3 YOHANES 1 - WUKE SUSI WATTI'U AL᷊AL᷊USASSA

¹ Tuṛṛanga Gayus apan arangnguanna! I ya'u piaṛṛa'u jamaatta, apan atonna-tonna mandangngu si'o,

² u'al᷊iomanna tadea'u antimanna tuṛṛanga tawe auranganne wuṛṛu sarangkanambone mapia-pia si'o, ere lai ṛimuudde mapia-pia lai.

³ I ya'u lulluassa tassul᷊ungnge, su tempo manga pira tuṛṛangnga Saṛṛani na'oma wuṛṛu nabbatti'a si ya'u manungku aroddi atuṛṛune tuṛṛanga su Ruata apan su ṛinone udde, ana waugu atonna tuṛṛangnga wotongnge sidutu mabbiakka tuttuṛṛuta al᷊aṛṛa'u Ruata.

⁴ Taweddu apan lembon maal᷊uassa naungku, wuassu i ya'u maaringikka manungku manga al᷊aṛṛana'u mabbiakka tuttuṛṛuta al᷊aṛṛa'u Ruata.

Gayus niraloanna

⁵ Tuṛṛangku! Tuṛṛangnga aroddi atuṛṛunne sulal᷊ummu manara apan a'olaannu tuṛṛanga su manga hawe labbisa taumatan Saṛṛani; ewe'e lai manga taumatan Saṛṛani apan taambe niasingkatannu lai, a'imbeanni yamiu.

⁶ I mangitou suete namasingkatta su jamaatta apan pammanaranni ami su ola'u darangngunu udde. Tul᷊unga'a i mangitou tadea'u wotongnge maasassu amatanni mangitou wuṛṛu ringannu aroddi maal᷊uassa naungngu Ruata,

⁷ ana waugu sulal᷊ummu amatanna mabatti'u ola'i Kristus, i mangitou tawe naasengkamma sasumbala saran kaddio'a wuassu manga taumata apan tawe maaillal᷊a Ruata.

⁸ Ana waugu udde, i ite manga taumatan Saṛṛani ṛinone mantul᷊ungngu manga tuṛṛangngi ite apan labbisa taumatan Saṛṛani ereudde, tadea'u i ite wotongnge su sambau sulal᷊ummu manaran mangitou mabatti'u al᷊aṛṛa'a su ṛinone wuassu Ruata.

Diotrefes wuṛṛu Demetrius

⁹ I ya'u suete namoṛṛettu suratta apan maautta su jamaatta, arawe Diotrefes apan maapulu maola'a piaṛṛa'u jamaatta, maddiri tumuṛṛutta si ya'u.

¹⁰ Napawe i ya'u rumanta, i ya'u sarun mamasingkattu al᷊awo'u inolaanne, eteudde inolaanna apan lal᷊eo wuṛṛu awusu apan niwisaran tou su ola'i yami! Arawe sarangkanambone udde taambe nasuungnga maola'a hunane. Su tempo manga hawe labissa taumatan Saṛṛani udde nirumanta, i tou maddiri manarimmatti mangitou. Ewe'e lai tou naningaddu manga taumata apan maapulu manarimmattu manga tuṛṛangnga udde, wuṛṛu i tou nandolokku manga taumata udde sumabbanga wuassu jamaatta!

¹¹ Tuṛṛanga apan arangnguanna, ariewe mattanno apa apan lal᷊eo udde. Pattannote apa apan mapia. Taumata apan inolaanne mapia uddewe pussa'an Duata. Wuṛṛu taumata inolaanne lal᷊eo taambe naaillal᷊a Ruata.

¹² Anambon taumata maddalo si Demetrius. Ewe'e Ruata lai maddalo si tou. I yamiu lai maddalo si tou wuṛṛu tuṛṛangnga masingkatta manungku apa apan iwabbatti'i yami udde apangimananna.

Tabea ainsue suratta

¹³ Ta'e manambo atonna apan ta'u iwal᷊o si yamiu, arawe i ya'u mammendama mappianne arie sulal᷊ummu suratta.

¹⁴ I ya'u mangantimma lai tate mal᷊annu i ite massomba, wuṛṛu i ite wotongnge maggahatto suaddio'a.

¹⁵ Antimanna Ruata mangal᷊amatta tuṛṛangnga. Manga hawenu su tampa'u indi nandohon tabea lai sio. Wal᷊oa'a tabea'u su anambon manga hawen kite sambau-sambau.