AMOS 1 - WUKE SUSI WATTI'U AL᷊AL᷊USASSA

¹ Amos uddewe sangkatou mallal᷊u'adda domba wuassu soa Tekoa. I tou naola'a nabi sutempo wanua Yehuda paprentanni Ratu Uzia, wuṛṛu Israel paparentanni Ratu Yerobeam, ana'i Yoas. Darua su tonnane tantal᷊anna taambe nariaddi linukka, Ruata namasingkatta si Amos manga inolaanna su ola'u Israel.

² Eteindi apan niapasingkatti Amos, “Mawu mangngintul᷊i wuassu Wuiddu Sion, tingik-Ke maddallu'a wuassu Yerusalem. Manga wadda'u nannal᷊o nabbal᷊i lol᷊okka, nannal᷊o su Wowon Karmel naṛṛangu naṛṛagassa.”

Ṛuumannu Ruata su manga araratuanna al᷊indongannu Israel Siria

³ Mawu nabbisara, “Tumana'u Damsyik masokkate ma'ola'a rosa, na waugu udde i Ya'u sarun makkuumanni mangitou. I mangitou mammarenta taumatan Gilead ringannu maṛṛagissa,

⁴ ana waugu udde i Ya'u sarun mangirimmu putungnga watukku wal᷊en araratuanni Ratu Hazael, wuṛṛu manoṛṛobba ma'oman sara masue manga tanda batun Ratu Benhadad.

⁵ Manga ngara wahewalla su Damsyik sarun Ta'u hoaṛṛanna, wuṛṛu tumana'u Wawal᷊annu Awen sarun Ta'u sahangginanna wuassu tampa atatanaanni mangitou. Tembonannu Bet-Eden sarun Ta'u iapasossokka wuassu aiananne, wuṛṛu tumana'u Siria sarun iatawanna wua'udde ṛuwoanna watukku wanua Kir.”

Filistin

⁶ Mawu nabbisara, “Tumana'u Gaza masokkate ma'ola'a rosa, ana waugu udde i Ya'u sarunmakkuumanni mangitou. I mangitou buatte naṛṛuwo sambau walahanna sarangkanambone, ana see niwal᷊u'a maola'a allangnga su taumatan Edom.

⁷ Ana waugu udde i Ya'u sarun mangirimmu putungnga watukku manga darandangngu Gaza, wuṛṛu manoṛṛobba paasueanna manga tanda'a watune.

⁸ Tumanangnge wuṛṛu tembonannu soa Asdod see Askelon sarun Ta'u wambanganna. Soa Ekron sarun Ta'u ittuumanna, wuṛṛu anambon lamben taumatan Filistin sarun Ta'u pateanna.”

Tirus

⁹ Mawu nabbisara, “Tumana'u Tirus masokkate ma'ola'a rosa, ana waugu udde i Ya'u sarun makkuumanni mangitou. I mangitou buatte naṛṛuwo sambau walahanna sarangkanambone watukku pamamuanganna, wuṛṛu nanantilli mangitou su Edom; i mangitou buatte nilumawangnga paaire paggahahawe.

¹⁰ Ana waugu udde i Ya'u sarun mangirimmu putungnga watukku manga darandungngu Tirus wuṛṛu manoṛṛobba ma'oman sara masue manga tanda batune.”

Edom

¹¹ Mawu nabbisara, “Tumana'u Edom masokkate ma'ola'a rosa, ana waugu udde i Ya'u sarun makkuumannai mangitou. Ringannu tawe umakkanna, i mangitou buatte namangalo taumatan Israel, manga tuṛṛangngi mangitou. I mangitou sidutu mandona wuṛṛu mangke mangngunne.

¹² Ana waugu udde, i Ya'u sarun mangirimmu putungnga watukku soa Teman, wuṛṛu manoṛṛobba ma'oman sara masue manga tanda'a watun Bozra.”

Amon

¹³ Mawu nabbisara, “Walahannu Amon masokkate ma'ola'a rosa, ana waugu udde i Ya'u sarun makkuumanni mangitou. Sutempo napapangalo tadea'u manggewalla wageangngu araratuanne, i mangitou nangua tiannu manga wawine pia illoṛṛone su Gilead.

¹⁴ Ana waugu udde, i Ya'u mangirimmu putungnga watukku manga darandungngu soa Raba, wuṛṛu manoṛṛobba ma'oman sara masue manga tanda'a watune. Sutempo udde sarun aringiṛṛanna paggahahion pangalo, wuṛṛu papangalo maddantanna ere tandi'a.

¹⁵ Ratun mangitou wuṛṛu manga tembonannu araratuane sarun ṛuwoanna watukku pamuanganna. I Ya'u, Mawu, buatte nabbisara.”