AMSAL 13 - WUKE SUSI WATTI'U AL᷊AL᷊USASSA

¹ Ana'a apan pande uararingikka napawe iamangnge mangonggollu atatantiro; taumata mawunga maddiri tagguanna.

² Wisaran taumata mapia mandantan auntunganna; taumata taṛṛa l᷊inga apulune su araṛṛagissa.

³ Taumata apan maaddunna sulal᷊ummu wisarane sarun mal᷊angnganna wiakke; taumata apan walate wisarane sarun aṛṛiaannu asasilaka.

⁴ Iapa malassa apulune manambo arawe saran sambau tawe naompaanne; taumata apan mammanara maṛṛimadda maasomba sarangkanambone apan ipaapulune.

⁵ Taumata matul᷊idda maddantinnu awusu, pallal᷊aghun taumata lal᷊eo maasili wuṛṛu nassal᷊a.

⁶ Atatul᷊idda uasirungnga taumata apan mabbiakka ṛinone; al᷊al᷊eo maaṛṛimunsa'a taumata marosa.

⁷ Piaddu mattanno ere taumata ala, arawe tawe darotongnge; piaddu mattanno ere taumata asiangnga, wutte'e ala marasai.

⁸ Taumata ala ṛinone mapasabbangngu roinne tadea'u wiakke matammudda; taumata asingnga nal᷊iu wuassu hol᷊aga.

⁹ Taumata susi naal᷊ihidda semakka lullansiangnga; taumata lal᷊eo naal᷊ihidda sol᷊o nappadumma.

¹⁰ Atatanggakka tumba'u mandantan pabbawawul᷊o; taumata pande mappulu manengkamma al᷊aṛṛa'a.

¹¹ Paa'ala apan niasombanganne ringannu hampa sarun mal᷊ihakka lai mahaingnga; arawe darotongnga apan niammulla paaddio'a sarun aatambanna.

¹² Amungkangngu antimma tawe nautunganna, naungnga massusa; amungkangngu apulun naungnga niautunganna, naungnga lulluassa.

¹³ Taumata apan mangngaddio'a al᷊aṛṛa'u Mawu, mannilaka watanganne; taumata apan matuṛṛutta titan Duata sarun maasomba lal᷊antakke.

¹⁴ Al᷊aṛṛa'u taumata pande naal᷊ihidda al᷊iwombongngu lal᷊umanna'a; napawe piaddu manggol᷊aga, al᷊aṛṛa'a udde mannal᷊amatta.

¹⁵ Taumata pia buddine sarun raloanna; taumata apan tawe apangimananna sarun mabbiakka susa.

¹⁶ Taumata pande maṛṛingidda dorone tantal᷊anna taambe na'ola'a; taumata woddo mappal᷊a'unnu awawoddone.

¹⁷ Daroloṛṛanna apan longonna mandantan asasilaka; daroloṛṛanna apan apangimananna mannal᷊amatta auntunganna.

¹⁸ Taumata apan maddiri aṛṛaanna maola'a asiangnga wuṛṛu masa'ina; taumata apan maddaringikka tatantiro sarun addatanna.

¹⁹ Apiawe eteapa amungkangngu maasomba apa apan ipaapulu! Taumata woddo maddiri mabbal᷊i'a wuassu al᷊al᷊eo.

²⁰ Taumata apan uahahawen taumata pande, sarun maola'a pande; taumata apan uahahawen taumata woddo, sarun masilaka.

²¹ Taumata marosa sidutu a'enggenannu asasilaka taumata mapia sidutu manengkamma lal᷊umanna'a.

²² Taumata mapia mannantangngu pussa'ane su ana'a pulunne; paa'alan taumata marosa sahipunanna maola'a tatahuannu taumata apan matul᷊idda wiakke.

²³ Leta'a tawe sasuanne wotongnge mangonggollu anna manambo su taumata asiangnga; arawe pallal᷊inga ma'ola'a leta'a udde tawe wail᷊anna.

²⁴ Tawe manggesekka ana'a, atappasanne tawe marangngu si tou; amungkangngu marangngu, ṛinone waṛṛani manggesekka si tou.

²⁵ Taumata apan mapia sidutu su asasuungnga, arawe taumata lal᷊eo sidutu su awussa.