2 TIMOTIUS 3 - WUKE SUSI WATTI'U AL᷊AL᷊USASSA

Manga allo panginsueanne

¹ Naunge'o indi: Su manga allo panginsueanne sarun pia asasusa manambo.

² Taumata tumba'u maṛṛingiddu ririne sassane, apulune roitta, mawunga wuṛṛu tal᷊imoṛṛonganna. I mangitou taṛṛa addio'a taumata, taṛṛa rona timmade, wagga maadiangkamana, wuṛṛu maddantinu inolaannu Saṛṛani.

³ I mangitou maddiri mandangngu taumata sansul᷊unge, tawe mangonggolu ampunga, i mangitou apulune mandal᷊eo arannu taumata waine, taṛṛa wata'a, i mangitou maṛṛaggisa, wuṛṛu maddirin apapia.

⁴ I mangitou apulune mandal᷊eo taumata, mawunga wuṛṛu tawe maṛṛingidda mal᷊o'e. I mangitou apulune tuttuṛṛuta lal᷊umanna'u runia wuassu tumuṛṛutta al᷊aṛṛa'u Ruata.

⁵ Salaiwe su ola'u waddangnga, i mangitou matuṛṛutta mappaamattu titan agama, arawe maddiri manengkamma lal᷊oṛṛon watiti'u agama udde sassane. Paarau manga taumata ereudde.

⁶ Pia su wallatti mangitou apan suete sinumutta su manga wal᷊e, see mammono'a manga wawine lome apan anamboanne rosane wuṛṛu paparentannu anambon apulune.

⁷ Manga wawine udde sidutu mammiaṛṛa'a, arawe tawe saran paassa maasunna al᷊aṛṛa'a apan atonna wuassu Ruata.

⁸ Su ereapa Yanes wuṛṛu Yambres nilumawangnga si Musa rorone, aroddi lai manga taumata udde nilumawangnga al᷊aṛṛa'a wuassu Ruata. Ṛingidi mangitou nahohakke, wuṛṛu pangangimanni mangitou nisiladde.

⁹ Arawe i mangitou tawe maasomba apa-apa, ana waugu awawoddo mangitou sarun asingkatannu anambon taumata, ere lai nariaddi si Yanes wuṛṛu Yambres.

Manga tatantiro

¹⁰ Arawe i'o suete tinumuṛṛuta manga al᷊aṛṛa'u, pallal᷊agu'u, wuṛṛu tuddan pabbiaṛṛangku. I'o suete naasilo sassane ereapa i ya'u atonna-tonna mangngimanna si Yesus Kristus wuṛṛu marangngu su sansul᷊ungngu taumata. I'o lai masingkatu asasabare'u wuṛṛu atatammu'u.

¹¹ I'o naasilote si ya'u sassansaranna wuṛṛu i ya'u uatataṛṛanga. I'o masingkatu anambon apan nariaddi si ya'u su Antiokhia, su Ikonium, wuṛṛu su Listra; wuṛṛu i'o masingkata lai anambon asasusa'u! Arawe Mawu nanal᷊amatta si ya'u wuassu sarangkanambone udde.

¹² Atonna anambon taumata apan maapulu mabbiakka mattaṛṛamawu, wuṛṛu mabbiakka uaaukka ringanni Kristus Yesus sarun sansaranna,

¹³ arawe manga taumata lal᷊eo wuṛṛu manga taumata taṛṛa l᷊inga sarun mabbal᷊i lembon al᷊eoanne. I mangitou mallinga taumata waine, wutte'e i mangitou sassane nial᷊inganna lai.

¹⁴ Arawe i'o, Timotius, ṛinone i'o sidutu uaaggasa manga al᷊aṛṛa'a naṛṛino apan suete niaṛṛa'a si'o wuṛṛu pangimanannu atonna; ana waugu i'o masingkata isai manga hurunu.

¹⁵ I'o ṛinone mannaungnga manungku ro'en ta'e dario'a i'o masingkaten Wuke Susi. Wuke Susi udde wotongnge mangonggolu pasasunna si'o tadea'u maasomba asasal᷊amatta sulal᷊ummu pangangimanna si Kristus Yesus.

¹⁶ Sarangkanambone apan uawoṛṛetta sulal᷊ummu Wuke Susi, tinantiron Duata wuṛṛu pia gunane ipangaṛṛa'a al᷊aṛṛa'a su ṛinone, ipanaggu, wuṛṛu ipangapia apan nassal᷊a, wuṛṛu ipangaṛṛa'a taumata tadea'u mabbiakka tumuṛṛuttu apulun Duata.

¹⁷ Ringannu Wuke Susi udde taumata apan mangngimbe Ruata wotongnge peddetannu asasuungnga su al᷊awo'u manara apan mapia.