AMOS 9 - WUKE SUSI WATTI'U AL᷊AL᷊USASSA

Sondappa su ola'u ṛuumanna wuassu Mawu

¹ I ya'u naasilo Mawu uarisikka maranin mezbah. I Tou nangonggollu parenta indi, “Puulle pa'ikka-ikkatta manga puan diṛṛi su Wal᷊e-U tadea'u ahewallu panumbal᷊ene umio'a. Paṛṛaa'e manga diṛṛi udde su puan manga taumata. I mangitou apan tawe mate sarun Ta'u pateanna sulal᷊ummu pangalo. Tawe saran sangkatou apan tawe maatal᷊angngu watanganne, tawe saran sangkatou apan maal᷊aassangnga.

² Salaiwe i mangitou sumuṛṛi inai watukku runian taumata nate, i Ya'u sarun mamol᷊engnga si mangitou. Salaiwe i mangitou ire'e umawitta su langitta, i Ya'u sarun manossokki mangitou wua poiaroddi.

³ Amungkangngu i mangitou ma'imbuni su puiddu Wowon Karmel, i Ya'u sarun maddea'a wuṛṛu manametta si mangitou. Amungkangngu i mangitou ma'imbuni su ṛanassu tahal᷊oangnga, i Ya'u sarun mamarenta nagan tahal᷊oangnga iapapul᷊iasa si mangitou.

⁴ Amungkangngu i mangitou niatawannu seetta, i Ya'u sarun mamarenta tadea'u i mangitou pateanna. I Ya'u naddiandi tadea'u manginsue si mangitou, wuṛṛu sarun tawe massumbala si mangitou.”

⁵ Runia niumio'a wuṛṛu tumanangnge massusa, ana waugu nieṛṛetannu Mawu Apan Atanggaṛṛanne wuṛṛu Lembontaṛṛino. Naal᷊ihidda Sal᷊ukku Nil mattingkulla see umeṛṛotta aroddi lai mangitou wua suma'e see manawo.

⁶ Mawu namangunna wal᷊e-Ne marau su winalanganna, su wowon dunia i Tou nantaingngu langitta maola'a sasirungnge, wuṛṛu ua'e wuassu tahal᷊oangnga nilal᷊in-Ne su ammaranne, apan na'ola'a sarangkanambone udde aran-Ne eteudde Mawu!

⁷ Mawu nabbisara, “Ei umattu Israel, i Ya'u mannutukka taumatan Sudan uasul᷊ungnga ere lai i Ya'u mannutukka si yamiu. I Ya'u buatte nangapiddu taumatan Filistin wuassu Kreta wuṛṛu taumatan Siria wuassu Kir uasul᷊ungnga ere lai i Ya'u nangapiddi yamiu wuassu Mesir.

⁸ I Ya'u, Mawu Apan Atanggaṛṛanne, tantal᷊anna ma'uwasi araratuannu Israel apan marosa indi, wuṛṛu i Ya'u sarun mamappassa wuassu wowon dunia. Arawe papapulunni Yakub tawe sarangkanambone Ta'u pateanna. I Ya'u, Mawu, buatte nabbisara.

⁹ I Ya'u sarun mangonggollu parenta wuṛṛu mattappa walahannu Israel ere taumata mattappa gandumma sulal᷊ummu niṛṛu. Su ipanahangginna sarangkanambone apan tawe gunane suwallatti yamiu, i Ya'u sarun malluakki mangitou suwallattu manga walahanna.

¹⁰ Manga taumata marosa suwallattu uma-U nabbisara, ‘Ruata tawe mamalan kite aṛṛiaannu asasilaka.’ Arawe, wutte'e i mangitou sarun pateanna sulal᷊ummu pangalo.”

Israel sarun isul᷊e apia olangnge

¹¹ Mawu nabbisara, “Sarun a'omanna tempone i Ya'u manul᷊en araratuanni Daud. Orassa indi araratuanna udde nabbal᷊ite ere wal᷊en apan naṛṛa'a. Arawe manga darandungnge sarun Ta'u apianna wuṛṛu iapararisikka apia ma'oman sara mabbal᷊i ere paarorone.

¹² Taumatan Israel sarun mangagassa wanua Edom apan ta'e nallambe see anambon walahanna apan dorone tatahuanang-Ku. I Ya'u, Mawu, buatte nabbisara wuṛṛu i Ya'u sarun mapaamattu olangnge udde.”

¹³ Mawu nabbisara, “Sarun a'omanna tempone gandumma sarun tumuwo aroddi al᷊ihakke na'oman sara tempon pangangitingnga tawe bassunne. Punnu anggore sarun tumuwo aroddi al᷊ihakke na'oman sara taumata sidutu ma'ola'a ua'en anggore. Ua'en anggore sarun tumuro wuassu manga wowone wuṛṛu mangelekka wuassu manga wuidda.

¹⁴ I Ya'u sarun ma'ola'a uma-U Israel mal᷊angnganna apia. I mangitou sarun mapararisikka apia manga soan mangitou apan nassongkakka, ana see i mangitou matana'a poiaroddi. I mangitou sarun massuanna manga wawail᷊annu anggore, wuṛṛu ma'inumma anggorene. I mangitou sarun mabbailla, wuṛṛu umanna pabbawuan inasaharanne.

¹⁵ I Ya'u sarun mapatana'u uma-U su wanua apan buatte Ta'u nionggolla si mangitou. I mangitou tate lai wambanganna wua poiaroddi. I Ya'u Mawu Ruatan mangitou buatte nabbisara.”