2 TAWARIKH 5 - WUKE SUSI WATTI'U AL᷊AL᷊USASSA

¹ Napawe i Ratu Salomo buatte napararisikku Wal᷊en Mawu udde, i tou nanahipunna sulal᷊ummu gudangngu wal᷊en udde anambon sal᷊a'a, wul᷊awanna wuṛṛu manga saranapa waine apan buatte nionggoli Daud iamangnge su Mawu.

Wantallu Paairen Mawu niapidda watukku Wal᷊en

² Wua'udde i Ratu Salomo nandolokku anambon piaṛṛa'u ṛuanganna wuṛṛu wawosoanna wuassu walahannu Israel maammulla su Yerusalem mangingkattu Wantallu Paairen Mawu wuassu Sion, Soan Daud watukku Wal᷊en Mawu.

³ Ne i mangitou sarangkanambone nirumantate su allon damean Sabbuan Rongnga.

⁴ Napawe anambon piaṛṛangnge udde uaammulle, manga taumatan Lewi namasannate Wantallu Paairen Mawu udde,

⁵ wuṛṛu niapidda watukku Wal᷊en Mawu. Rasannu Mawu see lai anambon saranapane niingkattu manga imam wuṛṛu taumatan Lewi watukku Wal᷊en Mawu.

⁶ Ratu Salomo wuṛṛu anambon tumana'u Israel sarangkanambone uasemodda su saruannu Wantallu Paaire udde ana see nangonggola su Mawu sasamba domba wuṛṛu sapi apan tawe iareengnga anambone.

⁷ Wua'udde manga imam napasuttate Wantallu Paaire udde sulal᷊ummu Wal᷊en Mawu wuṛṛu niaddo su al᷊ungngu paal᷊uannu mala'ekatta sulal᷊ummu Wabbo'a Lembon Susi.

⁸ Papaiddu manga paal᷊uanna udde uasiappakka nanaappa Wantalla udde wuṛṛu manga alu papasannane.

⁹ Alu papasannane tumaniten mal᷊o'engnga, na'oman sara manga pentakke aasiloanna wuassu saruannu Wabbo'a Lembon Susi, arawe tawe aasiloanna wuassu liudde. (Naddatingngu allo indi manga alu udde ta'e isudde.)

¹⁰ Sulal᷊ummu Wantallu Paaire udde tawe saran sambau saranapa, tumba'u darua ul᷊appane watu. Manga watu udde buatte nitaṛṛon Musa isudde su Wowon Sinai, sutempo Mawu na'ola'a paaire ringannu walahannu Israel sutempo i mangitou sulal᷊ummu amatanna wuassu Mesir mabatukku wanua Kanaan.

Awawantugu Mawu

^11-14 Anambon imam apan isudde, wuassu anambon ammul᷊anna, buatte nandiahi watanganne su ipallaghun addata udde. Anambon mangangantari wuṛṛu mananalangnga musikka sulal᷊ummu ṛuanganni Lewi, eteudde Asaf, Heman, Yedutun wuṛṛu anambon taumata apan niapile su ṛuanganni mangitou, ual᷊uṛen laubba wuassu mal᷊aṛṛenessa linen. Manga taumatan Lewi udde uarisikka su samba'a da'in mezbah ringannu uaagassa simbal wuṛṛu kecapi. Suadio'a ringanni mangitou pia 120 su atoune imam apan mattiuppa trompeta. Aantari manga mangangantari nallal᷊omegu musikku trompeta, simbal wuṛṛu musikka waine. Eteindi manga wisara daralo apan mantarim mangitou ipaddalo Mawu: “Paddalote Mawu, ana waugu i Tou mapia. Darangngu-Ne saran mal᷊annu-l᷊annu.” Sutempo manga imam sinumabbangnga wuassu Wal᷊en Mawu udde, inaṛṛombanganne Wal᷊en udde napenen semakku darantan Mawu, na'oman sara i mangitou tate naasassu addatu lal᷊aghun patataṛṛamawu.