2 TESALONIKA 3 - WUKE SUSI WATTI'U AL᷊AL᷊USASSA

Aal᷊iomana'awe i yami

¹ Panginsueanne, Manga tuṛṛangnga, aal᷊iomana'awe i yami. Aal᷊iomante tadea'u watti'a wuassu Mawu wotongnge siddutu massal᷊iawukka ringannu mal᷊ihakka wuṛṛu sengkamanna ringannu mapia, ere lai suete nariaddi si yamiu dorone.

² Aal᷊iomante lai tadea'u Ruata manal᷊amatta si yami wuassu manga taumata lal᷊eo. Ana waugu tawe anambon taumata mangngimanna watti'a wuassu Mawu udde.

³ Arawe Mawu matuṛṛuta. I Tou sarun manohassa si yamiu wuṛṛu mallu'adda si yamiu wua si Lal᷊eo.

⁴ Wuṛṛu i yami mangngimanna atonna su Mawu su ola'i yamiu, manungku i yamiu tantal᷊anna mammanara wuṛṛu siddutu mammanara apa apan iradolokki yami si yamiu.

⁵ Doronganna Mawu mangehetta si yamiu ana see wotongnge lembon maasunna manungku Ruata marangngu si yamiu wuṛṛu manungku Kristus nangonggollu atatamudda si yamiu.

Sidutua'a su mammanara

⁶ Manga tuṛṛangnga, wuassu taṛṛinon Mawu Yesus Kristus, i yami nandolokka tadea'u i yamiu mangindau manga tuṛṛanga, apan mabbiakka wolo'a, wuṛṛu maddiri tumuṛṛutta manga al᷊aṛṛa'a apan niapaasingkati yami si mangitou.

⁷ I yamiu sassane masingkata manungku i yamiu sarun mattanno tul᷊addan kami. Yami tawe su awawolo'a su tempo i yami uatana'a ringanni yamiu.

⁸ I yami tawe mammo'on annu taumata ringannu tawe mamaekka. Ewe'e allo ṛabbi yami mammanara mattinsahadda tadea'u i yami tawe mapaasusan sai-sai wuassu wallatti yamiu.

⁹ I yami ma'ola'a udde wal᷊ine ana waugu i yami maapulu manul᷊adda si yamiu.

¹⁰ Su tempo i yami ta'e uatana'a su pattanganni yamiu, i yami nangonggolu atoranna indi, “Taumata apan maddiri mammanara, tawe wotongnge umanna.”

¹¹ I yami nabbisara arendi ana waugu i yami naaringikka manungku pia manga taumata su wallatti yamiu apan mabbiakka su amamalassa. I mangitou tawe mammanara, tumba'u ma'ilal᷊o'a su hatton taumata waine.

¹² Wuassu taṛṛino Mawu Yesus Kristus i yami nandolokku manga taumata udde wuṛṛu niapaanaungnga, tadea'u i mangitou mammanara ringannu matammuda wuṛṛu maddea'a wiakki mangitou sassane.

¹³ Arawe i yamiu arie paawusa ma'ola'a apapia.

¹⁴ Asinungka ta'e pia taumata apan maddiri tumuṛṛutta apa apan niapaasingkati yami sulal᷊ummu suratta indi. Paatehamma su saruannu taumata ereudde wuṛṛu arie maggawen tou tadea'u i tou masili.

¹⁵ Arawe arie i tou olaanna ere seetta; tumba'u tantiroite i tou ere sangkatou tuṛṛanga.

Manga wisara panginsueanne

¹⁶ Eteudde Mawu punnu paddaramen kite. Doronganna i Tou siddutu mangonggolu paddarame si yamiu su al᷊awo'u inolaanna. Doronganna Mawu makkundinganna tuṛṛanga sarangkanambone.

¹⁷ Tabea wuassi ya'u, Paulus. I ya'u sassane namoṛṛetu wageangnge indi. Ete indi tiala apan ta'u niwoṛṛeta sulal᷊ummu anambon suratta niwoṛṛe'u.

¹⁸ Doronganna Mawun kite Yesus Kristus mangal᷊amatta tuṛṛanga sarangkanambone. Tabea wuassi yami, Paulus