AMOS 5 - WUKE SUSI WATTI'U AL᷊AL᷊USASSA

Bawaggo tadea'u mawal᷊u

¹ Paddaringikke ei umattu Israel! I Ya'u mangantararite si yamiu sambau aantarin lullal᷊o:

² Nanawote Israel apan ta'e parawanna, i tou sarun tate maarisikka apia! Su wowon letangnge sassane i tou niwala taweddu massumbala si tou dumarisikka.

³ Mawu Apan Atanggaṛṛanne nabbisara, “Sambau soa su Israel napaasabbangngu saṛṛiwu su atoune tantara, arawe apan nawelengnga tumba'u maṛṛasutta; soa apan apan waine napaasabbangngu maṛṛasutta su atoune, apan nawelengnga tumba'u mapul᷊o.”

⁴ Mawu nabbisara su umattu Israel, “Pabbelengke ringang-Ku, ne i yamiu sarun mabbiakka.

⁵ Imbaṛṛangnga inai watukku Bersyeba mattaṛṛamawu. Arie maddea'a si Ya'u su Betel, ana waugu Betel sarun mawuli. Arie lai inai watukku Gilgal, ana waugu taumana'u soa udde sarun ṛuwoanna watukku pamamuanganna.”

⁶ Pabbelengke ringannu Mawu, ne i yamiu sarun mabbiakka. Amungkangngu i yamiu tawe mabbelengnga ringanni Tou, i Tou sarun dumanta ere putungnga apan lullewa wuṛṛu manoṛṛobba taumatan Israel ma'oman sara masue. Su Betel tawe saran sangkatou apan wotongnge mamaddumma putungnga udde.

⁷ Nasilakate i yamiu, i yamiu apan mammal᷊elongngu atatul᷊idda wuṛṛu mandal᷊eo pabbiaṛṛannu taumata!

⁸ Ete Mawu apan na'ola'a manga anumpitanna su winalanganna – anumpitanna Belantik wuṛṛu anumpitanna Kartika. I Tou namal᷊u ararandumma nabbal᷊i asasemakka wuṛṛu allo nabbal᷊i ṛabbi; ua'e wuassu tahal᷊oangnga nilal᷊in-Ne su ammaranne. Apan na'ola'a sarangkanambone udde aran-Ne eteudde Mawu.

⁹ I Tou namate taumata uataṛṛino suadio'a ringannu tanda'a watun mangitou.

¹⁰ I yamiu maddantinnu taumata apan mannal᷊are atatul᷊idda wuṛṛu apan mabbisara ringannu atonna su pallaṛṛuunganna.

¹¹ I yamiu mangngallanga taumata asiangnga wuṛṛu gandumme niaṛṛon kamiu. Ana waugu udde i yamiu sarun tawe maatana'a sulal᷊ummu manga wal᷊enu apan mapia, apan buatte niapararisikki yamiu udde. I yamiu sarun tawe ma'inumma anggore wuassu manga wawail᷊annu anggore apan nisuanni yamiu.

¹² I ya'u masingkatta aroddi ahewalle al᷊al᷊aeonu wuṛṛu aroddi anambone rosanu. I yamiu mangngallangnga taumata mapia; i yamiu mannengkamma roittu aonggolla wuṛṛu namalan taumata asiangnga a'olaanna ringannu tawe atatul᷊idda su pallaṛṛuunganna.

¹³ Ana waugu pallal᷊agunu udde, ne manga taumata apan pande mammendamma mappianne uatatana'a mal᷊annabba sutempo apan dal᷊eo ereudde.

¹⁴ Pattinsahadde ma'ola'a apapia wuṛṛu imbaṛṛangnga ma'ola'a al᷊al᷊eo, tadea'u i yamiu wiakka. Ne Mawu Apan Lembontaṛṛino sarun atonna-tonna matana'a suwallatti yamiu ere buatte niwasaran kamiu.

¹⁵ Arantinten al᷊al᷊eo, pandangute apapia, wuṛṛu amata'e su atatul᷊idda. Asinungka Mawu sarun umakkannu manga taumata lambene wuassu walahannu Israel.

¹⁶ Mawu Apan Lembontaṛṛino nabbisara, “Su manga lal᷊annu soa, taumata sarun sumangitta wuṛṛu sumal᷊iomanna ana waugu masusa. Ewe'e lai manga mabbawailla lai sarun waggoanna iapal᷊uai suadio'a ringannu manga taumata apan niwaeṛṛanna lumuain taumata nate.

¹⁷ Su anambon waillu anggore, taumata sarun lumuai ana waugu i Ya'u nirumanta wuṛṛu makkuumanni yamiu. I Ya'u, Mawu, buatte nabbisara.”

¹⁸ Mangke atonna nasilakate i yamiu apan uaṛṛaddo allon Mawu! Apa hunane allo udde si yamiu? Allo udde tumba'u allo apan marandumma, wal᷊ine allo apan masemakka si yamiu.

¹⁹ Olangnge naal᷊ihidda taumata apan tinumal᷊angngu watanganne wuassu singa, arawe nassomban beruangnga. Arawe ere taumata apan napul᷊e watukku wal᷊en wuṛṛu nangunsandakku limane su darandunga, ana see nipul᷊issu atonna!

²⁰ Allon Mawu atonna mandantan ararandumma, wal᷊ine asasemakka – allo mal᷊abbukka apan pia dallamme.

²¹ Mawu nabbisara, “I Ya'u maddantinna wuṛṛu mattaṛṛa muta ma'ellega manga ramean agamanu!

²² Amungkangngu i yamiu mangapiddu sasamba itattambunna wuṛṛu gandumma, i Ya'u maddiri manengkamma. I Ya'u maddiri manengkamma manga winatangngu apan mangkatawa udde apan ionggolli yamiu si Ya'u maola'a sasamban paddareme.

²³ Taala'e manga antarinu apan maawengella udde; i Ya'u maddiri maddaringikka i yamiu mannalangnga kecapi.

²⁴ Mappianne, pattinsahadde tadea'u atatul᷊idda mangelekka ere ua'e, wuṛṛu apapia ere sal᷊ukka apan tawe umatti.

²⁵ Ei umattu Israel, sutempo i Ya'u nanghetta si yamiu niumamatta su wadda'u anne appatu pul᷊o su tonnane al᷊annune, i Ya'u tawe naddorongnga sasamba wuassi yamiu.

²⁶ Arawe orassa indi i yamiu massubba si Sakut apan sassubbanni yamiu ratunu udde, wuṛṛu Kewan, winatangnga apan sassubbanni yamiu udde. Ana waugu udde manga arca apan buatte nilanginni yamiu udde ṛuwoanni yamiu sassane.

²⁷ Amungkangngu i Ya'u mandammen kamiu su sambau wanua apan marau su Damsyik. I Ya'u Mawu aranne Ruata Apan Lembontaṛṛino buatte nabbisara.”