AMOS 7 - WUKE SUSI WATTI'U AL᷊AL᷊USASSA

SONDAPPA SU OLA'U ṚUUMANNA WUASSU Mawu Saṛṛappalanna

¹ I ya'u naasomba sondappa wuassu Mawu Apan Atanggaṛṛanne. I ya'u naasilo i Tou nandiaddi sambau ammul᷊annu saṛṛappalanna apan manambo sutempo taumata nuddusse namabbassa nannal᷊o ionggolla su ratu, wuṛṛu nannal᷊o wakku mannattakke tuttuwo apia.

² Manga saṛṛappalanna udde mangke maranin manginsue anambon sinuananna su leta'a. Wua'udde i ya'u nabbisara, “Mawu Apan Atanggaṛṛanne, ampungewe uman-Nu! I mangitou tumaniten addio'a wuṛṛu lome, ereapa wotongnge i mangitou maataṛṛangnga?”

³ Mawu namal᷊u ṛiin-Ne wuṛṛu nabbisara, “Apan niasiloannu udde tawe mariaddi.”

Putungnga

⁴ I ya'u naasomba sambau sondapa wuassu Mawu Apan Atanggaṛṛanne. I ya'u naasilo i Tou tantal᷊anna uasasaddia makkuumannu uman-Ne ringannu putungnga. Putungnga udde nangpodda na'oman sara nasue laudda su al᷊ungngu runia wuṛṛu mannattakke mangngepoddu wawail᷊anna.

⁵ I ya'u nabbisara, “Oh Mawu Apan Atanggaṛṛanne, sal᷊andeanna illol᷊oa'e putungnga udde! Uman-Nu aroddi addio'a wuṛṛu lome, ereapa wotongnge i mangitou maataṛṛangnga?”

⁶ Mawu namalu ṛiin-Ne apia wuṛṛu nabbisara, “Indi lai sarun tawe mariaddi.”

Tal᷊i auukka uarisikka matul᷊idda

⁷ I ya'u naasomba sambau sondapa wuassu Mawu. I ya'u naasilo i Tou uarisikka su sandiṛṛannu sambau sarandungnga apan niola'a ringannu nappaattu tal᷊i auukka uarisikka matul᷊idda. Su lima-Ne i Tou uaagassa tal᷊i auukka udde tadea'u ipa'ellega tanne darandungnga udde matul᷊idda ara'e tawe.

⁸ I Tou naiwal᷊o si ya'u, “I'o ma'ellega apa, Amos?” I ya'u sinumimbakka, “Tal᷊i auukka uarisikka matul᷊idda, Mawu.” Wua'udde Mawu nabbisara, “I Ya'u mappaattu tal᷊i auukka indi tadea'u ipamasingkatta manungku uma-U ere darandungnga apan wengkolla. I Ya'u tate mamal᷊u ṛiing-Ku apia. I Ya'u sarun makkuumanni mangitou.

⁹ Manga tampa apan nipaattu papapulunni Ishak pattaṛṛa mawuanna sarun hoaṛṛanna. Manga tampa susin taumatan Israel sarun iapaaṛṛa'a. I ya'u sarun makkimunsa'a papapulunni Ratu Yerobeam.”

Amos wuṛṛu Amazia

¹⁰ Amazia, imam su Betel, nangirimmu aalae si Yerobeam ratun Israel, “Amos tantal᷊anna ma'iren tumanangnge tadea'u lumawangnga si Tuangnga. Manga hattone apan mammono'a tumana'u soa pangillul᷊eanne wanua indi maṛṛimunsa'a.

¹¹ I tou mabbisara manungku Tuangnga sarun mate sulal᷊ummu pangalo, wuṛṛu taumatan Israel sarun ṛumoanna watukku pamamuanganna, marau wuassu wanuane sassane.”

¹² Ana see Amazia nabbisara si Amos, “Ei nabi, apul᷊ete su Yehuda! Pannasete poiaroddi. Wal᷊a'e i mangitou mangonggollu anna si'o!

¹³ Imbaṛṛangnga mannase apia su Betel. Soa indi tumba'u hunan datu, wuṛṛu tampa patataṛṛamawuannu araratuanna.”

¹⁴ Amos sinumimbakka, “I ya'u wal᷊ine nabi ana waugu manara'u. I ya'u indi mamamaduli winatangnga wuṛṛu manani'o wuan ara.

¹⁵ Arawe Mawu nangal᷊appa si ya'u wuassu manara'u, wuṛṛu nandolo'u iapapasingkattu tanata-Ne su taumatan Israel.

¹⁶ Ne ana waugu udde paddaringgkke apa apan iwabbal᷊on Mawu si'o. Ana waugu i'o manninga'u mannase manal᷊are walahannu Israel.

¹⁷ Mawu nabbisara manungku awingngu sarun mabbal᷊i wawine masandaga su manga lal᷊annu soa, wuṛṛu manga anangngu pateanna sulal᷊ummu pangalo. Letangngu sarun tahianna apan tawe maaillal᷊a Mawu. Tumana'u Israel sarun ṛuwoanna watukku pamamuanganna, marau wuassu wanuane sassane.”