AMOS 4 - WUKE SUSI WATTI'U AL᷊AL᷊USASSA

¹ Paddaringikke, ei manga wawinen Samaria apan aatambanna atawane ere manga sapi matawa su Basan! I yamiu mangngallangnga taumata lome, mammoddo taumata asiangnga, wuṛṛu maddorongnga tadea'u awingngu sidutu mannaddia ua'e maawu'anna si'o!

² I Ya'u, Mawu Apan Atangngaṛṛanne uddewe Mawu apan susi, wuṛṛu i Ya'u sarun maddiandi manungku sal᷊immurine i yamiu wol᷊engannu aaitta; i yamiu sarangkanambone naal᷊ihidda inassa su pe'anna.

³ I yamiu sarun wolenganna watukku Hermon wuṛṛu ituntungnga su liudde, sangkatou-sangkatou wuassu loṛṛangngu darandungnga apan aranianne. I Ya'u Mawu buatte nabbisara.”

Israel maddiri maddaringikka

⁴ Mawu Apan Atanggaṛṛanne nabbisara, “Ei umattu Israel! Roote watukku tampa patataṛṛamawuanna su Betel, wuṛṛu pa'ola'e rosa isudde! Roote watuku Gilgal, wuṛṛu pa'ola'e rosa walate apulun naungngu! Pangonggollen sasamba suapan marua allo, wuṛṛu pangapiddu sepere mapul᷊o wuassu al᷊awo'u hessin inasaharannu suapan tallu allo!

⁵ Pangonggollen roti maola'a aadiangkamannu si Ya'u, wuṛṛu pattal᷊imoṛṛongante manungku i yamiu buatte nangapiddu tatimun sasamba! Eteudde apan mal᷊uassa a'olaanni yamiu!

⁶ Ete i Ya'u apan mandantan al᷊aṛṛutumma su anambon soanu, arawe i yamiu maddiri mabbelengnga ringang-Ku.

⁷ I Ya'u namo'a uranna mangansalla sutempo sinuanannu tumaniten mappandumma ua'e. I Ya'u nanossokku uranna su soa apan sambau wuṛṛu wal᷊ine su soa apan waine. Wawail᷊anna sambau na asomba aansallu urana, ewe'e wawail᷊anna waine mamara-mara.

⁸ Su manga pira soa, tumanangnge nallometen ararou, maddea'a ua'e su soa waine, arawe ua'e isudde tawe mattiudda. Salaiwe aroddi, i yamiu ta'e lai maddiri mabbelengnga ringang-Ku.

⁹ I Ya'u napaatiuppu anginna mal᷊oso wuṛṛu nangirimmu radda'u sasuanna apan mamate manga sasuanna see manga wawail᷊annu anggori yamiu. Manga alu ara, wuṛṛu manga allun zaitun nasuete nitaṛṛangassu saṛṛappalanna. Salaiwe aroddi i yamiu ta'e lai maddiri mabbelengnga ringang-Ku.

¹⁰ I Ya'u nangirimmu al᷊aṛṛusa'itta si yamiu ere lai Ta'u niiringnga su Mesir. Manga taumata saṛṛen tumuwo Ta'u nipate sulal᷊ummu pangalo, wuṛṛu manga awal᷊onu niaṛṛo. I Ya'u nalloṛṛo paddasanannu ringannu manga winal᷊uananna apan hal᷊urune maataddu'a ngirunna. Salaiwe aṛṛoddi, i yamiu ta'e lai maddiri mabbelengnga ringang-Ku.

¹¹ Sambageanganna wuassi yamiu Ta'u pateanna ere lai i Ya'u namate Sodom wuṛṛu Gomora. Apan ta'e wiakka suwallatti amia uddewe naal᷊ihidda anutungnga sampaddi apan nianu wuassu putungnga. Salaiwe aroddi i yamiu ta'e lai maddiri mabbelengnga ringang-Ku.

¹² Ana waugu udde, ei umattu Israel, i Ya'u sarun makkuumanni yamiu. Nariaddi, pandiahite sumaruanna ṛuumanna apan Ta'u iema'a si yamiu!”

¹³ Wowone wuṛṛu anginna, ete Mawu apan mandariaddine; ṛiin-Ne niapasingkan-Ne su taumata. I Tou na'ola'a aallo wuṛṛu ṛabbi su wowon manga puiddu runia i Tou u'amatta. Mawu Ruata Apan Lembontaṛṛino, uddewe aran-Ne.