2 TAWARIKH 6 - WUKE SUSI WATTI'U AL᷊AL᷊USASSA

I Ratu Salomo nassinaukka su saruannu tumanangnge

¹ I Ratu Salomo niumal᷊iomanna, “Oh Mawu, I'o lembon maapulu matana'a sulal᷊ummu ararandummu winabbawa.

² Orassa indi ta'u niapararisikka Si'o wal᷊en apan maṛṛamaga, maola'a tampa atatanaan-Nu saran mal᷊annu-l᷊annu.”

³ Napawe buatte niumal᷊iomanna, ratu nanaile anambon tumanangnge apan tantal᷊anna uarisikka isudde, ana see i tou sinumal᷊ande al᷊amattu Ruata si mangitou.

^4-6 I tou nabbisara, “Dorone Mawu buatte na'ire su iamangku Daud arendi, ‘Ro'en i Ya'u nangapiddu walahang-Ku sinumabbangnga wuassu Mesir naddatingngu allo indi, su wanuan Israel tawe sambau soa apan Ta'u nipile maola'a tampa apan ṛinone paparisiṛannu wal᷊en patataṛṛamawuanna si Ya'u, wuṛṛu tawe saran sangkatou apan Ta'u nipile iapapiaṛṛa'u walahang-Ku Israel. Arawe orassa indi Ya'u namile Yerusalem maola'a tampa patataṛamawuanna si Ya'u. Wuṛṛu i'o, Daud, Ta'u pileanna iapaparenta walahang-Ku.’ Daralo su Mawu Ruatan Israel apan buatte nanipussa paaire-Ne udde!”

⁷ Nanansunna Salomo nabbisara, “Iamangku Daud buatte nanggol᷊aga mapararisikku wal᷊en tampa patataṛṛamawuanna Mawu Ruatan Israel.

⁸ Arawe Mawu nabbisara si tou, ‘Pandumannu udde mapia.

⁹ Arawe, wal᷊ine i'o, ewe'e ete anangngu apan sarun mapararisikku Wal᷊e-U udde.’

¹⁰ Orassa indi Mawu buatte nanipussa paaire-Ne. I ya'u naola'e ratun Israel nallol᷊ossa iamangku, wuṛṛu i ya'u lai buatte napararisikku wal᷊en patataṛṛamawuanna Mawu Ruatan Israel.

¹¹ Sulal᷊ummu Wal᷊en Mawu udde i ya'u buatte nanaddia tampa panahipunanna Wantallu Paaire apan lal᷊oṛṛoannu watu paairen Mawu ringannu taumatan Israel.”

Aal᷊iomanni Salomo

^12-13 I Salomo buatte na'ola'a panggunga witu'a su pattangngannu rallakku Wal᷊en Mawu. Al᷊o'engnge wuṛṛu al᷊alakke 2.2 metere, wuṛṛu atanggakke 1.3 metere. Su saruannu tumanangnge apan uasemodda, i Salomo sinuma'e su panggunga udde, wuṛṛu dirumarisikka uasaruanna mezbah. Sarangkanambone wotongnge maasilo si tou. Wua'udde i tou niumal᷊intudda, ana see namatten limane ruam ba'a wuṛṛu niumaalatta watukku langitta ana see niumal᷊iomanna,

¹⁴ “Mawu, Ruatan Israel! Su langitta ara'e lai su runia taweddu ere I'o! I'o nanipussa paaire-Nu wuṛṛu napal᷊iatta'u darangngu-Nu su al᷊aṛanang-Ngu apan matammudda wuṛṛu matuṛṛutta ringannu ahewallu naungnga Si'o.

¹⁵ I'o buatte nanipussa paaire-Nu su iamangku Daud. Sarangkanambone apan nipa'ire-Nu udde buatte nimanara'u allo indi.

^16-17 I'o lai buatte na'ire su iamangku manungku amungkangu papapulunne atonna-tonna tuttuṛṛutta tita-Nu ere lai i tou, ne saran mal᷊annu-l᷊annu sangkatou wuassu papapulunne sarun mamarenta maola'a ratu su Israel. Orassa indi, oh Mawu Ruatan Israel, tipussa laiwe sarangkanambone apan buatte nipa'ire-Nu su iamangku Daud, allang-Ngu udde.

¹⁸ Arawe, oh Ruata, atonnawe I'o mal᷊uassa matana'a su runia indi suwallattu taumata? Ahewallu langitta lai tawe matiudda Si'o, nangillembote wal᷊en patataṛṛamawuanna apan ta'u niola'a indi!

¹⁹ Oh Mawu, Ruata'u, i ya'u allang-Ngu! Arawe daringiṛṛewe aal᷊iomangku, wuṛṛu tipussawe darorongku.

^20-21 Antimanna allo ṛabbi I'o uasirungnga wal᷊en indi apan buatte nipile-Nu maola'a tampa patataṛṛamawuanna Si'o. Antimanna wuassu tampa atatanaan-Nu su surga I'o maddaringikka wuṛṛu mangampungnga si ya'u see lai ṛuangannu Israel al᷊aṛṛanang-Ngu udde, napawe yami sumaruanna wal᷊en indi wuṛṛu umal᷊iomanna Si'o.

²² Amungkangu pia sangkatou niansil᷊anna nassal᷊a su saruannu taumata waine wuṛṛu iapidda watukku mezbah-Nu sulal᷊ummu Wal᷊en-Nu indi ana waugu i tou iapasalu manungku i tou tawe na'ola'a pasasal᷊a,

²³ oh Mawu, ṛinonewe I'o maddaringikka wuassu surga wuṛṛu makkawessu hatton manga allang-Ngu indi. Ṛuumana'e iapa nassal᷊a wuṛṛu pallosa'e iapa tawe sal᷊ane.

²⁴ Amungkangu al᷊aṛṛanang-Ngu niawaddon manga seenne ana waugu i mangitou marosa, ana see sinumassilla wuṛṛu nangaddatta Si'o apia Mawu, wua'udde nirumanta su Wal᷊en-Nu indi lapiddu niumal᷊iomanna maddorongnga ampungnga Si'o,

²⁵ antimanna wuassu surga I'o maddaringikka si mangitou. Antimanna I'o mangampungnga rosan al᷊aṛanang-Ngu indi, wuṛṛu mangapiddi mangitou apia mabelengnga watukku wanua apan buatte nionggolu Mawu si mangitou wuṛṛu su al᷊amonan mangitou.

²⁶ Amungkangu al᷊aṛṛanang-Ngu marosa su saruan-Nu wuṛṛu I'o makkumanni mangitou ringannu tawe manossokku uranna, ana see i mangitou mawal᷊u wuassu rosan mangitou wuṛṛu mangaddatta Si'o Mawu, wua'udde sumaruanna watukku Wal᷊en-Nu indi lapiddu umal᷊iomanna Si'o,

²⁷ oh Mawu su surga, daringiṛewe i mangitou. Wuṛṛu ampungewe rosan manga allang-Ngu walahannu Israel. Tantiroiwe i mangitou su inolaanna apan ṛinone. Wua'udde, oh Mawu, pasosoṛṛaawe uranna su wanua-Nu indi, wanua apan nionggolu Mawu su walahannu apan maola'a pussaane saran mal᷊annu-l᷊annu.

²⁸ Amungkangu wanua, indi rantannu elessa ara'e sa'itta, ara'e manga sasuanna pateannu anginna mal᷊oso radda'u sasuanna ara'e saṛṛappalanna, ara'e amungkangu walahan-Nu pangaloannu seetta, ara'e rantannu radda'a,

²⁹ antimanna I'o maddaringikka aal᷊iomanni mangitou. Amungkangu suwallatu ṛuangannu Israel piaddu massusa naungnge u'al᷊iomanna Si'o lapiddu uaalattu limane watukku Wal᷊en-Nu indi,

³⁰ antimanna I'o sulal᷊ummu atatanaan-Nu su surga maddaringikka lapiddu mangampungnga si mangitou. Tumba'u I'o masingkattu lal᷊ummu naungngu taumata. Ana waugu udde ṛuumana'e suapan taumata tumuṛṛuttu manga inolaanne,

³¹ tadea'u ṛuanganna matta'utta wuṛṛu sidutu tuttuṛṛutta Si'o su al᷊o'engngu tempo i mangitou uatana'a su wanua apan nionggolu Mawu su al᷊amonan kami.

³² Amungkangu sangkatou raho su wanua apan marau naaringikka awawantuga wuṛṛu atatohan-Nu, wuṛṛu manungku I'o sidutu uasaddia mantul᷊ungnga, ana see i tou rumanta su Wal᷊en-Nu indi umal᷊iomanna Si'o,

³³ antimanna wuassu tatanaan-Nu su surga I'o maddaringikka aal᷊iomanne wuṛṛu manipussa darorongnge. Ringannu aroddi al᷊awo'u walahanna su ahewallu runia sarun maillal᷊a Si'o wuṛṛu tumuṛṛutta Si'o ere lai ṛuangannu Israel. I mangitou sarun maasingkatta manungku Wal᷊en apan ta'u niola'a indiwe tampa patataṛṛamawuanna Si'o.

³⁴ Amungkangu I'o mamarenta ṛuangan-Nu inai mapapangalo mando'appa seetta, ana see su al᷊awo'u tampa atatanaanni mangitou, i mangitou sumaruanna watukku soa nipile-Nu indi apan buatte ta'u niola'a hunane su Mawu,

³⁵ antimanna wuassu surga I'o maddaringikka aal᷊iomanni mangitou udde, wuṛṛu mangonggolu auntunganna si mangitou.

³⁶ Amungkangu walahan-Nu ma'ola'a rosa su saruan-Nu – mangke atonna tawe saran sangkatou apan tawe marosa – ana see ana waugu asasa'u-Nu i mangitou niwala-Nu niawaddon seetta wuṛṛu niapidda niatawanna su sambau wanua apan marau ara'e marani,

³⁷ antimanna I'o maddaringikka aal᷊iomanni mangitou. Amungkangu su wanua indi i mangitou nanantangngu manga rosan mangitou, wuṛṛu umal᷊iomanna Si'o lapiddu manga'u manungku i mangitou narosate wuṛṛu na'ola'a al᷊al᷊eo, daringiṛewe aal᷊iomanni mangitou, oh Mawu.

³⁸ Amungkangu su wanua udde i mangitou ringannu naungnga matul᷊idda wuṛṛu atonna-tonna manantangngu manga rosan mangitou, wuṛṛu umal᷊iomanna Si'o lapiddu sumaruanna watukku wanua indi apan nionggolu Mawu su al᷊amonan kami, watukku soa nipile-Nu wuṛṛu wal᷊en patataṛamawuanna apan buatte ta'u niapararisikka hunane Si'o indi,

³⁹ ne wuassu atatanaan-Nu su surga ṛinonewe I'o maddaringikka aal᷊iomanni mangitou wuṛṛu umakkanni mangitou. Ampungewe anambon rosan al᷊aṛanang-Ngu.

⁴⁰ Orassa indi, oh Mawu Ruata'u, intanoiwe yami wuṛṛu daringiṛewe manga aal᷊iomanna apan niapasingkatta Si'o wuassu tampa indi.

⁴¹ Darisikkewe orassa indi, oh Mawu Ruata! Wuṛṛu suadio'a ringannu Wantallu Paaire apan mapal᷊iatta'u taṛṛino-Nu udde, ṛinone I'o sumutta su Wal᷊en-Nu indi wuṛṛu matana'a isindi saran mal᷊annu-l᷊annu. Al᷊amatewe anambon manara manga imam, wuṛṛu antimanna al᷊aṛanang-Ngu sarangkanambone lulluassa ana waugu I'o marangngu si mangitou.

⁴² Mawu Ruata, ariewe I'o manol᷊a'u ratu apan buatte nipile-Nu indi. Naungewe darangngu-Nu si Daud allang-Ngu.”