AMOS 2 - WUKE SUSI WATTI'U AL᷊AL᷊USASSA

Moab

¹ Mawu nabbisara, “Tumana'u Moab masokkate ma'ola'a rosa, ana waugu udde i Ya'u sarun makkuumanni mangitou. I mangitou mallobbossa si Ratun Edom apan natete ude; ringannu namongkakku labbingnge see nanganu manga duṛṛine wuṛṛu nitambunna nabbal᷊i awu.

² Ana waugu udde, i Ya'u sarun mangirimmu putungnga watukku wanua Moab, wuṛṛu manoṛṛobba ma'oman sara masue tanda'a watu su Keriot. Taumatan Moab sarun mate su pattangngannu paggahahion pangalo, tantal᷊ana trompetta iapatuntingikka, wuṛṛu hahuressan pangalo ipangikkuitta.

³ Tembonannu Moab wuṛṛu anambon tembonannu araratuanne sarun Ta'u pateanna.”

Yehuda

⁴ Mawu nabbisara, “Taumatan Yehuda masokkate ma'ola rosa, ana waugu udde i Ya'u sarun makkuumanni mangitou. I mangitou nilumawangnga manga parenta-U wuṛṛu tawe maddaringika manga al᷊aṛṛa-U. I mangitou nilamamiṛṛannu manga mawu waine apan sassubbannu al᷊amonan mangitou.

⁵ Ana waugu udde, i Ya'u sarun mangirimmu putungnga watukku Yehuda wuṛṛu manoṛṛobba ma'oman sara masue manga tanda'a watu su Yerusalem.”

Ṛuumannu Ruata su Israel

⁶ Mawu nabbisara, “Taumatan Israel masokkate ma'ola'a rosa, ana waugu udde i Ya'u sarun makkuumanni mangitou. Taumata matulidda apan tawe maawelengngu awallanne, buatte niwal᷊u'i mangitou maola'a allangnga Arodi lai inolaanni mangitou su taumata asiangnga apan tawe maawaekka awallanne, salaiwe awallassa udde tumba'u ere areggan sampare silope.

⁷ I mangitou mangngallangnga taumata lome wuṛṛu tawe maal᷊ore, wuṛṛu nallinbuakka taumata asiangnga. Iamangnga wuṛṛu ana'a natatamban allangnga wawine apan uasul᷊ungnga, na'oman sara nandal᷊eo arang-Ku, apan susi.

⁸ Suapan tampa patataṛṛamawuanna, manga taumata mattiilla ringannu laubba apan nianun mangitou maola'a wataṛṛun awalassu taumata asiangnga. Su Wal᷊en Ruatan mangitou, i mangitou ma'inumma anggore apan nianun mangitou wuassu taumata apan pia awallassa si mangitou.

⁹ Salaiwe aroddi, ei uma-U, ete ana waugu i yamiu i Ya'u namate taumatan Amori apan mal᷊angkassa ere punnu cemara wuṛṛu matohassa ere punnu terpentin.

¹⁰ I yamiu buatte Ta'u niapidda sinumbangnga wuassu Mesir, wuṛṛu Ta'u niehetta niumamattu wadda'u anne appattu pul᷊o su tonane al᷊annune. Leta'u taumatan Amori buatte Ta'u nionggolla si yamiu maola'a wanuanu sassane.

¹¹ I Ya'u buatte namile manga pira wuassu al᷊aṛṛanangngu tadea'u maola'a nabi, wuṛṛu manga pira taumata saṛṛentumuwo tadea'u maola'a taumata Mandariaga. Wal᷊inewe udde atonna, ei taumatan Israel? I Ya'u, Mawu buatte nabbisara.

¹² Arawe i yamiu nangonggollu ua'e anggore su taumata Nazir, na'oman naaola'a si mangitou nilumawangnga paaire. Wuṛṛu i yamiu manningaddu manga nabi mamasingkattu tanata-U.

¹³ Orassa indi i yamiu sarun Ta'u itaddilla sara leta'a, na'oman sara i yamiu sumal᷊iomanna ere kereta apan nabbowon luranna gandumma.

¹⁴ Tumatal᷊angnga apan mal᷊ihakka lai sarun tawe maal᷊assangnga, taumata matohassa sarun awul᷊iannu ikkanne, wuṛṛu taumata waṛṛani tawe mapanal᷊amatta watanganne sassane.

¹⁵ Taṛṛa piti'a sarun tawe maataṛṛangnga, taṛṛa taṛṛa tal᷊angnga apan mal᷊ihakka sarun tawe maal᷊iun batanganne, wuṛṛu sumasa'e awal᷊o sarun tawe maal᷊assangnga.

¹⁶ Su allo udde tantara apan awaṛṛanianne lai sarun manantangngu lutangnge, wua'udde tumal᷊angnga. I Ya'u, Mawu buatte nabbisara.”