AMOS 3 - WUKE SUSI WATTI'U AL᷊AL᷊USASSA

¹ Paddaringikke tanatan Mawu indi, ei walahannu Israel apan buatte niapiddu Mawu sinumabbangnga wuassu Mesir! Mawu nabbisara,

² “Wuassu anambon walahanna su runia, ete i yamiu sassane walahanna apan asingkatang-Ku wuṛṛu lal᷊u'arang-Ku. ana waugu udde rosanu wahewalla, wuṛṛu i Ya'u sarun makkuumanni yamiu.”

Manaran nabi

³ Wotongngewe ruang katou apan inai umamatta marau ringannu tawe ma'ire paarorone?

⁴ Apa singa su mahurangnge mammassingnga, amungkangngu i tou taambe naasomba inassa? Apa ana'u singa mammasingnga sulal᷊ummu loṛṛangnge amungkangngu i tou taambe naasametta manga apa?

⁵ Apa manu'u winalanganna nasongnga sulal᷊umu sedda, amungkangngu sedda udde tawe itaingnga? Apa sedda mawa'issa amungkangngu taweddu niasametta?

⁶ Apa taumata su soa tawe mangiladda amungkangngu maaringikka tingikku trompetta tatialan pangalo? Wotongngewe sambau soa aṛṛiaannu asasilaka, amungkangngu Mawu tawe mandantan asasilaka udde?

⁷ Mawu Apan Atanggaṛṛanne taambe saran paassa mapaamattu sambau manara ringannu tawe mamasingkattu ṛiin-Ne su manga nabi, manga allang-Nge.

⁸ Amungkangngu singa mammassingnga, isaite apan tawe mata'utta? Napawe Mawu Apan Atanggaṛṛanne mabbisara, isai apan wotongnge mal᷊annabba wuṛṛu tawe masingkattu tanata-Ne?

Ananawon Samaria

⁹ Al᷊iata'e su anga taumata apan uatana'a su wal᷊en araratuannu Mesir wuṛṛu Asdod, “Paammulle su manga wowone maranin Samaria, wuṛṛu panutukke aal᷊iba'ukka apan wahewalla see pangangallangnga apan niola'a poiaroddi.”

¹⁰ Mawu nabbisara, “Manga taumata udde nalloṛṛo manga wal᷊en araratuanni mangitou ringannu manga saranapa apan nisombanganni mangitou wuassu pangangalangnga wuṛṛu araṛṛagissa. Ewe'e lai manga inolaanni mangitou tawe matul᷊idda.

¹¹ Ana waugu wanuan mangitou sarun pangaloannu seetta, tanda'a watun mangitou rimunsaanna, wuṛṛu manga wal᷊en araratuanni mangitou aṛṛoanna.

¹² Naal᷊ihidda sangkatou mallal᷊u'adda winatangnga apan naasangkalla tumba'u sampare ledda ara'e sampoto tal᷊ingan dombane apan buatte niaṛṛattu singa, aroddi lai tumba'u addio'a apan sarun matantangnga wuassu tumana'u Samaria apan orassa indi matema-temangnga mattiilla su lallowanganne apan mapia.”

¹³ Mawu Apan Lembontaṛṛino wuṛṛu Atanggaṛṛanne nabbisara, “Panutukke orassa indi, wuṛṛu tagguete papapulunni Yakub.

¹⁴ Su allo i Ya'u makkuumannu taumatan Israel ana waugu rosane, i Ya'u sarun maṛṛimunsa'a manga mezbah su Betel. Suapan mezbah sarun paddianna manga diṛṛine ma'oman sara maṛṛa'a su leta'a.

¹⁵ Manga wal᷊en hunan tempon masunge wuṛṛu manga wal᷊en pangillol᷊oanna sutempon paddissa sarun Ta'u hoaṛṛanna. Manga wal᷊en apan nilogaṛṛannu gadinga sarun maṛṛa'a; anambon wal᷊en apan wahahewalla sarun maṛṛimunsa'a.