2 TESALONIKA 1 - WUKE SUSI WATTI'U AL᷊AL᷊USASSA

¹ Manga tuṛṛangnga jamaatta su Tesalonika, apan naola'a walahannu Ruata Iamangngi ite wuṛṛu Mawu Yesus Kristus! Yami eteudde Paulus, Silas wuṛṛu Timotius

² mangngantimma doronganna Ruata Iamangnga wuṛṛu Mawu Yesus Kristus mangonggolu al᷊amatta wuṛṛu paddarame si yamiu.

Ṛu'umanna apan ola'anna su darantan Kristus

³ Manga tuṛṛangnga, i yami siddutu ma'adiangkamanna su Ruata ana waugu i yamiu. Wuṛṛu mangngimanna si Kristus, wuṛṛu i yamiu lembon uararangngu sangkatou ringannu waine.

⁴ Ana waugu udde anio i yamiu uahahatto su ola'i yamiu suapan i yami mattembo manga jamaattu Ruata. Ringannu mal᷊uassa i yami mabatti'a ereapa i yamiu siddutu mangngimanna si Kristus sulal᷊ummu pananansara wuṛṛu asasusa apan niapendamanni yamiu.

⁵ Isindi nasemakke aroddi atul᷊idde pamamarikissu Ruata: I yamiu suete natataṛṛanga ana waugu Runia Wakkun Duata, ana waugu udde i yamiu wotongnge sumutta sulal᷊umme.

⁶ I Tou sarun ma'ola'a atatul᷊idda, wuṛṛu sarun mabal᷊issu asasusa su taumata apan napaasusan kamiu.

⁷ Wuṛṛu si yamiu apan orassa indi uatataṛṛanga – aroddi lai si yami – Ruata sarun mangonggolu al᷊al᷊uassa su allo Mawu Yesus sumossokka wuassu surga wuṛṛu mamasilom batangan-Ne ringannu manga mala'ekatta apan matohassa,

⁸ wuṛṛu ringannu putungnga apan mabbanala. I Tou sinumossoka maṛṛuumannu manga taumata apan tawe mangngimanna Ruata wuṛṛu maddiri mabbiakka su apulun Watti'u Al᷊al᷊uassa su ola'u Mawun kite Yesus Kristus.

⁹ Manga taumata udde sarun manengkamma ṛuumanna papate sarangkal᷊o'engnge, iramme su liudde wuassu ammul᷊annu taumata Mawu wuṛṛu wuassu taṛṛino-Ne apan mawantuga;

¹⁰ sarangkanambone udde sarun mariaddi su allo i Tou rumanta apia ana wantuhannu al᷊aṛṛanang-Nge wuṛṛu addatannu anambon taumata apan mangngimanna. I yamiu lai isudde su sambau ringannu walahannu Ruata udde, ana waugu i yamiu suete nangimanna watti'a apan niapaasingkati ami si yamiu.

¹¹ Ana waugu udde i yami sidutu u'al᷊iomanni yamiu. I yami u'al᷊iomanna tadea'u Ruata ma'ola'a si yamiu wotongnge mabbiakka tumuṛṛutta apulu-Ne; ana waugu udde i Tou namaggo si yamiu. Doronganna Ruata, ringannu taṛṛino-Ne, manuungngu apulu-Ne ma'ola'a apapia, wuṛṛu manuungngu anambon manara apan a'olaanni yamiu ana waugu mangngimanna si Kristus.

¹² Ringannu aroddi Mawun kite Yesus Kristus wantuhanni yamiu, wuṛṛu i yamiu lai wantuhannu Mawu Yesus ana waugu apapia naungngu Ruatan kite wuṛṛu Mawu Yesus Kristus.