AMOS 6 - WUKE SUSI WATTI'U AL᷊AL᷊USASSA

Israel naṛṛimunsa'a

¹ Nasilakate i yamiu apan mabbiakka matemangnga su Sion, wuṛṛu i yamiu apan uapendamma mal᷊angnganna su Samaria – i yamiu ei manga matatimmaddu walahannu Israel apan apianne indi, i yamiu apan inanaramanne raddantannu tumanangnge paddoronganna tul᷊unganna!

² Roote pa'ellega su Kalne, wua'udde asal᷊ate amatta watukku Soa Hamat apan wahewalla udde, wua'udde wuatukku soa Gat su Filistin. Sunnanu manga soa udde mappianne wuassu araratuannu Yehuda wuṛṛu Israel? Apa wageangngu leta'i mangitou maggewal᷊anna wuassu wageangngu letangngu?

³ I yamiu mangke mangngimanna manungku allon asasilaka ta'e marau, arawe manga inolaannu tumba'u mapaal᷊ihakku darantane allon araṛṛagissa udde.

⁴ Nasilakate i yamiu apan mattiilla su lallowanganna apan mangkapia wuṛṛu maandeangngu ṛemessu sapi wuṛṛu domba apan ta'e saṛṛen tumuwo!

⁵ I yamiu lulluassa mangngarangu antari, ere buatte niola'i Daud, wuṛṛu i yamiu mannalangngu antari udde ringannu kecapi.

⁶ I yamiu ma'inumma anggore wuassu halasi apan nilal᷊inanna napene, wuṛṛu i yamiu mappaattu lana mawangngi apan apianne, arawe i yamiu mappaattu lana mawangngi apan apianne, arawe i yamiu tawe masusa naungnge su ola'u ola'u araṛimunsa'u Israel.

⁷ Ana waugu udde ete i yamiu apan paarorone sarun ṛuwoanna watukku pamamuanganna. Manga andeangnga wuṛṛu manga sal᷊iwangngu sarun masue.

⁸ Ringannu maṛṛagissa Mawu Apan Lembontaṛṛino wuṛṛu Atanggaṛṛanne buatte nangonggollu pananaungnga indi, “I Ya'u maddantinnu atatanggakku umattu Israel; i Ya'u tawe mal᷊uassa ringannu manga wal᷊en araratuanni mangitou apan mangkapia. Inangngu soan mangitou ringannu sarangkanambone apan sulal᷊umme sarun Ta'u itantilla su seetta.”

⁹ Amungkangngu ta'e pia siri mapul᷊o su atoune apan uaimbuni sulal᷊ummu sambau wal᷊en, i mangitou sarun mate lai.

¹⁰ Sangkatou reengannu amonanna apan mammanara pallal᷊abbinge, sarun dumanta wuṛṛu mangapidda su liuddu winal᷊uanannu tuṛṛangnge. I tou sarun mangintul᷊i su taumata apan poi su liuddu wal᷊en udde, “Apa ta'e piaddu wiakka wal᷊ine wuassi'o?” Ne sarun aringiṛṛanna sasimbakke, “Tate!” Reengannu amonanna mammanara mallabbingu winal᷊unanna udde sarun mabbisara, “Imbaṛṛangnga mabbisara apia! I ite tawe wotongnge managgon arannu Mawu.”

¹¹ Napawe Mawu mangonggollu parenta, manga wal᷊en wahewalla wuṛṛu maraddio'a sarun hoaṛṛanna.

¹² Wotongngewe awal᷊o tumal᷊angnga su wuiddu watu? Apa buatte taumata mammajeko tahal᷊oangnga ringannu sapi? Arawe i yamiu buatte namal᷊elongngu atatul᷊idda naola'a sukkatta apan naapate, wuṛṛu iapa naṛṛino maola'a nassal᷊a.

¹³ I yamiu mattal᷊imoṛṛonganna manungku i yamiu buatte namaddon Lodebar. I yamiu lai mabbisara, “I yami ta'e matohassa inai mangaṛṛo Karnaim.”

¹⁴ Mawu Apan Atanggaṛṛanne wuṛṛu Lembontaṛṛino sassane nabbisara, “Umattu Israel, i Ya'u sarun mangirimmu tantara wuassu sambau walahannu raho iapapangalo wanuannu. I mangitou sarun manansara si yamiu wuassu lal᷊anna watukku Hamat su sawannakka maddatingngu Wawal᷊aannu Araba su timukka.”