampa apan mal᷊angnganna.

¹¹ Arawe taumata ala massunna tumba'u darotongnga apan ual᷊u'adda si tou naal᷊ihidda tanda'a watu matanggakka wuṛṛu matohassa uapal᷊iwutta soa.

¹² Taumata mawunga sarun manawo, taumata masaṛṛionto'a sarun addatanna.

¹³ Sumimbakka tantal᷊anna taambe naddaringikka eteudde inolaanna apan longonna wuṛṛu iapaasal᷊a.

¹⁴ Ringannu apulu mabbiakka, taumata wotongnge mamasanna asasusa; nawul᷊ite apulu udde, nawul᷊ite al᷊awo'u antimma.

¹⁵ Taumata mapia sidutu maroun asingkatta; taumata pande sidutu mappulu masomba al᷊aṛṛa'a.

¹⁶ Lal᷊antakku maawu'a lal᷊anna wuṛṛu manguntuddu taumata ringannu manga tembonanne.

¹⁷ Mabbawisara paarorone sulal᷊ummu pallaṛṛuungnga sidutu nellehanna naṛṛino, arawe wisarane mannattakke iannamma amungkangu ro'amme rumantate.

¹⁸ Ringannu iundi, patatiakka wotongnge insueanna, ewe'e lai patatiakka suwallattu taumata pia taṛṛino wotongnge insueanna.

¹⁹ Tuṛṛangnga apan buatte nilessa naungnge masahadde undanianna wuassu soa apan matohassa; patatiakka naal᷊ihidda arussan ngaran soa apan pia tanta'a watune.

²⁰ Su manga wisara apan buatte niwisara pia pangillul᷊eanna apan apendamanna.

²¹ Lila pia taṛṛino manal᷊amatta pabbiaṛṛanna ara'e manggohakku pabbiaṛṛanna; taumata ṛinone mamasanna pangillul᷊eannu wisarane.

²² Iapa esakka apan naasomba awingnge, maasomba auntunganna; awingnga uddewe aongngollu Mawu.

²³ Taumata asiangnga maddorongnga ringannu addatta; taumata ala sussimbakka ringannu mammuṛṛeangnga.

²⁴ Pia gawe apan tawe satia, pia lai gawe apan mappianne wuassu tuṛṛangnga.