2 TIMOTIUS 4 - WUKE SUSI WATTI'U AL᷊AL᷊USASSA

¹ Kristus Yesus sarun rumanta apia su runia indi mamarikissa manga taumata apan wiakka wuṛṛu nate; wuṛṛu i Tou sarun rumanta mamarenta ere sangkatou Ratu. Ana waugu udde i ya'u sumal᷊ande si yamiu su saruannu Ruata wuṛṛu Kristus Yesus;

² Ṛinone i'o mamasingkatu watti'a wuassu Ruata udde, wuṛṛu sidutu mammata'a tadea'u taumata maddaringikka, apa i mangitou maapulu ara'e maddiri. Ṛinone i'o mapaangimannu taumata, manta'en pasasal᷊a, wuṛṛu mangonggolu sasasa si mangitou. Aṛṛa'ete taumata ringannu anambon asasabbare.

³ Ana waugu sarun a'omanna tempone taumata maddirite lai maddaringikka al᷊aṛṛa'a apan naṛṛino. Arawe i mangitou sarun tumuṛṛutta apulu mangitou sassane, wuṛṛu mangammulu huru manambo iapaaṛṛa'u manga inolaanna apan mapia su aringikku tal᷊ingan mangitou.

⁴ I mangitou sarun maṛṛapinga tal᷊inga su watti'a atonna, arawe sarun maddaringikka wa'e tawe gunane.

⁵ Salaiwe aroddi, i'o ṛinone uaparenta watangannu sulal᷊ummu al᷊awo'a apan mariaddi. Paasabare sulal᷊ummu asasusa, ola'e manaranu mabatti'u Watti'u Al᷊aluassa udde wuṛṛu amata'e ringannu mapia-pia manaranu ere sangkatou mangangimbe Ruata.

⁶ Su ola'u riri'u, nia'omante tempone i ya'u sarun mate maola'a sambau sasamba su Ruata. Tate mal᷊annu lai ya'u sarun manantangngu runia indi.

⁷ I ya'u suete nattalumma ringannu mapia-pia, wuṛṛu na'omate su akkitta panginsueanne. I ya'u sidutu tuttuṛṛuta Mawu Yesus saran pangudusanne.

⁸ Wuṛṛu orassa indi lal᷊antaku auntunganna uaraṛṛaddo sia'u. Su Allon Kiamatta, Mawu, Mallaṛṛuungnga apan matul᷊idda udde sarun manantillu lal᷊antake udde si ya'u, ana waugu i ya'u mabbiakka uaaukka ringannu Ruata. Wuṛṛu wal᷊ine tumba'u i ya'u sassane apan manengkamma lal᷊antake udde, arawe lai anambon taumata apan uaraṛṛaddo darantan Mawu ringannu ahewallu naungnga.

Manga tatantiro panginsueanne

⁹ Rantate ringangku ringannu mal᷊iha-l᷊ihakka,

¹⁰ ana waugu Demas suete nanantangku ana waugu nandangute runia indi. I tou nanute watukku Tesalonika. Kreskes nabatukken Galatia, wuṛṛu Titus watukku Dalmatia.

¹¹ Tumba'u Lukas natantanga ringangku, ana waugu i tou wotonge mallal᷊ima manara'u.

¹² I ya'u suete nandolokki Tikhikus inai watukku Efesus.

¹³ Amungkangu i'o rumanta, apira'a laubbu sunge apan ta'u tinantanga su Troas su wal᷊en Karpus. Apira'a lai manga wuke'u, lembonete manga wuke apan suranne niola'a wuassu pisi.

¹⁴ Aleksander, taṛṛa ola'a witu'a udde suete na'ola'a manga inolaanna apan lal᷊eo si ya'u. Mawu sarun mabbal᷊issa si tou tumuṛṛuttu inolaanne.

¹⁵ I'o sassane ṛinone paatehamma si tou, ana waugu i tou maddiri maddaringikka watti'i ite.

¹⁶ Su tempo i ya'u paarorone sinumimbakka, tawe saran sangkatou apan uaringanna si ya'u; sarangkanambone nanantangku. Doronganna Ruata tawe mapaasal᷊an mangitou su olangnge indi!

¹⁷ Arawe Mawu uaringanna si ya'u. I Tou nangonggolu atatohassa na'oman sara i ya'u wotongnge mamasingkatu al᷊awo'u Watti'u Al᷊al᷊uassa udde, tadea'u daringiṛṛanu anambon taumata apan wal᷊ine Yahudi.

¹⁸ Wuṛṛu i ya'u napallose wuassu papate. Atonna Ruata sarun mamallosa wuassu al᷊awo'u pandumma apan lal᷊eo su riri'u. I Tou sarun mangapi'u ringannu sal᷊amatta sulal᷊ummu araratuan-Ne su surga. Ṛinone i Tou wantuhanna saran mal᷊annu-l᷊annu! Amin.

Tabea Panginsueanne

¹⁹ Tabea'u si Priskila wuṛṛu Akwila wuṛṛu su amonanni Onesiforus.

²⁰ Erastus uatana'a su Korintus, wuṛṛu Trofimus suete tinantangku marada'a su Miletus.

²¹ Amungkangu wotongnge rantate tantal᷊anna taambe tempon masunge. Ebulus, Pudes, Linus, wuṛṛu Klaudia nandohon tabea mangitou si'o; aroddi lai anambon tuṛṛanga waine sulal᷊ummu pangangimanna sambau.

²² Doronganna Mawu makkundinganna si'o. Doronganna Mawu mangal᷊amatta Manga tuṛṛangnga! Tabea wuassi yami, Paulus